[真人真事][校園][純愛]《婚宴上的重遇》: 第五十五章

當放學嘅鐘聲響起
全部人就執書包啦
但我嗰陣就未走住,
就連若凝都問我點解唔執書包
若凝:「仲唔執嘅
你班隊友都執喇喎 」
我:「我等埋呀成佢地
佢地幾個今日都踢 」
若凝:「喺學校練 」
我:「唔係呀普通街場


學校唔俾講粗口同埋大聲叫
冇乜癮 」
若凝:「正常丫上堂地方 」
我:「所以咪出去踢囉 」
若凝:「哦,
加油喇傻仔
聽日贏個冠軍返嚟呀 」
我:「少擔心
贏梗 」
若凝:「聽住先啦


拜拜 」
我:「你依家去整蛋糕 」
若凝:「唔去啦
我返屋企呀 」
我:「咁好啦拜拜 」
其實邊有練波呀
都係比賽前一日,
都唔會有咩成果
反而仲可能會令自己更加攰
倒不如養精蓄銳咪仲好


咁點解我唔走住先呢
其實我係要等若凝走左我先走,
大家都知我係呃緊佢
如果我陣間走嗰陣同佢一齊
咁樣個大話實穿煲啦
所以我要特登等佢走先
亦都問埋佢今日去唔去嗰個活動
佢話唔去直接返屋企,
咁就得喇
喺佢走左嗰三個字之後,
我就執埋書包
去廁所打俾我表妹
睇下佢去到邊度
我:「依家喺邊 」
表妹:「我用訪客身份入左嚟你學校呀 」


我:「點解你會入到嚟 」
表妹:「有個校工見到我喺出面
就問我做乜野
咁我咪如實講囉,
之後佢就叫我入去校務處等你 」
我:「咁點解校務處又冇叫我落嚟呢 」
表妹:「我叫佢唔好煩住你丫嘛
係咪好識做呢 」
我:「至叻係你 」
表妹:「咁你依家喺邊度啫 」
我:「落緊嚟喇等多一陣 」
表妹:「行快啲啦死人頭
等左你成半個鐘 」
我:「係咁啦 」
我心諗,


你條友仲好意思鬧我死人頭
就係你阻住左我同若凝整蛋糕.

咁我落到去,
好快就見到佢表妹坐左喺度
然之後梗係拿拿臨走,
我本身唔係好鍾意帶住個親戚
喺學校周圍行
同埋俾人見到我有呢個表妹好麻煩
我估計到時我一定會係咁俾人煩
問我拎我表妹個電話,社交網站等等
同埋唔知我表妹會唔會亂講野
呢條友極其貪玩
以免佢亂嚟
一定係拿拿臨走


表妹:「xx行(我全名)帶我周圍行下啦 」
我:「唔好喇
學校冇野好行 」
表妹:「小氣鬼 」
我:「痴線無啦啦話人小氣鬼 」
表妹:「你驚我亂咁講野咋嘛 」
我:「邊度係呢 」
我心諗你條pk心水又幾清
之後佢捉住我隻手行
好彩最後都係我大力
格硬拉返佢出去學校門口
我:「你唔夠我大力呀妹妹仔 」
講完之後仲搣一搣佢面珠登
我地細細個都已經係咁玩
所以唔存在話有乜野曖昧因素喺度


可能行嗰啲人會覺得我地係情侶,
但其實只係我地太frd啫
表妹:「又搣我
咬返你先 」
我:「唔好唔好
我認輸 」
點知佢條友已經咬左落嚟
真係賤格
佢條友成日都係咁
每次我搣佢佢就咬我
我:「唔使咁大力呀 」
表妹:「鬼叫你搣我先
少年,
下次唔好亂咁搣人呀 」
我:「得啦變態
行返去屋企啦.」
正當我同我表妹準備返屋企嗰陣,
我調轉頭望到若凝企左喺度
我同佢四目交投
佢望落去好嬲,
我未見過佢呢個樣.