[真人真事][校園][純愛]《婚宴上的重遇》: 第四十五章

返到屋企我沖完涼嗰陣
頭髮仲未乾,
咁我就坐喺度發夢
話說我周不時都係咁樣
成日坐喺度自己諗野
咁我嗰下究竟諗緊乜野呢
其實都係一啲你地會覺得好無聊嘅野
當然啦,
我自己就覺得唔無聊
鬼咩


嗰啲野全部都係關於若凝,
咁試問我又點會覺得無聊
我喺度諗,
其實真係好好運氣
首先,
喺麥當勞嗰度見到一個自己覺得好靚嘅女仔
跟住仲鍾意埋佢
咁樣已經係好荒謬
雖然我都知毒男係易動情
但你話點解嗰陣我會鍾意一個自己都唔識嘅女仔,


我都唔可以好宏觀咁樣答你
最好笑嘅係自己從來都唔會行動
之後唔見左佢,
嗰陣我好慌失失
因為見唔到自己鍾意嘅人
老實講,
我做唔到嗰啲只要佢開心就得啦嘅人
我成日都覺得,
鍾意一個人就梗係想望住佢
去到後來佢好出奇咁樣成為左我同學


大家仲要係鄰座,
然之後我地慢慢咁樣熟落
以前喺麥當勞望住佢嗰陣,
其實我淨係想知佢叫咩名,
但係依家,
我唔止知佢叫咩名
仲知多左關於佢嘅野
原來佢係獨生女,
原來佢同我住得好近,
原來佢係處女座,
原來佢鍾意食朱古力,
原來佢有一個好姊妹,
原來佢上年平安夜係第一次拍拖,
但係半年之後就分手,
冇錯


老實講其實我聽到佢話拍過拖嗰陣,
個心都係有一下停左一停
其實唔關我事
嗰啲係我同佢認識之前嘅事,
我又唔係佢邊個
點會輪到我去理
但我就係專做埋呢啲唔等使嘅野
聽到之後都仲係會有情緒嘅起伏
但我又唔想表達出嚟,
所以有時喺若凝面前,
我都好似要顧慮好多野
或者真係愈怕失去就愈小心,
至於拍拖
我唔會諗喇,
我覺得若凝對住佢前男朋友仲有少少餘情未了


雖然佢講話冇啫,
但我估其實佢只係逃避緊
最重要嘅係,
我從來都唔覺可以贏取佢嘅芳心
呢個先係重點,
就等我一路用朋友嘅身份,
至少同佢過埋中學嘅生活啦
或者將來我會後悔,
點解以前唔進取啲
點解淨係想做好朋友
太多太多嘅點解,
但係我怕後悔之餘,
更加怕眼前嘅野會出現一啲我唔想出現嘅情況
今年嘅聖誕節好難忘
真係好難忘.



聖誕之後就係除夕
之前都講左,
若凝除夕會同佢班女仔frd過
我之前都探過口風,
問佢係咪會有男仔一齊
佢話冇
有時真係好想恥笑自己
又話淨係想做朋友,
但係成日都做多左啲無謂野
我自己都覺自己好矛盾
至於我除夕會點樣過
仲使問
梗係成班小毒毒喺屋企打機啦
出到去,


又要同人逼
又怕俾人囇死
唔通自取其辱咩
所以就成班約左喺電腦面前約戰
講開又講,
大個左好少再喺除夕夜呢啲大節日一齊打機
做野嘅做野
陪女嘅陪女
我地成班豬朋狗友,
亦都由玩電腦,
轉移到玩PS4
時代真係唔同左
就喺我除夕夜嗰晚,
打打下機嗰陣,
突然之間我電話響
咁我就聽啦
我嗰陣望都冇望個名,
因為仲打緊機
之後一聽,
若凝:「新年快樂呀 」
點解我會知係佢
同佢傾過咁多次計,
咁都唔知就可以食屎
咁之後我知係佢,
我就拿拿臨出左房傾
因為如果我喺房傾,
實俾班pk仔抽水
再加上成家都出左去,
咁我梗係出房傾啦
我:「新年快樂呀 」
若凝:「做緊咩呀 」
我:「打緊機囉 」
若凝:「冇出去玩 」
我:「冇,
成班毒男出去咪盞俾人笑 」
若凝:「咁講自己呀 」
我:「你又去左邊玩 」
若凝:「銅鑼灣嗰邊囉
你睇我對你幾好,
電話冇電我都問第二個借電話
就係特登同你講生日快樂 」
我:「生日快樂 」
若凝:「新年快樂先啱哈哈
唓,
你都係一月生日啦
講定先唔得咩 」
我:「係喇最叻你啦
真係好偉大,
特登問人借電話同我講新年快樂 」
若凝:「有冇回報先 」
我:「第日先答你
唔阻你喇 」
若凝:「咁好啦拜拜 」
老實講,
我嗰下真係好開心
特登問人借電話同我講新年快樂,
呢個係其中一個原因
另一個就係,
佢記得我幾日生日
雖然可能佢只係誤打誤撞咁樣撞中左
但係嗰一刻我真係冇可能咁理智
以前就係咁,
小小野就已經可以好開心,
反而大個左就唔係咁易滿足,
係我自己問題,
定其實係對象問題呢?