[真人真事][校園][純愛]《婚宴上的重遇》: 第八十三章

話說有一次
大概係2014年左右,
有一日我無啦啦俾人加左落去一個whatsapp group度
寫住係6a班group咁樣,
咁我就知係中六中七個班同學
當時第一時間梗係諗,
唔知若凝係咪度啦
我見嗰度有好多個人,
亦都唔見若凝以前個電話號碼
有兩個可能性,


一就係佢換左電話號碼
二就係佢冇被人加入嚟
咁我梗係想佢只係換左電話號碼啦
之後諗諗下咁落去唔係辦法,
突然之間諗到個方法,
咁係咩方法呢
我決定私底下whatsapp 個group嘅管理員
我:「你係邊個 」
管理員:「我係班長呀
係咪發左達唔認得人 」


我:「痴線做到隻狗咁
點解你有我電話嘅 」
班長:「都係一個搭一個咁樣
有啲我就喺面書搵佢 」
我:「個個都有加 」
班長:「係呀,
仲細咩喺度玩分化
梗係個個加晒 」
我:「可唔可以話我知邊個打邊個
冇個識 」


班長:「逐個逐個打出嚟我可以去食屎
我喺group嗰度叫佢地自己報到啦 」
我:「點解無啦啦開group嘅 」
班長:「冇呀,
見各位咁耐冇見
咪開個group加大家
傾計又好,
得閒出嚟食飯都好丫 」
我:「原來係咁 」
之後班長真係喺個group嗰度叫佢地報上名來
咁個個都好守規矩,
我就跟大隊啦,
都有講低自己係邊個
然之後就繼續等,
不過我等下一個,


等下又一個,
都仲未見到若凝
直至到我沖完涼出嚟,
見到一個留言
「大家好,我係若凝.」
跟住我就二話不說,
即刻save低佢個聯絡人資訊
果然佢真係換左電話冧把
之後就梗係去睇下佢個whatsapp頭像,
都係自己一個人喺唔知邊度影相,
就咁睇佢同以前差唔多
都仲係咁靚
仍然係我腦海中嘅佢,
可以嘅話見到真人會清楚更多
但依家已經好心滿意足,


原本我唔應該有佢嘅電話
因緣際會下,
我得到呢個意外嘅禮物
點會仲要求咁多野丫,
我聽過有人講一句說話
每個人都會有一個電話,
係你永遠都唔敢打,
但係永遠都唔會刪除,
以前我覺得好戇居
唔打留嚟做乜
依家我知點解喇.

之後呢班中學同學間唔中會出嚟班聚
我間唔中都有浦頭
一嚟真係想聚舊啦,


但更多嘅係,
我好想藉住呢個機會見返若凝
當然我係一次都冇見過佢
有時喺個group,
有啲人會話今日嚟唔到,
若凝係其中一個
我唔通臨時唔去咩
咁樣盲嘅都知啦,
每次話有班聚,
我都好希望若凝會嚟
但係佢真係冇嚟過
久而久之我都唔敢太樂觀
有時我都會特登撳入去若凝個whatsapp度,
我都唔知為乜野要咁樣做
有幾次我都見到佢在線上,


真係好巧合,
搵唔搵佢好呢
結果最後都係冇咁做到
其實有時我都喺度諗,
會唔會其實我已經唔係鍾意佢
只係自己過度美化佢,
因為得唔到先至鍾意
但係我好記得有一日,
我食m記嗰陣,
我聽到有一把好似若凝嘅聲音
真係似到十足十
嗰一刻我直情以為係佢,
之後我望一望,
原來只係一個普通嘅女學生
跟住成餐m記,
甚至一路行返屋企嗰陣,
我個腦又開始胡思亂想
又諗返起以前啲野
明明過左咁耐,
已經好耐冇提起,
但係啲回憶真係自己湧出嚟,
喺嗰一刻我先知,
原來自己仲係放唔低佢
只係區區一把同佢好相似嘅聲音,
就已經搞到我咁
根本就冇忘懷過.

咁樣係嗰排
我就開左instagram
冇計啦,
毒男一向對住呢啲社交媒體,
係比較遲鈍架啦
我自己都知自己遲玩
我係用facebook個account登記,
咁樣就自自然然follow左好多嘅人啦
嗰陣我就睇有邊啲人係有玩instagram,
睇睇下原來若凝有玩
不過佢就撳左private,
咁我就即刻整返幅頭像
就用面書嗰個啦
方便易認丫,
之後我都等緊有邊啲人俾我follow,
講到尾其實都係等緊一個啫
我望住若凝個版面,
見到仲係「已送出邀請」
真係心急如焚,
直至到見到「已送出邀請」變為「追蹤中」,
我真係yes左出嚟
咁就睇左個佢instagram啦
依家嘅佢,
頭髮有少少啡
樣同以前冇變,
但的確係成熟左
皮膚都仲係好好
行出街仲會認得
不過奇怪嘅係見唔到有男朋友
你知啲女好鍾意晒自己有男朋友
不過我就見唔到若凝有咁嘅現象,
亦都冇打埋啲情情愛愛嘅野
不過可能有唔擺上嚟啫
老實講我就唔係好信佢會冇男朋友
你知幾多狗公架啦,
之後每次我開instagram,
如果係用唔熟嘅中學同學計,
我淨係會like若凝啲相
其他全部都唔like,
可能係我自己心目中,
想對住若凝與別不同呱,
其實真係好幼稚
不過男仔就係咁啦,
對住某一個人,
仲係會有特別嘅對待,
因為唔想覺得佢同其他人係一樣,
所以就做埋啲咁無謂嘅野.

時間一路過去,
日子都係正常咁樣過
突然之間有一日,
喺我冇預兆之下
收到一個結婚請帖,
或者唔可以叫係結婚請帖嘅,
但總之係收到一個消息關於結婚架啦.