《香港革命戰》(上): [13-陷阱] PART 4
「到啦，我地可以落車。」兩位執行者為我地引路。
玻璃大門...就連呢道都仲係用梗玻璃製既野，睇黎天水圍真係仲未研究到壓縮空氣技術...
穿過玻璃大門，行入中心入面，眼前係一個黑色為主既大堂。
大堂無乜特別，都係一般既大堂，有幾盆發出綠光既盆栽、有幾張黑色Sofa、有幾部防禦者EU喺道巡邏...
「陳小姐，請妳留喺呢個大堂道，可以隨便坐，但唔可以亂走。」其中一個執行者指住張黑色Sofa同阿月講。
「嗯~無問題~」阿月彈下彈下咁彈到去張黑色Sofa前坐左落去。
咁順攤?!
真係點估都估唔到...
我仲以為阿月會又哀又篩咁要求跟埋去議會廳...
阿月究竟想點架?
「屯門領域既統治者，請跟我地黎。」兩名執行者一左一右夾住我行去中間既升降機。
要護送我呢D統治者都只係派得嗰兩個執行者黎...
就連控制中心都只係得防禦者EU喺道巡邏...
搵半個行者睇下都無...
天水圍好缺人咩?
無人想做行者咩?
定係D行者去晒偷懶?
真係不知所謂!
不過又好難怪既，只要EVE系統仲有能源運作，結界範圍內根本就唔會有咩大事發生。
唔好話外來入侵，就連我地都唔可以做出傷害對方既事。
喺一個咁安居樂業既環境下，係人都想HEA住過...
怠惰...結界裏面既人又由幾時開始再次產生出七罪宗?!
睇黎，天水圍墮落既速度非常之快...
俾我地快得多好多...
好快，呢道又會變成第二個地獄...
而我，絕對唔會俾屯門領域都變成咁樣...一定唔可以!
我地三個人進入玻璃製既升降機後，升降機門立即閂埋，升降機急速向上升。
望落樓下坐喺黑色Sofa上既阿月...都好既，唔好俾佢跟住黎都算係好事...
得防禦者EU巡邏既大堂對阿月黎講比較安全...
始終，EVE系統唔會容許任何人類作出傷害人類既行為...
EVE系統會保護阿月，我又唔駛為阿月既安全擔心...
我可以安心面對上面嗰兩隻老野!
而且，唔駛擔心阿月喺會議期間做出一D難以預測既行為...
你知架啦，阿月呢個人神神化化，一陣又唔知會唔會性起上呢衝埋去打嗰兩個老野兩拳，到時都唔知點算...
再唔係講左D唔應該講既野就麻煩...
始終，呢個咁既會議都算係一個心計會議...
唔可以亂咁講野，要小心自己既一言一語...
帶埋阿月上去真係唔係咁方便...
希望阿月真係可以乖乖地，坐定定等我返黎啦...
升降機一直急速向上升，已經穿過好幾層空中大堂，應該差唔多到啦...
升降機開始減速，開始慢慢停落黎...
“咚”一聲響，玻璃升降機門打開...
「呢一層我地無權進入，請你自己行過去啦。」兩名執行者伸出手，向我示意自己行。
玻璃天橋隨即由對面既黑色牆身伸展過黎，與玻璃升降機連接。
呢一層，係特別既樓層，平日無人可以進入，特別既日子亦都只有特別既人先有權進入。
“咯...咯...咯...咯...”一步一步踏上玻璃天橋...
“咯...咯...咯...咯...”一步一步向遠處既門行過去...
望一望樓下，呢道距離下面既空中大堂有幾高呢?
五十層樓?八十層樓?唔知道...
我諗大約有一百層掛...
始終無辦法連接EVE系統，就好似盲左一樣，咩提示都無...
人真係太依賴科技...
