[真人真事][校園][純愛]《婚宴上的重遇》: 第十四章

返到屋企自己喺度諗
世界有時真係好奇妙,
幾個月前,
我日日走去麥當勞
唔理熱唔熱氣,
會唔會爆瘡同埋生痱滋
都要照去食脆辣雞腿包餐
就算有時唔食,
我都特登兜去麥當勞嗰邊
然之後先返屋企,


其實為嘅只係見若凝一眼
之後曾經以為見唔返佢,
而喺幾個月之後,
竟然可以約佢一齊食晏晝
不單止讀埋同一間中學,
仲要坐喺隔離
呢啲係咪叫緣份
我唔知道,
亦都唔敢幻想太多
你知啦,


毒男最忌就係有自信
其實世界上所有野都係,
爬得愈高,
跌得就愈痛
希望愈大失望愈大就係咁解
如果我將一切幻想得咁美好,
到他日,
我知道個結果同想像中有出入嗰陣,
情緒一定會受到更加大嘅打擊
我唔係話對若凝冇信心,


我只係太清楚自己啲死人性格
所以唔敢奢想太多
男女朋友嗰啲野就算啦
況且我當初一見鍾情嗰陣,
係冇諗到咁深入,
老實講丫,
佢依家轉校,
同我做左同班同學
仲要坐我隔離,
我覺得已經賺左架喇
當日喺麥當勞見到佢嘅我,
係冇諗到之後我地會有咁嘅發展
有時做人唔好太過強求,
知足就夠喇
我唔係想曲線讚自己偉大,


嗰啲乜野喺佢身邊做守護天使,
呢啲咁高尚嘅野唔啱我做
我亦都冇呢個資格,
咁我都唔會有同佢拍拖,
驚影衰佢呢啲咁懦弱嘅諗法
我同當初一樣,
只要可以繼續欣賞到佢咁動人嘅面孔就夠喇
一切順其自然發展,
冇得逼架.

第二日返到學校,
唔使問啦,
若凝繼續成為風頭躉
好多男仔乘乘機機想撩佢傾計
但係若凝以往累積咁多經驗,


佢知道點樣應付架喇
講開又講,
若凝都表現出幾冷漠
但係各位巴打絲打知架啦,
狗公係唔會驚呢啲野
佢唔會因為女神唔理佢而放棄
反而會繼續積極進攻,
正正係佢地因為有呢種打不死嘅精神
所以先做到狗公
當然啦,
我都feel身邊都有唔少狗公嘅目光,
好似想同我講
做乜搶走我嘅女神咁樣
但其實我想講,
唔係我搶走佢呀


係佢唔睬你地咋嘛
關我q事咩
甚至當日都係佢坐落嚟
我係一早已經坐左喺度,
做班會又係,
係佢叫我入去陪佢一齊做
唔係我主動邀請幫佢
你班狗公真係是非不分
我:「若凝姐,
你睇下班男仔丫
嗰對眼好似想殺左我咁樣
好似話我搶左你咁樣呀
你唔好咁cool啦 」
若凝:「哦
你依家即係叫我同佢地玩啦 」


我:「都係架
快啲澄清都好
等佢地嘅目光可以友善啲 」
若凝:「唔鍾意就唔鍾意架啦,
你理得我啫呵呵 」
我:「試下調返轉
睇下你頂唔頂到嗰啲睥到你實一實嘅眼神 」
若凝:「唔·鍾·意·呀 」
佢講呢句嗰陣個樣又係屈機
搞到我都要投降,
我:「你好野 」
若凝:「仲使你講 」
或者若凝永遠唔會知,
其實當我聽到,
佢話唔想同班狗公玩嗰陣
我係好開心
但係唔知點解我唔想表露出嚟,
所以我只可以暗爽
無論佢係咪想攞我做擋箭牌,
想激死嗰班狗公,
話俾班狗公知:「我同條毒男玩都唔同你(地)玩呀 」
定真係覺得同我啱傾都好
我都覺得冇所謂,
都係嗰句,
其實已經係賺左
有時諗返起我真係好唔用,
對住若凝就乜尊嚴都冇晒,
而最慘嘅係,
我又樂於咁樣落去.