[真人真事][校園][純愛]《婚宴上的重遇》: 第三章

咁究竟係乜野絕世好橋
其實條橋只係成日去麥當勞食野
以往可能一個禮拜一次,
依家盡可能就係隔日去
日日去就不了
食得多都悶啦
又唔想係咁爆瘡
我知你地可能會話,
唔通隔日去就會唔悶
會唔爆瘡咩


咁我諗隔日去個機會點都細啲掛
最主要我真係覺得個女仔好靚
你知啦,
第時佢唔喺度做的話,
都唔知幾時先可以再見佢
趁佢依家仲未走,
咁我梗係把握機會啦
當然啦,
所謂嘅把握機會,
其實只係坐喺度望住佢


我真係唔敢主動撩佢傾計
毒就毒啲架啦
不過我就唔信你地未試過咁樣
想同佢傾計,
但又怕唔知講咩好
又驚見到佢個陣會淆底
總之喺個心入面,
自己會俾自己好多難關
又驚呢樣又驚嗰樣,
結果去到最後,


就係乜都唔做
望住佢就算
或者咁講,
其實我覺得,
有得咁樣望住,
已經係一種福氣
你諗下,
香港話大唔大,
但係話細都唔細
咁樣都見到面,
其實機緣都好巧合
吹到幾生修到就誇張啲
不過真心講一句,
依家呢個情況我已經好心滿意足
唔奢求有進一步進展,


始終毒勁最忌就係有自信.

咁樣之後我真係隔日去麥當勞
次次都係食脆辣雞腿包餐
呢個一定唔會變
因為我真係覺得好好食
我仲記得當時癲到,
基本上日日都去望佢
我咪講我隔日去麥當勞嘅
我當我星期一去,
咁樣星期三,星期五,星期日我都會去食脆辣雞腿包餐嘅
咁星期二,星期四,星期六我唔食麥當勞嗰陣,
我總係會借啲意落去睇佢
可能主動幫老媽子落去買野,
之後就乘乘機機自己去麥當勞睇佢


扮晒野喺窗邊望住佢,
當然佢見我唔到啦
見到我就pk
以為真係有痴漢,
好好彩嘅係,
我每次去麥當勞嗰陣都見到佢
我唔知佢認唔認得我啦,
因為大家真係冇乜交流,
不過呢啲都冇所謂
見到佢就已經夠
每一次都計準晏晝個時間就出去麥當勞,
基本上從來都冇失手見唔到佢
老實講,
咁我梗係有暗自ff啦
話冇就呃你,


唔通我同佢真係咁有緣
如果唔係嘅話,
點會成日都見到佢,
我就唔信佢冇放假啦
呢個就係我當時嘅ff喇
每個毒男情竇初開嗰陣都會咁諗架啦,
好出奇咩
可能真係好出奇啦
我都唔知.

我日日去咁樣望佢
呢件事已經維持左差唔多一個星期,
仲勤力過返學O
咁就一次我去麥當勞食野,
咁照舊啦


我專登排去佢負責收銀嘅嗰條隊買野食,
到我買嗰陣,
當我正想講「脆辣雞腿包餐飲可樂喺度食」嗰陣,
女神無啦啦講左一句野:「係咪脆辣雞腿包餐呀 」
呢個時候我完全呆晒
仲使問我點解
女神主動撩我傾計呀
仲要主動問我係咪食脆辣雞腿包餐
唔通佢認得我
發達喇
我真係完全估唔到
咁我梗係即刻話:「係呀 」
麥當勞女員工:「飲可樂 」
佢連我飲可樂都知
真係認得我呀
咁我今日補返句:「喺度食 」
我打死都唔會外賣架啦
如果唔係我嚟麥當勞仲有咩意義
之後女神笑一笑咁樣講:「先生麻煩你幾多幾多錢丫 」
唔係講笑,
真係笑得好靚
又或者咁講,
其實佢乜野表情,
我都話靚架啦
因為真係冇得輸.

返到屋企冷靜過後喺度諗,
其實認得我都唔出奇丫
兩個禮拜係咁嚟
你試下將心比己,
自己做員工,
有個客成日嚟你都會認得佢啦
係咪先?
通常啲人認得另一個人個樣
嗰個人多數唔會係大眾樣
唔係大眾樣的話,
不外乎兩樣野
一係就好靚仔
一係就好騎呢
自己知自己咩事
一定唔係靚仔架喇
唔通佢覺得我個樣夠騎呢
所以先認得,
唉算啦,
都係唔敢幻想太多
當我愈諗得多,
唔知點解我就愈驚
我會諗得好負面,
好驚喺佢面前留低一個唔好印象,
明明喺佢面前留低一個乜野印象都唔關你事
但係自己就好在乎
都唔知自己驚乜
愈諗就愈頹.