離開左屯門領域之後，就已經無辦法再連接EVE系統。
因為...自從EVE系統一分為三之後，每個領域既人民都只可以連接返佢地自己領域既EVE系統。
就算係好似今日要去到第二個領域開會，我地都唔可以連入人地領域既EVE系統。
係唔係基於保安理由我就真係唔知...
因為EVE系統根本就唔由我地控制...
我地只可以“懇求”EVE系統得到某D幫助...
好似話借用防禦者EU去某D地方巡邏;為建築物設立名稱;為街道設立名稱;借用系統控制交通工具等...
利用腕上既名冊與EVE系統既聯繫取得相關既資訊。
所以如果要我為呢個情況加以說明，我只可以話我地仲未究竟出修改EVE系統既方法...
事實上，本來我地可以更早究竟出修改EVE系統既方法，嫉妒心作崇下人類變得太自私...
嫉妒...又係七罪宗作怪!
就好似燈蛾撲火咁，點解人始終都無辦法改變步向自毀既定律?
“咯...咯...咯...咯...”當行到刻有“機密”紅色字樣既黑色門前...
“颼”門自動為我打開。
“咯...咯...咯...咯...”穿過黑門後，“颼”門自動關閉...走入一個黑到咩都睇唔到既通道裏面。
通道入面真係就連一D光都無...
但我知道，只要一直向前行，就會行到我要去既地方...
因為喺遠遠既位置，我見到一點好細好微弱既紅點。
“咯...咯...咯...咯...”我一直向前行...“咯...咯...咯...咯...”一直向住紅點行...
微弱既紅點越黎越近...越黎越清楚...
當我穿過深淵通道，行到一個黑色既“空間”裏面...
呢個空間有幾大?唔知道...根本就好似一個黑洞咁...
視覺上黎講，就好似折疊之門入面咁...
無盡...無盡...
而喺空間既中間，有三張黑色既凳。
三張黑色既凳砌出一個等邊三角形。
凳背有一塊好高好高，大約有兩層樓高既黑色椅背，椅背上面各有一個發出紅光既字，分別係“天”、“元”、“門”...
“颼”背後傳黎自動門關上既聲音...
「呵欠~你終於黎左啦?等左你好耐喇...」一把年老既聲音由前面左邊方向傳過黎...
呢把聲係...額頭刻有紅色“天”字既劉天奇...天水圍統治者...
呢個滿頭白髮，一身老態既劉天奇已經坐左喺椅背發出“天”字紅光既凳上面...
如果話佢係坐，不如話佢攤左係凳上面更貼切。
六十幾歲既你已經力有不逮嘛?
咁快就老到唔願郁?
死懶鬼...
你都係快D死左去比較好!
唔係...
應該話你早D死既話就唔駛搞到SPIRIT變成而家咁!
「靚仔~快D過黎坐啦~」一把姣屎凳篤既女聲由前面右邊方向傳過黎。
喺幽暗既環境下再望清楚D...
一個身材惹火，樣貌妖艷既女人翹住對腳坐喺椅背發出“元”字紅光既凳上面...
額頭刻有紅色“元”字既鄭穎心...元朗統治者...
唔好睇佢外表好似得果廿幾歲...呢個老太婆...明明就同劉天奇一樣六十幾歲人!
點解突然變得咁青春?!
唔通...元朗領域已經研究出回復青春既方法?
係都唔出奇...
呢個老太婆咁鍾意靚，用盡方法去研究回復青春既靈丹妙藥都唔出奇!
事實上，LILITH既特性同回復青春好相近...
只要全力向LILITH方面作研究，要做到回復青春一D都唔難!
但問題係...要做呢種研究，LILITH既消耗量一定好驚人...
鄭穎心...竟然為左D咁無恥既研究，消費大量珍貴既LILITH...
『等唔切咪唔好等囉。』我坐到去椅背發出“門”字紅光既凳上面...
紅光比之前更光更亮...
