[真人真事][校園][純愛]《婚宴上的重遇》: 第十九章

之後我同佢傾多左陣無聊野就瞓覺
咁傾完準備offline嗰陣,
我就再去望下若凝嗰個頭像啦
唔知望完之後今晚發夢見唔見到佢呢
當然啦,
依家我發現係唔work
咁嗰陣我未試過丫嘛
咪諗住試下得唔得,
我再見到佢張icon,
即係上回講嘅佢企喺公園入面影嘅嗰張相


呀唔知係邊個幫佢影嘅呢
係朋友,屋企人,
定係男朋友呢
其實我好清楚,
呢啲野同我係冇關
不過成日都係咁樣,
總係會理埋啲同自己冇關嘅野
正當我諗緊邊個影嗰陣,
下一張相解答左我問題
相入面嘅有兩個人


一個唔使問就梗係若凝,
另一個係邊個
係一個男仔,
大家面貼面咁樣影
嗰個男仔幾四正嘅
正正常常斯文樣,
都幾高下,
好唔好人就唔知喇
我諗呢個應該係佢男朋友啦,
我就唔會呃自己,


話係嗰啲乜野表哥呀同堂大佬嗰啲
講出嚟都笑死人啦
睇完之後個心梗係有少少沉啦
你話冇就呃你,
自己女神已經名花有主
各位巴打應該好明白係咩心情啦
不過我又奇怪喇,
咁點解佢好似唔使拍拖嘅
去旅行又係同女仔frd去,
平時放學又唔急住拍拖
正常佢應該嗱嗱聲走,
去返佢原本嗰個學校搵佢個男朋友
因為我見到有一張相佢地著住校服影,
若凝之前嗰間學校話晒都係我嗰條村,
當然認得出嗰間學校嘅校服啦


佢地之前係同校,
跟住我就係佢個wall睇
俾我發現到啲野
見到佢大約四五月嗰陣出左一個帖,
內容大概係分手
咁成件事就變得合理,
如果唔係冇理由成日都咁得閒
至於點樣散就唔知喇,
現實上我都唔敢過問啦,
佢講起上嚟先講啦
始終我同佢依家又唔係真係咁熟.

夜晚自己一個喺度諗野,
覺得依家發生緊嘅野太理想
有啲唔真實,


當我仲係等緊放榜嗰陣,
我諗都冇諗過上到中六
我可以同麥當勞女神一齊食晏
之後仲可以拎埋佢個面書,
或者,
佢可能只係當我做兵
啱啱失戀,
就求其搵個男仔做水泡
不過都唔理得咁多架喇
有得陪住女神仲可以嫌棄咩
都唔到我嫌架啦,
同埋自己都知自己咩事
講外型,
若凝毫無疑問係女神級
我只係一條毒勁


點會妄想做佢男朋友丫
只要一路可以喺佢隔離就已經可以
睇嚟我已經中毒太深.

之後嗰幾日,
我同若凝放學都留低喺度做壁報
每日都黐啲野上去,
逐日都做啲唔使咁趕丫嘛
有一日我問若凝,
點解好似完全冇不滿
我:「你好似完全冇野咁嘅 」
若凝:「你想有乜野 」
我:「日日放學都留喺度喎
你唔燥底咩 」
若凝:「點解我要燥底呢 」


我:「阻住你啲私人時間囉 」
若凝:「冇所謂啦,
橫掂放左學都冇野做
咪當幫下手 」
我:「依家班pk擺明玩野,
又話呢樣又話嗰樣
所以唔得閒,
都唔知係咪真 」
若凝:「真又好假又好啦,
又唔係真係好難做 」
我:「若凝姐你真係好樂觀
服左你 」
若凝:「係你諗得衰啫
拿拿臨黐喇好肚餓呀
黐完去食野 」
我:「今次咁誠實嘅,
肯認自己肚餓喇咩 」
若凝:「你真係好煩
個腦專記埋呢啲無聊野 」
其實我想講,
只要係關於你嘅野,
一啲都唔無聊
就係因為咁重要,
我先至咁記得
而唔係因為我好記性.