[真人真事][校園][純愛]《婚宴上的重遇》: 第五十一章

講完生日就講班際足球
中學生活點都會有班際比 ,
特別係高中,
因為可以屈低年級機
係咁架啦
當年我地都係咁樣俾人屈
風水輪流轉到我地屈返人
由於我地學校嘅中七學生係唔會參加比賽
年年都係咁
所以身為中六嘅我地,


係全個班際足球裏面最大年紀嘅級別
而且因為唔多人參加
所以冇分高年級同低年級
亦即係話,
中一要同中六踢波
如果抽籤抽得中的話,
咁你明白屈低年級機係點解啦
講開又講,
因為中七唔會玩班際
所以今年就係最後一年


我自己就唔係運動健將
乜q都識
籃球羽毛球排球手球唔好預我
唯獨踢波叫做見得下人
當然都係唔叻架啦
不過喺學校夠用咁解
玩得班際,
咁樣梗係想贏啦
其中一個原因,
梗係想喺班女面前威水啦


唔係講笑我覺得真係好型
運動會就冇我份啦
之前班際籃球又冇我份啦
睇住出去打嗰班狗公,
一聽到啲女喺度叫,打氣,
成個狗公樣都出晒嚟
好似唔贏唔得咁樣
其實我都係葡萄人
我都好想咁樣
當然啦,
我都好想喺若凝面前威一次
有邊個毒男,
係唔想喺自己女神面前認叻
話唔想嗰個都係呃你,
如果再ff多啲嘅話,


咁梗係想好似嗰啲動漫咁樣,
若凝遞枝水俾我飲啦
講下幾句加油咁樣
不過我就咁諗都好尷尬
同埋最忌就係有自信
所以諗諗下都係平常心
同埋仲有一點,
小弟讀左咁多年書,
其實係未試過拎獎牌
上年班際足球梗頸四,
運動會就唔好講啦
一次都冇玩過,
因為玩嚟都輸梗
小學反而有玩,
不過都係冇獎牌


唔知上到大學仲有冇比賽
又或者可能根本就讀唔到大學
今年好可能係最後一年喇
我真係好想拎返塊金牌
或者有時我真係要求好高,
我自己到今時今日都唔明,
點解以前讀書嘅自己,
咁鐘意金牌
平時可能冇乜所謂,
但係當自己面對有堅持嘅野,
就一定要做第一
第二第三都唔好,
依家諗返起,
嗰陣自己都唔知為乜野咁固執.



既然係最後一年,
咁我地梗係好勤力咁樣練波啦
都最後一年喇
盡地一煲啦
同埋我地有一樣野好,
就係可以喺學校練波
因為我地學校平時個操場,
係俾籃球隊專用
除左上pe堂之外,
唔准喺操場踢波
但係喺嗰排,
籃球隊特登卜左校外嘅體育館球場練波
咁我地就可以用操場練波
你知啦,
出到去街場練波,


又要跟隊又要盛
個球場又唔係得自己用
係冇學校咁方便
就算要我地同其他班分半個場都冇問題
因為本來我地應該連半個場都冇,
依家有半個場已經執到喇
由於我地有份踢班際足球嗰班人決定左,
放學之後直接喺學校練波
所以就成班帶左波衫波鞋返去,
好明顯我都唔例外
咁又係嘅,
冇理由先返屋企換衫再返去學校
有得帶波衫波鞋返學校梗係帶返去,
咁我好記得小息嗰陣,
若凝無啦啦問我可唔可以借對波鞋俾佢睇
咁我梗係冇所謂啦
不過好奇怪點解佢咁做啫
當時我又諗唔到點解喎
若凝:「好似好殘舊喎
著左幾耐 」
我:「著左三年喇
我見仲著到咪繼續著 」
若凝:「你嗰日唔係見到你心水嗰對波砵咩 」
我:「之前我想買嗰陣都未出
依家呢對鞋雖然舊,
不過著到咪著囉
著到爛先轉啦 」
若凝:「咁慳家 」
我:「似你咁有錢咩 」
若凝:「實係咁啦
睇完對鞋喇俾返你 」
我:「無啦啦做乜拎嚟睇 」
若凝:「遲啲你咪知囉 」