「挑~死小孩~你估我好想等你架?有時間瞓下好過啦!呵欠~一講到瞓又想瞓...」劉天奇連眼尾都懶得望我一眼。
『咁唔想開呢個會做乜仲要開?反正開黎都無意思架啦。』我並唔係發咩悔氣，我真係講梗事實。
呢D會根本就唔會有結果，更唔好講話想改變到D乜。
「唔得唔得~唔開呢個會咪唔可以見到靚仔你囉~你知唔知丫，我想食你好耐架啦~你睇下我而家既body~好好砌架~呵呵~」鄭穎心不知廉恥咁望住我。
變態既老女人!
眼前呢兩個人，唔好話要做統治者，人都未做得成!
我真係唔明，唔明點解佢兩個仲未死?
唔死都算，最起碼都好似老豆咁，被流放，被放逐!
點解佢地既人民仲可以忍受?
點解佢地既人民仲未提出表決?
點解佢地既人民仲可以俾佢地留喺SPIRIT?
呢種咁既統治者應該一早就被放逐啦!
「呵欠~呢個會係由我地達成分家之前所定立既契約。所以我地一定要跟住做。」劉天奇半睡半醒咁既死樣攤係凳上面。
『我無答應過要分裂SPIRIT。』如果係我，我一定唔會俾呢件事發生。
「啜啜啜~靚仔~係你老豆在位時提出架嘛，你接得任就要跟規矩架啦~」鄭穎心拋眉弄眼擺出一副死淫樣。
『所以我咪表決將佢踢左出去囉。』盡速清除污點係正確做法，唔係既話就會好似你地咁。
「真不孝!呵欠~你老豆生你出黎，你竟然散朝奪位。我有你呢D咁既仔真係死左去早D瞓棺材好過囉!呵欠~」劉天奇就快升天既樣...
你就真係就快瞓棺材喇。
『散咩朝奪咩位?我地根本就無權貴之分。』我只係為人民鏟除自私既統治者。
自私既統治者只會為領域帶黎滅亡。
為左人民...為左領域，大義滅親係必要!
「呵呵~靚仔~你仲係咁自欺欺人嘛?你睇睇我地既行者~你真係覺得我地係無權貴之分嘛?」鄭穎心撥弄一下頭髮。
的確，行者既身份最容易觸犯階級觀念...
要保持行者內心既平衡就要靠行者本身既意志同心境。
謙卑、寬容、耐心、勤勉、慷慨、節制、貞潔呢七美德就係行者必須擁有既心靈。
七種美德必須全部共存，缺一不可。
所以行者都要長久既修行，確保心靈不遍不倚。
經過長久既修行，修得一顆完美無瑕既心靈先可以成為行者一員。
而在座三個都係預行者，所需要既心靈堅定就更加唔駛講。
但係睇前呢兩個人，一個就怠惰，另一個就色慾!
唔好話預行者，就連SPIRIT既人民都無資格做!
點解仲可以坐喺呢道?
『我地屯門領域既行者，個個心靈都堅定不二，絕對唔會好似你兩個咁樣。』我怒視眼前呢兩個連人都不如既統治者。
「呵欠~小年，你還年輕呢~當上統治者都係短短三年，梗係仲未明白人去到某個位置就會有某個位置既心境。」劉天奇終於都單起一隻眼望一望我。
咩位置?
咩心境?
『好似你地咁呀?破壞規條?』我指住眼前兩個無恥既統治者。
「靚仔~你唔可以咁講架~姐姐會心痛架~我地邊有破壞規條姐~」鄭穎心雙手摸住胸口。
真係人若無恥，天下無敵!
『規條第一條:保護原核。你地有保護原核咩?你地唔單止無保護原核...你睇下你地搞左D咩出黎?』就係因為你地既自私，搞到結界變成咁!
「呵欠~我地無心架。當時我地根本就唔知道將LILITH一分為三之後會有咁大影響。我地既本意都係為SPIRIT好。」劉天奇試圖掩飾自己既罪行。
『規條第八條:不可作假見證。』你又犯多條啦!
