《想當年，我係跑Online入面搵到初戀》: 【2】

「係呢，你跑Online叫名？我加你呀。」我主動問起佢。
 
以前問女仔一啲隔膜都無，依家傾句嘢，人哋都當你想溝佢咁。
 
唉…打打下都好懷念從前……
 
「同MSN個名一樣。」
 
「你依家玩？」
 


估唔到佢會主動叫我玩，本來諗住瞓嘅我，都決定玩多場。
 
「係呀，ON緊。」
 
「一唔一齊玩返場先？」我就係等緊佢喱句。
 
「好！玩咩先？」
 
「乘法王？入到去認得出我就加名啦。」牛奶糖講到好吸引，令我有種莫名嘅期待。
 


唔單單係因為牛奶糖係女仔，就算係其他朋友，都會想第一次玩嘅時候，展示自己最強嘅一面。
 
我喱一次都唔例外，拎出自己最強嘅裝備，同埋角色。
 
我仲好記得我係用森美，一隻一仆街起身好撚慢嘅角，但係跑得好快。我決定賭一鋪，不能柒！
 
仲要配埋精靈，咩都準備好曬，開埋場。
 
「開咗房啦，等你。」我都打返個表情符號，然後俾個房號佢，等佢入嚟。
 


無幾耐，我見到牛奶糖個名。
 
佢用緊莉娜個角。坦白講，第一次見到，我真係俾佢電到。
 
我不自然將喱個角代入咗佢，覺得莉娜就係牛奶糖真人，覺得佢好靚！