[真人真事][校園][純愛]《婚宴上的重遇》: 第四十六章

咁樣已經去到2009年
唔知大家仲記唔記得,
小弟係喺一月生日
正日係一月十四
老實講丫,
當自己慢慢長大,
對生日嗰個期待就愈嚟愈細
我仲好記得以前
一過左一月之後,
我就係咁數住仲有幾多日就生日


每過一日我就會愈開心
但係大左一歲之後,
又要等多年先生日,
嗰下會突然之間好沉
當然啦,
大個左就已經麻木左
生日唔生日,
都已經冇乜感覺
依家出到嚟社會就更加唔使講啦
有時真係忙到連自己生日都唔記得左


到屋企人夜晚喺度煮紅雞蛋嗰陣,
我先醒起自己今日生日
所以話人真係會變,
細細個咁重視嘅野,
當你大個左之後,
個心態就會調整
又有幾多人,
真係可以從一而終呢
老實講我好羨慕呢啲人,
起碼佢地個信念夠強


只有信念強先可以喺香港堅持到自己,
我就好明顯唔得啦.

老實講,
今年唔係冇生日願望
講真丫,
一個人又點會冇生日願望
問題係你想唔想講啫
可能現實唔敢同人講
驚俾人笑
又或者驚實現唔到
所以就冇講出口
我咁樣講得,
即係我都有生日願望啦
同埋今年係我18歲生日


啲人成日都話,
18歲係一個分水嶺
過左十八歲,
好多野都會唔同
久而久之,
我呢個傻仔因為受人地薰陶
就覺得18歲生日好重要
講左咁耐,
咁究竟我個願望係咩呢
其實好簡單,
我好希望嗰日可以同若凝食lunch
因為我冇記錯嘅話,
嗰日係要返學
星期一嚟,
可以嘅話,


我想聽到佢同我講生日快樂添
但係我好明白,
做人係要知足
如果到時有得一齊食lunch已經好好
唔會再祈求其他野,
何況你估若凝係我呢啲小毒毒咩
點會咁無聊記得其他人生日
我就話記得佢啫
因為我鍾意佢,
所以盡量會了解晒佢所有野
但係我覺得佢唔會記得我生日
言下之意你明啦,
我都唔想講到咁白,
當然事後我先知,
原來面書係會提醒


不過呢啲都係後話.

去到我生日之前嗰晚
亦即係星期日晚
嗰一晚唔知點解,
我好想等到十二點鐘之後先瞓
然之後自己同自己講生日快樂
正式踏入十八歲,
邁向成人嘅腳步
細細個聽人講,
十八歲就乜都得架喇,
去到今日仲有個幾鐘
呢件由細講到大嘅事
終於會實現
但總係冇以前細個嗰陣諗嘅感覺


原來唔係真係好興奮
但你都唔好話唔慘,
自己諗住自己係第一個同自己講生日快樂嘅人
我班豬朋狗友就唔會做呢啲野架喇
又或者男人唔會做呢啲野
可能會覺得好肉麻啦,
唔係好啱我地嘅作風
你知男仔真係唔同女仔,
若凝都未必會啦
可能已經一早瞓覺
以我所知,
佢本身都唔係夜瞓嗰啲人嚟,
如果佢冇講大話呃我嘅話
屋企其他人又已經瞓晒覺,
基本上嗰一刻,
真係好平靜,
得我一個自己戇居居咁樣坐喺電腦面前
等緊個時鐘顯示為,
00:00,
14/01/2009,
的確係靜得好交關
但係啲人成日講,
暴風雨嘅前夕總係平靜
似乎真係冇講錯.