「靚仔~我地真係唔知會搞成咁。我地只係想令SPIRIT變得更有系統，更有效率先會將SPIRIT分成三個領域。」鄭穎心好認真咁望住我。
『都已經用分裂之牆分開三個唔同領域，我地仲可以點更有系統，更有效率?』我真係覺得呢D大話連小學生都呃唔到囉。
「所以咪要每個月都坐埋一齊，開一次會囉。」劉天奇都好認真咁望住我。
開個咁既爛鬼會真係有用咩?
『我真係唔知開呢個會黎做乜。』我冷眼望住兩個無恥既統治者。
鄭穎心打量一下我全身:「本來呢個會係為左俾大家交流一下各自喺呢一個月既發展...」
「而家就變左商討一下有咩補救方法...」劉天奇接埋落去。
交流?補救?乜真係咁咩?
你唔好真係當我只係一個死小孩...
老豆喺我細細個既時候曾經講過，我地每個人都要努力做好自己本份。
“天生我才必有用。”每個人一出生就有自己既能力，自己既位置。
有D人設計方面好出色，就去設計出好靚、好實用、好穩固既大廈。
有D人對機械好敏感，就去設計出又慳能源又高效能既機器幫助人類。
有D人煮野食好好味，就去為各人煮出難以忘懷既味道好好品嚐。
本來，我地並無任何阻隔...
本來，我地係一個團隊...
本來，天水圍係負責建設...
本來，元朗係負責教育...
本來，我地屯門係負責訓練行者，負責保安，負責對外抗爭事務...
本來我地SPIRIT既發展好迅速...好急速...
科技發展一日萬里...
能源取之不盡，用之不竭...
但正正就係因為有人唔滿意我地屯門掌握軍事大權，提出分家...
分出各自有各自既領域...
各自有各自既能源...
各自有各自既行者...
各自有各自既軍事單位...
各自有各自既勢力...
人既嫉妒真係好可怕...
可怕到可以將一個完美既世界扭曲...
扭曲到腐敗...扭曲到敗壞...扭曲到崩壞...
「唔好浪費時間，我而家開始會報天水圍既情況。首先係資源會報，我地天水圍仲未研究出令LILITH再生既方法，而我地既LILITH存量大約只可以維持十年正常運作...」我未等劉天奇將說話講完...
『十年?就只有十年?你估你呢句說話俾你D人民聽到會點?』我就打斷劉天奇既說話。
「你當我傻架?我當然唔會俾人民知道呢件事啦。況且十年過後我都唔知自己死左未，就算未死最多咪一走了之~哈哈哈哈...」劉天奇發出無恥既奸笑!
『你!你點可以咁做?你唔可以咁做!』規條約束之下，你絕對唔可以咁做!
「你唔好打斷劉天奇既回報。」鄭穎心突然加把口，「而且，就算你知道都唔可以做D乜。你唔好唔記我地統治者之間有保密協議，我地會議既內容一個字都唔可以對外透露。」
咩鬼野保密協議?!明明就係保障自己所做既衰野唔會暴光!
諗出呢種方法去保障自己既人真係好聰明。
用合法既途徑去包住唔合法既行為令自己合法化。
真係好離譜!
呢D就係頭先劉天奇所講既人去到某個位置就會有某個位置既心境嘛?
我唔認同!
我唔會認同!
老豆，點解你當初會有咁既決定?
對住呢D無恥既協議，點解你會肯妥協?
我唔明...我唔明!
我唔明點解你會變成一隻惡魔!
「基於仲未仲未可以令LILITH再生既關係，喺對外政策方面，為左保留所餘無幾既LILITH，我地天水圍領域已經決定唔會再出去誡律之牆以外既地方。」劉天奇繼續會報。
『你地已經放棄左死海文書啦?』我再次對劉天奇提出質疑。
「死海文書?哈!乜鬼死海文書呀?根本就係一個無聊既故仔!由我地初初發現死海文書既時候就應該知道，死海文書根本係一個虛名!」劉天奇對我既質疑作完全否定!
