[真人真事][校園][純愛]《婚宴上的重遇》: 第八十四章

時間去返2016先
嗰陣大約係七月左右,
有一晚,
我啱啱出完去第二度,
準備搭巴士返屋企嗰陣
突然收到whatsapp
咁我見到架車就嚟到,
就上車,坐低埋先睇啦
去到上層,
我就拎返個電話出嚟睇下究竟係咩事


跟住一睇原來係中六中七同學嗰個群組嘅訊息,
仲要係班長講野
咁我就睇下咩事,
班長:「我同呀欣十月十五號星期六結婚
你地會唔會嚟呀
因為想盡快搞好酒席嗰啲野 」
邊q個係呀欣
其實佢都係群組成員之一
即係話唔止係校友,
仲要中六中七嘅同班同學


喺度講少少啦,
其實佢同男班長中六尾已經拍拖
估唔到一拍就拍左咁多年
大大話話真係六七年,
當初真係估唔到,
佢地可以行到咁遠
唔係話我黑心
大家都知呢個世界幾多誘惑架啦
中學之後佢地分開左學校,
估唔到都維繫得咁好


真係好野
其實自己好羨慕呢啲由中學拍拖
一直去到結婚嘅愛情,
中間一定要克服左好多考驗
成日以為呢啲係拍戲先有,
估唔到就有個活生生嘅例子喺隔離
之後就成班同學恭喜佢啦
亦都因為新娘新郎都係我地識嘅,
所以好多人都話會去
嗰陣我梗係最關心若凝會唔會去啦,
因為佢嗰陣仲係未表態
直至去到我臨落車嗰陣,
我終於見到我想見到嘅野
若凝:「恭喜你地呀
嗰日會到 」


原來嗰日若凝會嚟
即刻放下心頭大石
但你知啦,
如果依家我即刻話我都會去,
咁就係人都知咩事
所以我決定都係等幾個人覆左
我先至覆話去,
咁樣應該唔會太明顯掛.

之後嗰個幾兩個月我都冇乜特別
每日都係返工放工,
間唔中先打下機
老實講,
其實生活真係冇乜目標
同細細個幻想嘅野完全唔同


以前自己會幻想到大個嘅生活會好多姿多彩
好有希望
點知原來唔係,
喺香港地你估真係唔使做咩
唔好玩啦
色彩繽紛嘅生活唔配我呢啲窮人
都係乖乖地做一個港奴啦
去到男班長佢地諗結婚前嗰一晚,
我自己喺度諗,
原來我都好耐冇試過有期待聽日嘅感覺
即係嗰種「好想快啲到聽日」,
近幾年生活都麻木左
點會好似以前咁樣,
成日對聽日咁有盼望丫
但係今晚真係有


因為我知道我聽日就可以見返若凝,
自從2010年嘅放榜日之後,
我都有六年零三個月左右冇見過佢
聽日終於可以再見返
真係等左呢一日好耐,
縱使一切已經返唔到去以前都好,
我都好想再一次見返佢
睇下過左咁多年之後,
有咩變化都好丫,
我唔期望有咩發展,
傾計與否都好,
只係好想滿足自己嘅私慾
可以再見面,
就已經好足夠.



第二朝起身真係零舍有動力
真係對呢個自己有啲陌生
我仲以為自己以後唔會再咁有期昐去應付今日嘅事,
雖然耐冇試過
但好彩我都冇忘記呢種感覺到
之前都講過啦,
我星期六係返半日
我唔知係咪真係咁唔好彩
嗰日我要留喺公司耐啲做多啲野
早知係咁我就換定套飮衫出嚟啦
我鬼知今日會ot咩
因為以往係絕少ot,
佢竟然今日先走嚟ot,
可能真係我黑仔
之後我就拿拿臨做埋手尾,
因為仲要返屋企沖涼換衫,
大約三點幾就離開公司
平時都鍾意搭巴士,
慢慢咁樣坐喺度聽下歌
放鬆一下
不過嗰日唔得喇,
因為好趕時間
就算冇得坐,同人迫,
都係決定要搭地鐵
趕時間係咁啦,
為嘅,
只係唔想再遲多一次
返到屋企,
沖完涼就去廁所執下自己,
睇下有冇邊度唔妥,
一切正常之後,
就再出發去酒店飲宴
同埋去見一個好重視嘅人,
今次唔可以再浪費機會,
唔想好似六年前我喺公園喊嗰晚咁樣,
帶著遺憾去返屋企,
經過六年嘅洗禮,
已經唔會再猶豫.