[真人真事][校園][純愛]《婚宴上的重遇》: 第六十二章

之後我嗰晚一返到屋企,
就即刻上床瞓覺
因為本身都眼瞓
不過瞓得唔係幾好
自己成日凝住好似瞓得太晏
咁就唔可以陪若凝去醫院
結果成晚就不停醒
最後瞓到九點幾就醒左
一醒左刷完牙洗完面,
我就打左俾若凝


我:「醒左喇 」
若凝:「咁早 」
我:「咁你又咁早 」
若凝:「我煲粥俾媽咪丫嘛
你上嚟我屋企啦 」
我:「哦 」
估唔到佢識煲粥
等我下次整病自己
乘機食若凝煲嘅粥先
唔係喎,


佢陣間唔煲俾我咪食屎
我又唔係佢邊個
都係唔化算
之後我就上左屋企
佢開門俾我,
若凝:「咁快過嚟
冇食野咩 」
我:「冇呀
飲左罐咖啡就過嚟 」
若凝:「會唔會肚餓


雖然你話過朝早食唔到太多野 」
我估唔到佢記得
我嗰下個反應都有啲意外
冇諗過佢會記得,
我:「應該冇事嘅 」
若凝:「仲有少少粥食唔食
講明先唔一定好食
同埋本身係煲俾我媽咪
所以味道好淡.」
我:「好呀唔該 」
估唔到我真係有機會食若凝煲嘅粥
頭先我ff嘅野變左真實
咁之後我就食啦,
老實講丫,
白粥碗碗都差唔多架啦


邊有話好食唔好食
但係大家都知,
人地煲嘅野,
你免費就有得食,
咁樣梗係打死都話好食啦
正常社交
我:「幾好食喎 」
若凝:「下
白粥嗰個整都差唔多架啦,
你又吹水啦 」
我:「唔係,
今次真係好食
食成世都抵 」
若凝:「低b 」
其實我講真


如果日日都係佢煲,
我諗我真係可以食成世
當然佢會以為我係講大話啦,
或者係想氹佢啦
我唔否認當時我有呢個諗法,
但係唔代表我講嘅野係假
我:「點解你會識煲粥 」
若凝:「我同你講過啦
有時daddy媽咪好忙,
唔係成日可以食住家飯
出去食又要洗錢
咁咪間唔中喺屋企煮囉
食粥又方便
又易洗碗,
有時唔舒服嗰陣,


都可以自己煲俾自己食丫嘛 」
我:「犀利喎 」
若凝:「唔好串我啦
知你行哥巴閉 」
我:「講真呀
你知唔知對於一個淨係識整杯麵嘅人嚟講
你係好犀利 」
若凝:「咁係你問題喎
唔係我犀利 」
我:「唔好串我啦若凝姐 」
若凝:「快啲食啦
凍喇 」
食完之後,
我就陪佢出發去醫院,
嗰陣係我第一次覺得,


白粥都可以好好食.

喺搭巴士嘅途中,
我先至諗起有個關鍵問題
我:「點解你煲粥俾伯母嘅 」
若凝:「因為佢醒返囉 」
我:「幾時嘅事 」
若凝:「今朝嘅事,
daddy打俾我話媽咪已經醒返 」
我:「咁咪好囉 」
若凝:「係呀,
不過未見到個人,
始終都係有少少擔心 」
我:「冇事嘅
你老豆成晚冇返屋企留喺醫院 」
若凝:「係呀 」
我:「犀利
真男人 」
若凝:「冇錯
其實我估佢應該好攰,
佢係返返下工趕過嚟,
咁多個鍾都冇瞓過
精神狀態一定好麻麻.」
我:「咁即係你老豆好鍾意你媽咪囉 」
若凝:「嗯 」
我嗰下真係由心而發咁講,
真心覺得若凝爸爸係好勁
換轉係我可能真係做唔到
有啲野睇就易,
做就好難
之後去到醫院,
我:「你入去啦
我費事阻住你地共聚天倫 」
若凝:「下,
一場嚟到唔入去呀 」
我:「唔使喇
你幫我問候得啦
我估你地一家人依家應該好想見到大家,
我喺度咪阻住晒 」
若凝:「唔好意思呀好似搵左你笨咁 」
我:「係架 」
冇計啦鬼叫係你咩,
呢句我冇講出口
若凝:「遲啲請返你食飯 」
我:「得喇你入去啦 」
若凝:「咁好啦拜拜 」
我成功完成身為過客嘅任務,
咁就已經好足夠.