[真人真事][校園][純愛]《婚宴上的重遇》: 第十二章

終於去到放飯時間
平時我會同玩開嗰班朋友食飯
不過今日約左若凝,
咁就唔好意思啦朋友們
要推你地一日
我:「今日唔同你地食
聽日先聽日先 」
呀余:「食屎啦又溝女 」
我:「唔係呀真係唔係 」
丁仔:「仲喺度扮野喎 」


我:「佢話唔熟呢度有咩食,
我先幫手帶佢咋 」
呀成:「行哥我都唔知附近有咩食
不如你帶埋我 」
我:「食屎啦 」
呀成:「唉去溝女啦 」
喺度提一提,
可能我之前唔記得左講
呀成係我老死之外,
呀余,丁仔都係我玩開嗰班


樂仔亦都係
不過中六嗰陣佢去左外國讀,
當然仲有幾個啦
不過嗰啲就冇咁frd,
咁就唔開名
其實,
有異性冇人性都好正常啫
唔使係咁俾人鬧呀下話
之後我就返返去若凝嗰邊
我:「依家行得喇


嗰間車仔麵喺邊度 」
若凝:「仲話住呢頭喎
咁好食都唔知喺邊度 」
我:「似你咁有錢咩
成日周圍食 」
若凝:「你食少一兩餐脆辣雞腿包都得啦
差唔多錢咋嘛,
講到好似好富貴咁樣
其實只係食緊車仔麵.」
我:「咁又唔得啵,
我一個禮拜食一兩次脆辣雞腿包
你叫我食少一兩餐脆辣雞腿包,
咪係成個禮拜唔使食 」
若凝:「止唔止咁少呀
嗰排你成日嚟架


次次嚟親都食 」
弊傢伙,
一時講左真話添
唔通我話我因為佢先成日食,
唯有求其作個藉口啦,
我:「嗰排我要溫書唔同啦
咁我都去到咯冇理由唔食丫 」
若凝:「話說你又奇怪喎,
竟然會嚟麥當勞溫書 」
我:「有時屋企嘈丫嘛 」
冇計焗住講大話
我唔講大話,
直接同佢講因為想見到你所以先去麥當勞溫書,
佢一定會當左我係痴線
分分鐘仲即刻走添


若凝:「原來係咁,
行快啲啦
我驚嗰度冇位
坐到先慢慢傾.」
我:「好呀.」

終於入到去,
呢間車仔麵唯一一個敗筆,
就係冇冷氣
咁當時仲係9月,
我地又驚冇位,
所以行得快
自自然然覺得好熱啦
老實講丫,
如果陪我食嗰個唔係若凝,


我真係睬佢都傻
我:「好唔好食架 」
若凝:「好食架信我啦 」
我:「又會咁怪嘅
呢間野又唔係貴,
經濟問題應該唔大丫,
點解你講到好似好少嚟咁樣 」
若凝:「我原本嗰個學校都係附近
亦都係住附近,
所以之前已經知道呢間車仔麵好好食
但係喺之前,
班frd嫌遠又嫌熱
我咪好少嚟囉,
又咁啱你今日有野想問
咪乘乘機機捉你嚟食 」


我:「痴線
你就咁問我我都會肯食啦 」
若凝:「真係架 」
我:「梗係啦,
我又唔覺得真係好熱 」
其實我講笑啫
真心講句其實真係有少少熱
不過冇計啦,
若凝咁想食,
冇得唔賠架
為搏紅顏一笑已經抵返晒
若凝:「好野,
以後就唔使自己一個食囉
其實喺之前間學校我成日都想嚟,
不過佢地唔肯
我又唔想自己一個食喎,
咁咪食少左囉嘻嘻 」
眼前呢個女仔真係好搞笑,
竟然會因為有人肯陪佢食車仔麵就咁開心
其實開心有時真係好簡單,
唔使話要啲乜野,
簡簡單單就已經可以開心
唔係下下都係用錢嚟衡量
不過出到嚟社會就冇呢啲歌仔唱囉
呢啲係中學,小學先會有,
我:「原來你唔鍾意自己一個食架
我又唔覺好大問題 」
若凝:「自己一個食好悶架
如果有人肯陪我食就梗係好過自己食啦 」
我:「你咁樣係咪俾說話我聽 」
若凝:「你太敏感喇
不過係又唔拘 」
呢句說話係咪代表日後若凝仲有唔少機會同我一齊食飯
今次發達喇
但係我梗係要唔可以俾佢知我咁開心啦
唔知點解好奇怪,
我愈鍾意嗰個人,
我就愈唔想俾佢知道我對佢嘅感覺同埋情緒起伏
所以其實有時講啲野都唔係發自內心
即係口裏說不嗰種
我:「你肯出聲大把男仔過嚟搵你食飯啦
邊使自己一個食.」
若凝:「又唔係喎,
有時同啲唔啱傾嘅人一齊食都係唔好
同埋嗰班男仔好多都係狗公
唔係好鍾意 」
正常嘅,
若凝咁靚女,
一定分得出邊啲係狗公
佢依家肯同我食,
有兩個可能性,
一係就我唔係狗公,
另一樣就係,
我連做狗公嘅資格都冇
冇錯,
狗公都要有資格
我擺到明就唔夠班啦,
我:「你即係話我連做狗公嘅資格都冇啦
煩唔到你.」
若凝:「痴線邊度係
都唔知你個腦諗乜野
可以諗得咁負面,
嗌野食啦 」