《想當年，我係跑Online入面搵到初戀》: 【3】

「跑Online呀話？」我明白佢意思，我點會傻到真係以為佢想同我拍拖咩？
 
我都會有啲自知之明嘅。
 
「醒目仔！」
 
「當然，哈哈。」
 
「咁仲唔快啲On？」我好傻仔，有種老婆叫老公嘅感覺。
 


小時候就係有喱種無無謂謂嘅遐想，無聊咁FF下。
 
好快我哋就去公園註冊，做咗一日情侶。
 
無錯，就係一日，我無講錯，係真係一日咁多。
 
第二日就搞分手，純粹只係貪得意玩下咁樣咋……
 
「好得意呀，你睇下！」牛奶糖停咗係度打字。
 


佢再跑多幾下，佢身後嘅紅線跟住佢郁嚟郁去，而佢另一邊綁住嘅，就係我。
 
「係呀，好得意呀……」我好自然咁串佢，「好似拖住隻狗咁。」
 
「……」佢覆我一堆點點點。
 
「衰人！唔同你玩啦！」
 
嗰句衰人，有點甜，我笑起上嚟，都帶甜。
 


然後牛奶糖佢就跑走咗，咁我又跟住跑。
 
我哋只不過係個online game入面個公園度跑嚟跑去，但搞到好似真係係公園入面拍拖咁，你追我逐。
 
好似玩緊細路哥愛情遊戲，『你追我呀…你追我唔到…呀…你差啲捉到我…你追到我啦…』類似喱啲。
 
但好神奇喎，咁樣又一日。
 
係遊戲入面以情侶嘅名玩咗一日，好似我真係拍咗一日拖咁，穿梭係真實與虛幻之間。
 
咁樣都可以算係初戀掛？？？
 
但真正令我接觸，認識牛奶糖喱個女仔，係我中三嘅時候。
 
最後我哋只係拍咗兩年拖。


 
有佢，令我青春歲月入面塗上好多色彩。但係，同時間佢係我青春入面嘅遺憾。
 
如果我可以成熟啲，咁樣，我係咪就唔會失去佢？