[真人真事][校園][純愛]《婚宴上的重遇》: 第七十六章

跟住嗰排我嘅生活大致上都冇變,
都係好似之前咁樣
當然啦,
依家放左學就得閒好多
唔使再陪人食野,
去呢度去嗰度,
一支箭就衝返屋企
食晏晝都係
永遠都係同呀成,丁仔,呀余嗰幾條蛋散食,
佢地班友又真係日日去同一間餐廳食


車仔麵
一次都冇食過,
禮拜六日放假更加全日喺屋企,
本來我就係一個鍾意喺屋企溫書嘅人
唔使行,
又唔使俾車費,
不知幾正
我嗰陣係咁同自己講,
好快就會慣
依家我都過得好自然,


完全冇唔習慣呀
只係,
有時放學返屋企嗰陣,
望到屋企個鐘,
我嗰啲死人性格又嚟料
原來我之前未試過咁早返屋企,
禮拜六日放假又係,
依家先覺得,
原來去自修室溫書,
都未嘗唔係一件好事


起碼會有條友陪你一齊加油,
面對a-level,
原來我唔係想象中咁獨立,
不知不覺間,
依家已經同一年前嗰個自己有啲唔同
原來習慣真係會變,
最慘係,
變完之後要回復原狀,
真係適應唔到
當時嘅我唔明,
明明自己已經話左放低,
點解都仲係咁
依家嘅我就梗係明啦,
鬼叫嗰陣自己太戇居
咪諗唔到點解囉.



我同若凝嗰陣係一句計都冇傾過,
甚至乎面對面眼神交流都好少,
大家好有默契咁樣劃清界線
河水不犯井水,
有時喺早會,
對眼總係忍唔住會望住佢背影
然之後一轉身準備上返去班房嗰陣,
就會移開視線
每日就係咁,
有時如果嗰日冇早會的話,
咁就唔會有呢個情節,
我同佢就算喺學校裏面撞到,
大家都係各自同隔離嗰個人傾計,
笑得好開心


永遠都唔會望大家
呀唔係,
其實我係會望,
不過係遠望嗰隻,
我一遠望見到佢,
跟住就全情投入,
同隔離嗰個人傾計
我唔知佢係真係望唔到,
定係點啦
我已經唔會再ff
我估班上面啲人大家都知咩事,
抽開水嗰班人冇再抽,
佢地可能覺得,
呢兩條友無啦啦會冇野講
實有古怪啦,


不過佢地都好識做,
冇當面問
你知啦,
當面問真係好尷尬
到時我真係唔知點樣反應 ,
總之我嗰陣就係一條心向住a-level,
其他乜都唔諗
我以為自己係咁
之後學校搞聖誕聯歡會,
話晒都係最後一個聖誕聯歡會,
全部人都有去
咁我地班嗰幾個揸弗人就話,
放學不如戴聖誕帽啦,
氣氛好啲,
一見到聖誕帽,


我就諗返起上年聖誕,
若凝喺條街叫我一齊戴聖誕帽
唔知佢仲記唔記得呢
我諗應該唔會喇,
呢啲咁無聊嘅野,
佢點會放喺心上
你估佢好似我咁戇居咩
一早話要放低佢,
但係成日唔小心諗起佢嘅回憶,
嗰種回憶真係控制唔到
自己湧出嚟,
上年今日都估唔到今年聖誕我地會咁啦
世事真係好奇妙,
佢係因為避開佢前男朋友,
所以先嚟呢度讀書,
如果冇佢前男朋友,
咁呢一年幾嘅事就唔會發生
同時間,
亦都係因為佢前男朋友,
我地就分開左
冥冥中真係有主宰,
去到平安夜,
我喺度諗,
唔知佢聖誕成點呢,
同緊佢班朋友一齊
定係同前男朋友共渡聖誕?
但係佢又話佢前男朋友已經走左,
其實係咪真
又或者佢可能已經飛左去外國陪佢,
點都好,
都已經唔關我事啦.

咁之後我同若凝又唔係完全冇傾計嘅
大家都知我同佢係班會嘅宣傳,
有一次,
我記得係喺我生日嗰排,
亦即係2010年嘅一月
咁我地嗰日就開班會,
傾完之後準備走嗰陣,
若凝:「呀行你好似就嚟生日喎 」
我估下都呆左一呆
估唔到佢會主動撩我傾計,
同埋佢會記得
我嗰陣一定要扮到好正常
唔可以將我嘅情緒表露出嚟,
當係一個普通朋友咁樣處理
我係咁同自己講,
我:「係呀 」
若凝:「生日快樂.」
我:「多謝呀若凝 」
佢唔會再叫我傻仔行,
我亦都唔會再叫佢若凝姐,
大家叫返一般人都知嘅暱稱就算
幾陌生呀
就係咁,
我望住佢背影走,
咁樣都叫好頭好尾丫,
用一句生日快樂做結尾,
但係我好清楚,
我地真係已經返唔到去以前,
過去嘅日子,
已經唔會再返嚟,
點解啲人咁感慨,
成日都懷念以前,
我諗我依家終於明.