[真人真事][校園][純愛]《婚宴上的重遇》: 第二十章

後嘅事都唔講太多
一嚟驚悶親你地
二嚟費事俾你地話我呃字數
總之嗰排我同若凝日日放學都係留喺度黐壁報,
有時黐完會食野
如果黐耐左就唔食,
反正一陣都食晚飯
好記得若凝有一次問我以下呢個問題
若凝:「傻仔有樣野想問你好耐 」
我:「問乜 」


若凝:「點解你成日呃你呀媽 」
我:「邊有成日呀痴線
又想老屈 」
若凝:「咁都唔係成日呀
次次我同你放學食野,
你都呃你呀媽
話你要同足球隊佢地傾戰術
順便食下午茶,
叫佢唔好煮飯 」
我:「費事同佢解釋咁多啦


又唔係話啲乜野好嚴重嘅大話 」
若凝:「照直講唔得咩 」
我:「唔係唔得,
不過佢一定問我同邊個食
到時我咪話我同呀成佢地食,
其實一樣都係講大話架咋 」
若凝:「我好失禮你咩 」
我:「咁又唔係喎
不過你知啦,
啲呀媽一聽到自己個仔係同女仔食野,


就會有好多幻想架啦
我諗你都唔想佢煩住你丫
如果佢唔信仲大鑊,
就會話我肯定唔知去邊度玩
擺個女仔上枱扮食野遲返,
其實走去左第二度.」
若凝:「咁你咪成日呃你呀媽 」
我:「錯喇大小姐,
喺呢啲野先會呃
其他都好少 」
若凝:「嘻嘻傻仔,
都唔知話你奇怪好定係咩好 」
我:「你唔知咁多架喇 」
點解我咁記得呢條問題
去到結尾我會講,


因為呢樣野原來都幾重要
至於我之前講,
若凝分手嗰單野,
雖然我好想知,
但係我都冇問到,
佢冇講開就費事問啦

去到大約九月尾,
我地終於整完個壁報
尋晚若凝喺面書嗰度已經問定我,
今晚出唔出嚟食飯
咁大家都知,
我係唔會拒絕架啦
咁既然若凝佢係尋晚問定我,
我都唔識講大話啦


直接同阿媽講今晚唔返嚟食
若凝:「行囉 」
我:「你想今晚去邊食呀 」
若凝:「唔知呀到時先算 」
我:「近近地定出去食 」
若凝:「近近地啦,
費事行咁遠 」
我:「懶 」
若凝:「唔好俾我批死,
其實你都係想近近地食 」
我嗰下真係O左
因為真係俾佢批中
若凝:「冇野講呢
行啦.」
好彩嗰陣都算係夜,


五點幾六點左右
好多同學都走晒,
應該見唔到我同若凝一齊走順便食埋夜晚嗰餐
呢啲野都係唔好俾人知好過
一定俾人抽到暈,
以前我小學戇居居,
同一個女仔幾friend,
咁大家都知咁樣一定會俾人傳緋聞
之後個女仔應該係為左避嫌
就直情唔同我傾計
諗番起個心都乸住乸住
不過可能嗰陣仲細啫,
嗰個細路女唔識諗
依家若凝應該唔會好似嗰個細路女咁樣
不過俾人知都係唔好啦


你知啦,
若凝身邊咁多狗公,
但係若凝又唔理佢地
如果班狗公知道我同若凝成日一齊食野,
實俾人溶左都似
咁我地去到商場就行一陣先食飯
若凝佢問我有咩想睇,
咁我就話冇所謂
反正我都係睇住若凝架啦
當然我呢一句梗係冇同佢講,
之後若凝就去左睇衫,
唔知大家有冇呢個感覺,
就係鍾意睇住啲女仔揀衫
利申我唔係變態
而係我覺得睇住自己鍾意嘅女仔去揀衫係一樣好特別嘅野
你大約可以知道佢鍾意乜野
例如乜野顏色,
乜野類型嘅衫,
鍾意咩風格等等等等
而呢啲野平時係唔會知,
當然唔少得會ff啦
我好記得我嗰陣喺佢隔離,
自己ff上腦,
若凝同我好似又比之前親近左喇喎
唔係好多男仔可以咁樣架咋
但係冷靜過後,
其實我根本就唔知若凝之前有冇同人試過咁樣做
可能若凝只係覺得係一樣好平常嘅野,
又可能佢之前同ex已經試過好多次
甚至或者只係當我係佢個ex咁陪住佢
有時真係好憎自己咁理性,
想發多一陣夢都唔得.