[真人真事][校園][純愛]《婚宴上的重遇》: 第十五章

若凝:「今日同尋日一樣一齊食晏丫 」
我嗰一刻真係受寵若驚呀
估唔到若凝會主動邀請我同佢食晏,
但就係因為我受寵若驚
所以嗰一刻嘅反應有啲遲緩
我:「哦……好呀 」
若凝:「其實我都係想趁食飯俾手信你啫
你知啦,
喺班上面派唔係咁好 」
我:「咁我都明嘅 」


若凝:「我都知你想同你班朋友食架喇
今日麻煩多你一陣啦 」
錯晒,錯晒呀
點會麻煩呢
其實我不知幾想同若凝食
我頭先個反應遲緩,
唔係因為唔想同若凝食
而係我太開心
一時之間反應唔切咋
最慘嘅係,


若凝以為我想陪班朋友食多啲
今次誤會晒
點算好呢,
最陰功嘅係,
我又冇咁好吉屎同佢講我好想同你食
呢下先慘丫嘛
唉算啦,
唯有婉轉啲講
我:「唔係嘅
同邊個食我冇乜所謂,


都係一餐啫 」
其實梗係唔係啦
同邊個食又點會冇所謂呢,
只係我嗰陣,
唔想俾佢知道我係想同佢食
又唔想佢誤會我唔想同佢食,
所以先咁講
各位巴打絲打明白的,
若凝:「真係
阻唔阻你架 」
我:「唔阻 」
若凝:「咁好啦
你呀,
唔好趁小息嗰陣行過嚟偷睇呀 」
我:「痴線點會 」


我心諗,
若凝又幾醒喎
咁都俾佢睇穿.

去到食飯嗰陣,
咁我又再一次同若凝食啦
唔少得嘅係,
我當然俾我嗰班豬朋狗友抽水啦
呀余:「狗公 」
我:「收皮啦 」
丁仔:「行哥係咪以後食飯唔使預你
不過我都明嘅 」
我:「你個樣好衰下喎 」
呀成:「這些機會不是屬於我的 」
我:「成哥你咁靚仔,


點會唔會屬於你呀 」
呀成:「仲難聽過粗口 」
呀余:「唔好唔打機就得啦
唔係嘅話冇人鬧 」
我:「明明最屎就係你 」
若凝聽到我地嘅對話,
全程都係笑笑口
不過我知道我呢班朋友,
狗口長不出象牙
所以都係拿拿臨同若凝走
若凝:「你班朋友真係好搞笑 」
我:「ok啦幾好玩嘅 」
若凝:「平時你地做咩多呀 」
唔通我同若凝講,
平時我地打機啦,


傾下av呀, tvb啲女明星
全部都係女
咁樣咩,
所以我最後都係講左第二樣
我:「打機同埋踢波囉
男仔嚟嚟去去都係嗰幾樣 」
若凝:「真係架
我都奇怪喇,
你成日食脆辣雞腿包,
有乜可能唔會變大肥仔先得架
原來有做運動 」
我:「關事嘅咩
唔係有啲人食極都唔肥嘅咩 」
若凝:「咁又係喎哈哈 」
我:「快啲行過去嗌野食啦


一陣冇位就好笑.」

入到去車仔麵檔嗰陣,
我同若凝叫完野食之後就坐喺度傾計啦
或者以前科技冇依家咁發達,
你知啦,
以前智能手機冇依家咁普及
唔係真係個個都有架嘛,
唔似得依家,
讀緊小學嗰啲都有一部生活態度
依家我有時見到隔離枱,
明明兩個人食飯,
但佢地各自玩緊自己嘅電話
咁我就唔明喇,
咁點解唔分開食呢
好在以前我同若凝一齊食飯嗰陣,
大家都冇智能手機
就係可能因為咁樣,
我地多數都會坐喺度傾計
咁我本身覺得兩個人食飯應該係咁樣嘅
唔傾計嘅話不如一個人食
入返正題先,
若凝:「真係唔麻煩你丫嘛
又要你陪我食 」
我:「點解你成個呀婆咁樣
都話唔麻煩 」
若凝:「我驚阻到你咋 」
我:「唔阻,
其實我班豬朋狗友幾開通
佢地冇乜所謂.」
若凝:「既然係咁,
不如以後一齊食 」
若凝咁主動嘅
我都估唔到
若凝:「唔好諗錯隔離呀
我只係覺得……我同你啲話題幾啱
所以先咁咋
不過你唔想我都冇乜所謂 」
我:「睇死你都係冇人同你食啦
咁我抵諗啲陪你囉 」
若凝:「唔想陪咪唔陪囉
唔使難為你喎行哥 」
我:「咁又唔好,
同你食係我嘅榮幸呀嘛
咁樣啱唔啱聽 」
若凝:「唔係喎
我同班女仔食都得
佢地都幾nice,
費事阻到你啦係咪先 」
我:「唔阻 」
弊傢伙一時口快快講左心底話
若凝:「咁我當你應承架啦
唔好反口呀,
當然啦有野做有另計啦
我唔係嗰啲不近人情嘅人 」
我:「唔會反口 」
但係我,
去到最後,
其實都只係一個空口講白話嘅人.