之後我返到屋企,
就忍唔住喊左出嚟
老實講,
我地啱啱先咁樣面對面嘈完嚟,
星期一都唔知點樣面對佢
大佬仲要坐隔離
依家我地搞到咁,
關係已經破裂左,
正常如我所願應該開心丫
點解仲會有咁嘅情緒


明明我已經一早話放低佢,
係咪嗰陣我決心唔夠
或者嗰陣太細個又好,
太戇居都好,
是但一樣啦
我就係咁同自己講,
真係已經完左喇,
唔好再有無謂嘅憧憬,
我已經唔鍾意佢
不斷咁樣提自己


當然我都係去到後來先知,
係咁提住自己唔鍾意佢,
其實咪即係仲鍾意
唔鍾意嘅話使乜提
當時嘅我,
只係喺度自欺欺人
正常計,
有啲人下定決心,
忘記一個人嗰陣,
係會剷除埋佢嘅facebook


甚至係其他嘅野,
費事睹物思人啦
但係我嗰陣,
一啲都冇呢個諗法,
嗰陣我自己應該知點解唔剷除,
不過我冇同自己講,
又或者係刻意唔諗點解
甚至乎佢送俾我嗰個護符,
我仍然扣返喺銀包嗰度
一啲都冇諗過唔要,
我好知道,
一扔左呢個,
以後就搵唔返同等價值嘅野,
若凝未必會再送野俾我,
而且個護符亦都係佢第一次送俾我,


一生只有第一次,
就算搵到第二個一樣嘅護符,
都已經唔係嗰個
事後諗返起,
雖然我嗰陣做乜都係錯,
唯獨係呢一樣.

之後禮拜一返到學校,
我好記得嗰日我係特登早啲返去
點解
因為我想同班主任講想調位,
你地啲點解想調位啦
一嚟已經唔敢再面對佢,
二嚟當幫自己唔記得佢
咁我就同班主任講,


坐得太後望唔到黑板,
可唔可以調前啲,
我好清楚自己死人性格,
如果我坐後過若凝,
一定會成日偷望過去
所以我就選擇調前啲
亦都好好彩,
班主任批准,
嗰個女同學又肯
我特登揀一個同若凝啱傾嘅女同學調,
唔揀啲狗公
我知佢唔鍾意,
就當係我為佢做嘅最後一樣野
當然佢都唔會放喺心上架啦,
一啲咁微不足道嘅野,


係我呢啲小毒毒先會留意啫
跟住我地早完會返到去班房,
我差啲去左之前坐嘅嗰個位,
坐左成年,
你話完全冇習慣就係呃你
好彩之後理性制止左我,
同自己講,
已經唔係坐喺嗰度喇
世界上所有野,
其實都係講緊習慣
一習慣左就冇事,
只係時間嘅問題,
我唔知若凝點諗,
嗰日有乜反應,
因為我已經冇望佢


嗰日嘅晏晝,
我喺地下撞到佢,
都係直行直過,
扮見唔到佢算
跟住就同隔離嗰個傾計,
我好驚一望到佢,
我對眼就會俾佢迷住
一俾佢迷住,
就會前功盡廢,
根本就唔會忘記到佢
所以一定要下定決心,
唔會再同佢有接觸,
夜晚上到床,
可能夜闌人靜嗰陣,
自己特別鍾意諗野,
覺得咁樣好舒服,
當然亦都係瞓唔著啦
眼瞓嘅話邊會諗,
腦海無啦啦浮現返起當日我喺公園見到嘅一幕,
唔通俾我嘅衝擊真係咁大
我嗰陣喺度諗,
其實咁樣做係咪真係啱
第日真係唔會後悔
時間一過左就唔會返轉頭,
最激氣嘅係,
我嗰陣覺得將來我真係唔會後悔
自己喺度同自己講,
要頂住上,
過左一排就會冇事,
同若凝斷絕來往,
係最好嘅處理方法.