喱一年我同佢相處嘅時間確實唔多,只係偶爾咁叫下大家玩下跑。
 
佢係我少數女仔朋友入面,榮登MSN我的最愛排行榜入面。
 
嗰陣時會張個Icon放大,然後一打開MSN首先就會見到佢哋有無在線上,有時都會收到牛奶糖嘅離線訊息。
 
同佢傾偈好似變咗一種習慣,我哋傾偈嘅嘢唔再局限係跑Online入面,會傾下其他嘢,例如咩星座呀,乜乜都會傾一餐。
 
去睇星座網仲要偷睇下自己同佢夾唔夾,但又唔覺得自己鐘意佢,真係超級大傻仔。
 


終於去到放暑假,中二嘅暑假。
 
中學雞嘅暑假,無嘢做,得閒去踢下波打下波,平時無無聊聊,你會唔會咁勤力去做暑期作業?
 
暑假作業都會留到最後先做嘅你,會唔會去上興趣班?學畫畫?去補習?
 
絕大部分都係屋企打機,睇片。
 
試過成日都同牛奶糖係度玩跑,我同佢玩章魚爸爸可以話玩到出神入化。跳電跳到好撚快。
 


嗰時仲好型咁帶住條勁長嘅頸巾係度玩,但其實好撚MK。
 
除咗玩跑,有時我會係MSN度見住牛奶糖係度睇緊啲台灣劇,海派甜心。
 
佢仲要用緊PPS睇。
 
以前嘅PPS係會show埋出嚟,嗰陣PPS好多嘢睇架,依家搵唔返嚕……
 
「咁有興趣煲劇呀?」我一見到就問,我哋都已經fd到無咩好介懷。
 


只見牛奶糖Icon由綠色框變咗做橙色,再由橙色瞬間變成紅色。
 
我就大約估到,佢應該係轉咗全螢幕,所以睇唔到有MSN跳出嚟。
 
以前好多估估下嘅樂趣,換轉現在,好似搵唔返咁…對我嚟講。
 
我見佢睇緊,我又心郁郁想去睇下,反正睇下唔啱睇咪唔睇囉!
 
我打開PPS,開始追劇之路。

當我追完一集之後,覺得又幾好喎,個男主角又係傻傻地咁樣,而女主角又係一個惡霸。
 
同牛奶糖有三至四分似啦。
 
回想起嚟,都唔知點解自己會好自動咁將女主角影射做牛奶糖,而自己就係嗰個男主角。


 
我諗,初初接觸愛情嘅人,都會幻想自己係男/女主角,然後你鐘意嘅就係另一伴!!!
 
「係呀,無嘢做呀嘛。」佢唔知係邊度整啲貼圖出嚟,好鬼可愛,更添傾偈嘅趣味。
 
後未我先知,要自己搵圖,然後將自己會打嘅字合埋一齊,下次你打嗰隻字出嚟就會出張圖。
 
成個過程都要自己諗自己整,依家好似少咁喱啲樂趣。
 
一想起從前,就好懷念。
 
懷念以前嘅歌,以前嘅人,以前嘅事,以前嘅自己。
 
原來自己都曾經咁樣青春過。
 


「好無睇呀?」因為佢,我開始追劇,一齊追嘅感覺。
 
只不過,當時嘅我分唔清楚會追劇,係因為鐘意佢,定係機緣巧合。
 
但我可以好肯定咁講,嗰陣時嘅時光係最快樂無價。
 
「羅志祥真係好靚仔呀!」牛奶糖開始追上腦。
 
「我覺得佢冬菇頭靚仔啲。」我依舊串佢,嘻笑怒罵。
 
我哋嘅節奏都係咁樣,開始會生活大小事都會有牛奶糖。
 
去沖涼啊食飯啊,都會講,就連早抖早晨都會講,基本上我覺得,我哋好似真係拍緊拖咁。
 
去到開學,先係我哋故事嘅開始。


 
Sorry啊各位,跑Online只係令我哋相識嘅開端,我哋真正嘅故事,係中學。

其實開學對我嚟講無咩特別,係去到開咗學一段時間,我先知道,原來牛奶糖就坐係我前面!
 
我哋初中會分班,只有A班係精英班,全級前40會入去精英班,其他都會打散曬咁分班。
 
我自己點都唔會入到精英班架啦,於是乎求其編入咗一班,好彩暴牙同我同一班,我先有個伴,而芝士腸同暴龍就入咗另一班。
 
開學無耐,老師就幫我哋安排好曬啲位,而我就同一名肥婆一齊坐。
 
哇屌你老母,佢一個人坐係度已經可以將我逼出走廊……
 
真係不堪回首嘅回憶……
 


我無注意到前面咩女仔嘅原因,就係個肥婆坐係我隔離,搶走曬我注意力。
 
每一級,都有一個肥婆。
 
佢係全級最撚肥嘅肥婆,暴牙見到我同肥婆玲坐,成日都偷望我,然後係度陰陰嘴笑!
 
仆你個街!我一定會介紹肥婆玲俾佢識。
 
肥婆玲全名唐少玲,真係唔知佢邊忽「少」?
 
我真係想同啊李Sir講,「李Sir可唔可以走肥啊?」
 
級花已經唔係度架啦,點解仲要俾個肥婆我!?
 
依家回想返,我嘅想法都係一致,點解牛奶糖唔係坐我隔離?
 
一開學,我真係頹到唔想上堂,因為我專心唔到……
 
人哋高登故就係女神坐係隔離,其他男同學都專心唔到上堂;而自己呢?就係因為肥婆搞到專心唔到上堂!
 
而其他人就好撚專心!
 
最最最最最攞命嘅係,我坐係最角落,靠窗位度,走都無得走呀大佬……點頂呀!?
 
已有 0 人追稿