[真人真事][校園][純愛]《婚宴上的重遇》: 第五十四章

咁之後我地都好順利贏埋落去
八強,四強都冇問題
一如預期咁樣進入決賽
繼續邁向我嘅目標進發
講開又講丫
嗰陣我真係覺得自己好有機會可以開齋
我之前已經講過,
做左咁耐學生,
一塊金牌都未拎過
如果今次真係零的突破,


兼且可以做威水
真係稱得上人生最風光嘅時刻
我次次喺學校踢波嗰陣
每一次都係留意喺場邊嘅若凝
我好想喺佢面前證明自己唔係乜都唔識
起碼到佢日後回想起我呢條友嗰陣,
唔係一個一無是處嘅人
至少有啲野係見得下人
雖然我知道自己嘅技術,
根本就唔係好勁


但如果要應付學校嘅水平,
咁應該係綽綽有餘
每次踢完之後,
我最期待就係若凝行過嚟同我講踢得幾好
同埋俾支野我飮
小毒毒就係專重視埋呢啲死人野
其他人根本唔會記住,
又或者,
可能若凝覺得班際比賽係好少事
唔係話特別緊張,


而我只係單純咁樣滿足自己
當係一個動力去俾我認真咁踢波
各位巴打知啦,
自己鍾意嘅女仔,
的確係可以俾到你好大嘅影響力
我相信個個都會有共鳴
當仲係青春時期嘅你,
無論係外在嘅行為,
抑或係內在嘅情緒,
其實係會俾自己鍾意嘅女仔主宰仲多過你自己
你可能會為左佢做一啲你平時唔會做嘅事
情緒會因為佢而有起伏,
咁當然啦,
呢啲係有好有唔好
但係都你大個回味嗰陣,


其實會好慶幸當中有呢個女仔出現,
如果冇左嘅話,
讀書時代未必會咁開心
我就係其中一個例子.

踢完四強之後
決賽就會同我之前講過好勁嗰隊中五踢
而咁啱踢決賽嗰日
就係放新年假之前最後嘅上課日
不過,
世事有點會咁順利
總係會出現啲變化,
咁依家諗返起,
梗係輸自己傻仔啦
鬼叫我嗰陣自己嘅處理手法咁差


咁究竟係發生咩事呢
話說喺決賽前嗰一日,
若凝知道我唔使練波
所以佢就問我去唔去放學之後嘅一個活動,
嗰個活動係自由出席
但係嗰條件係要兩個人去
同埋一定要男同女
我冇記錯嘅話應該係關於煮野食
話咩一男一女一組會比起兩個女仔一組會安全啲
因為若凝話好想試下整蛋糕
就問我去唔去
咁既然我嗰日唔使練波,
我咪話去囉
當然大家都知我嘅目標唔係整蛋糕啦,
嗰陣我已經幻想緊我同若凝一齊整蛋糕嘅場面


正當以為一切好順利嗰陣,
就出現左一個變數
話說喺嗰日嘅晏晝,
我呀媽無啦啦打俾我
話佢叫左我表妹過嚟
喺度講下先,
我同呢個表妹幾frd
即係十幾歲都仲係keep到關係嗰度
可能佢只係細我一年
大家啱傾少少,
所以大家幾frd
老實講個樣幾靚
我有一次同佢出街,
有條友竟然喺我面前抄佢牌
咁你話我嘅殺傷力有幾低


跟住我表妹話原來成日都係咁,
咁都正常嘅
因為真係幾吸引
不過可能由細玩到大冇乜感覺,
講返正題先
咁我就同我呀媽講,
話我放學有個講座喎,
行唔開,
點知原來佢今日要覆診
嗰陣仲排緊隊
冇六點都走唔到
咁我冇計啦,
咪話ok冇問題囉
之後佢叫左我表妹四點幾過嚟我學校等
原本諗到好多我同若凝一齊整蛋糕嘅畫面,
喺度ff緊架嘛
依家乜都冇喇
咁我上返去,
我就同若凝講:「今日臨時要練波呀
陪唔到你去 」
若凝:「唔緊要呀,
你地聽日踢決賽要練都應該嘅 」
老實講丫,
有邊個想講大話架
仲要對住自己鍾意嘅女仔講,
喺度呃佢,
邊有可能係完全冇野
有得揀嘅話又點會想講大話,
但係我見到佢特登問我去唔去嗰個活動個樣,
就知佢真係好想去
第一,
佢好少主動參與呢啲活動
第二,
佢好少會主動問我去唔去
基本上每一次佢主動問得,
就已經睇得出佢好有興趣
而喺嗰陣,
我為左令佢容易啲去接受我今日去唔到個活動,
所以就求其用練波嚟做藉口
咁樣佢應該會明白掛
但係原來咁樣只會令到自己捉蟲,
或者,
我唔明白講大話個殺傷力有幾大.