小毒魔法狂想曲: 007 風暴謎城
三日後，在一架小型飛機上⋯⋯
「同花順，最後一張！有無大？」「有無咁誇呀！三炒喎！」「艾蜜莉四炒要除衫！」拉斐爾又贏一場了，不過上述最後一句只屬我的幻想。「其實我地仲有幾耐會到個個島？」老實說我已經輸得沒有心情玩。「自動駕駛話大約兩個鐘後就會到，唔洗急啦，再玩多陣！」「唔玩啦，次次都得你贏既，不如吹陣水算？」幸好這次艾蜜莉和我同一陣線姐。「咁好啦，我再去拎啲汽水黎。」「唔該哂韋利特。」我順勢大口大口解決罐內尚餘的檸檬茶。
「係呢Greendy，你呢排同雲妮點呀？」艾蜜莉問。我要馬上收回她和我同一陣線這一句，下一秒我口中的檸檬茶亦瞬間噴出，直飛拉斐爾面前。
「水球術！你玩野咩？」佢及時召出一個水球包著了所有液體，總算沒有弄髒地方。
「嗯⋯⋯我地散咗好耐啦，你無收到風咩？」我已不知道該如何形容艾蜜莉選擇話題的能力，分享一下交流的趣聞不好？
「下？哎呀對不起，我真係唔知道架！點解會分開既？」其實我就不是太想再勾起這些傷心事，但基於之後幾天都要一齊行動，無謂現階段就有不和。「佢話我地唔夾，佢已經好攰，唔想再一齊咁囉。」「但係咁樣聽落唔似係真正個個原因喎！」何解你還要於這話題上糾纏呢？我望一望拉斐爾及韋利特，一副事不關己的樣子，毫無出口相助的意欲，心中下省一千句粗口。然後口中答道：「總括黎講就係話我不求上進，得閒又唔去搵錢係屋企做廢青。」
艾蜜莉思考一會，才問：「佢唔知⋯⋯你係魔法師個可？」「應該唔知，公會有保密協議架，點可以隨便洩漏身分？」除非她曾經跟蹤我，不過我肯定她沒有這麼無聊。「但係你所謂得閒既時間其實都真係做緊正事喎，你做咩唔解釋？」「解釋啲咩？同佢講其實我係魔法師黎架，負責拯救世界咁咩？佢十成當我幼稚到一個點啦！同埋佢講得分手，姐係佢已經無哂感覺，再一齊都無意思。」「好啦，唔好再迫Greendy 啦。」該死的拉斐爾終於肯出聲幫忙。「都係講返關於任務既野啦。」
「嗯嗯，我的確有問題想問，你地話個島有龍捲風圍住，咁我地架飛機點降落？」我當然不會放過轉換話題的寶貴機會。韋利特在背囊拿了個水晶球出來，入面有那小島的外圍圖像。「嗱我地有既情報話個島叫暴風謎城，面積就不太大，上面既遺址屬於日本文化既城堡，來歷不明。而城堡位於島中央，佔咗一半既地方，而其他既平地大約有七道龍捲風來回拖行，無規則可循⋯⋯」我聽到這裡也一個頭兩個大，那麼到底怎樣能降落呀？「其實你兩個係咪想跳傘落去？架機比啲龍捲風吹兩下乜都散啦！」艾蜜莉插嘴說：「唔可以係水上面降落咩？」我答：「並唔容易架，係水面更易被吹走，架機又無錨。難道你想我地留一個係度睇住架機？」「咁又唔得，咁我地點算呀？」艾蜜莉說著便露出焦慮的樣子真是我見猶憐。
「辦法就唔係無既，只係⋯⋯」「拉斐爾你再賣關子我就即刻幫你架機開幾個洞！」我的耐性亦到了極限，有方法為甚麼不一開始講？「因為我地諗到既方法風險好高，而且只有Greendy 先做到。「下？！」我同艾蜜莉異口同聲叫道。「無錯，要風系法師先有機。首先，你用降落傘去咗個島先（乜野話？！），聽埋先！然後再消滅一兩個龍捲風，咁應該就會形成幾個路徑既盲點可以作降落用。」「咁你應該幫我諗埋點收拾啲龍捲風啦可？」我真心呆咗，完全無頭緒如何處理龍捲風喎！「無呀！咁你風系法師黎架嘛，呢啲風系魔法你最熟啦！」
「仲有無得選擇退出？」