[真人真事][校園][純愛]《婚宴上的重遇》: 第四十八章

結果嗰一日,
我為左唔想留堂
所以決定小息就留左喺班房罰抄
鬼叫嗰條教畜話抄唔晒放學唔準走
咁梗係嚇到我標尿
自己諗諗嚇都覺得自己折墮
堂堂十八歲牛一,
竟然淪落到喺度罰抄
我諗我都算係第一個
早知就自己忍口啦




咁抄抄下就見到嗰班賤人喺我班房門口叫我
仲喺度幸災樂禍
呢啲就係朋友喇
呀余:「咁慘呀 」
我:「收皮啦你地 」
丁仔:「唔關我事呀
呀成最大力 」
呀成:「痴線明明就唔係我
擺明係呀余啦 」
呀余:「唔係我呀 」




丁仔:「唔係我呀 」
呀成:「都唔係我呀 」
我:「你地真係pk嚟
明明我今日牛一,
都仲要整鑊咁嘅野俾我嘆 」
丁仔:「咁先夠難忘 」
呀余:「唔係咩叫十八歲生日 」
我:「你兩條契弟夠喇 」
呀成:「咪就係囉,
叫左佢地唔好玩,




依家搞到壽星公喇 」
我:「聽講你都好似有份 」
呀余:「好咩似
直情有份 」
丁仔:「係呀係呀 」
我:「唔講住喇
我再唔抄嘅話今日要留堂 」
之後我就返左去繼續罰抄.

點知好景不常
小息真係抄唔晒
咁我點算呀
咪唯有用埋lunch time去抄囉
抄完先食
鬼叫我要抄咁多句咩




又唔係神速手
係慢啲架啦
咁lunch time嘅鐘聲響起左,
我就二話不說繼續抄
呀成佢地搵我食飯都冇去
寧願慳返啲時間
同埋我覺得同佢地出去嘅話,
我一定會掛住同佢地傾計
咁就抄唔到啦
我本身對跛手又唔係好靈活嗰啲
我知有啲人可以上堂罰抄但又唔會俾人捉到
我就好明顯唔係啦
所以我一定要趁食飯嗰陣抄完
咁個個出晒去嗰陣,
我就拎我張罰抄紙出嚟繼續抄




點知我呢個舉動俾人見到
仲有邊個啫,
咪坐我隔離嗰個
若凝:「你唔食飯 」
我:「抄埋先
依家得閒死唔得閒病,
仲話食野 」
若凝:「亂講野嘅後果 」
我:「唔使再潤我喇
我已經好慘,
出少句聲冇人話你啞 」
若凝:「咁你加油囉 」
我:「呢啲就似返個人講 」
咁當然啦,
唔通若凝佢講一講我就會快咩




唔關事架嘛,
所以我搏命喺度抄
最慘係隻手攰
但又唔可以停喎,
大家都知架啦,
罰抄嗰陣最難捱嘅係心理
成日會凝住仲有幾多幾多未抄
呢下先難頂
聽落去好似好多咁樣,
本身隻手已經攰架啦
簡直係疲勞轟炸
所以之後我索性唔諗,
全部都唔經大腦,
剩係喺度抄
邊個叫我完全聽唔到,




有邊個入嚟班房我亦完全唔知
一味就係抄
咁當我就嚟抄完嗰陣,
忽然之間我張枱上面出現左一個三文治
同埋一包朱古力奶
咁我無啦啦嚇左一嚇,
因為我係喺無神狀態之下抄,
突然間有外來嘅野影響到我梗係會嚇一嚇
若凝:「仲未抄完呀 」
我:「嚇死你咩行路冇聲 」
若凝:「唔好話你太投入 」
駁唔到
若凝:「食野啦 」
我:「食咩呀 」
若凝:「枱面嗰啲呀 」
我:「多謝夾承惠喇
仲有啲未抄 」
若凝:「特登買俾你架
知你條友手腳慢
一定未抄完兼未食野 」
我:「唔使喇 」
若凝:「仲有幾多呀 」
我:「廿句囉 」
若凝:「廿句咋嘛,
輕鬆啦我幫你 」
我:「唔係掛 」
我即刻變左個樹熊樣
若凝:「你有所不知喇,
其實我冒人筆跡係好似
等你睇下啦,
你快啲同我食左佢 」
我:「咁好死 」
若凝:「見你今日生日咋
平時睬你都傻
攞嚟啦 」
之後佢就真係幫我抄
咁我都唔好意思嘅,
所以我都拿拿臨食
務求可以盡快俾我自己抄返
喺度可以講下,
原來若凝真係好勁
佢扮我寫字扮得超似
如果你成張紙密麻麻嘅話,
真係會睇唔出
我:「俾返我啦 」
若凝:「咁快嘅 」
我:「肚餓嘛 」
其實嗰陣我係想講:「唔想你咁辛苦.」
但係我又邊度講得出口
若凝:「話左你啦 」
最後終於可以順利抄完
仲有十分鐘先完lunch time,
可以抖下
點知呢個時候班契弟又嚟
丁仔:「三文治好唔好味呀 」
我:「點解你會知架 」
呀成:「朱奶好唔好飮 」
我:「你地究竟喺出面偷睇左幾耐
係咪變態架
竟然喺度玩偷睇,
仲要唔係偷睇裙底 」
呀余:「行哥你就威水啦
人罰抄你罰抄,
你可以搵人代筆嘅 」
呀成:「可唔可以教下我 」
雖然俾佢地咁樣抽水,
但其實喺我心底入面,
的確係有少少暗爽
起碼俾人知道,
我同自己鍾意嘅女仔,
係有其他人覺得我同佢係有野,
人從來都係好注重周圍嘅目光
當然我自己知道係咩事,
但係起碼可以俾我ff多一陣,
咁樣已經好夠.