『死海文書唔係一個虛名...死海文書係記錄左未來既預言文卷...』我確信死海文書所記載既預言...
「預言喎~你睇下而家我地SPIRIT變成點呀?死海文書又有無記錄到呀?」劉天奇理直氣壯咁反駁我。
虧你仲講得出口!
唔係因為你地，SPIRIT會變成咁咩?
而家既報應，係由你地一手做成!
『所以我地要更加努力令事情發展跟返死海文書走!』
「靚仔~唔好再咁天真啦~死海文書已經玩完架喇~我地而家要做既係要諗方法，點樣可以令LILITH再生，又或者可以令LILITH用耐DD。出面個世界係點咪由得佢囉~」鄭穎心講左一堆埋不負責任既說話。
『由得佢?出面仲有好多人等住我地救架!』
「等住我地救?你救得幾多呀?佢地連自己都唔救自己，我地點救佢地呀?」劉天奇表現得極度冷血。
自己條命自己救...
有時候，唔係話自己唔救自己...
而係無能力逃生...
就好似貓捉老鼠咁，老鼠要走又走唔甩，打又唔打隻貓打...
你越係反抗，隻貓就越咬得你大力，越爪得你痛...
反而你乖乖地留喺隻貓身邊俾佢當玩具玩，都仲可以留返條殘命...
久而久之就會習慣左呢種失去尊嚴既生活...
自知者不怨人，知命者不怨天...或者就只可以咁去安慰自己...
當制度、法治、規條將所有唔合理既野變得合理化，你仲可以點?
但係...假如我地有能力既話，唔係應該要幫佢地，救佢地出苦海咩?
我地唔應該坐事不理。
我地唔應該只顧自己。
我地應該盡我地既能力解救佢地，釋放佢地。
但可惜...我地而家都自身難保...
「我地元朗既情況都係同天水圍差唔多。我地用左大量既LILITH研究出回復青春既方法，只可惜仲未研究出回復LILITH既方法。我地既LILITH存量亦都係大約只可以維持十年正常運作...」鄭穎心亦都向我地會報。
十年...
兩個領域既LILITH亦差唔多可以維持到十年...
十年時間已經算係危急?
仲未算係最壞情況...
正所謂沒有最壞，只有更壞...
更壞既情況仲喺後面...
「但我地已經推算出只要繼續向住呢個方向研究，就可以研究出ADAM、EVE、LILITH三者之間產生互生作用既關鍵鑰匙。只可惜...」鄭穎心欲語還休...
「再俾你地用埋僅餘既LILITH，都唔夠研究出關鍵鑰匙。係唔係呢?」劉天奇好似一早就知道答案咁。
「無錯，就係咁。所以...靚仔~你有無興趣幫我地繼續研究落去丫?我可以將我地研究出既所有寶珍資料俾晒你。但條件係...你研究出關鍵鑰匙之後要無條件分享俾我地兩個領域...仲有...我要你~」鄭穎心一副死淫樣咁望住我。
關鍵鑰匙?
解開無盡能源秘密既關鍵鑰匙?
哼...妳真係當我傻架喎...
『否定。』唔好話要唔要我犧牲色相，我係唔會浪費LILITH做無法預測既研究!
係唔係真既我都未知，就要我定下協議?
先唔好話係唔係真係可以研究出關鍵鑰匙，就算係真我都唔可能去做呢個研究...
「諗清楚喎~呢個好可能係我地SPIRIT既最後機會~」鄭穎心仲係努力嘗試說服我。
最後機會?
一早就已經錯過左...
而且我已經諗得好清楚...
我地屯門領域已經有一個好明確既方向!
『我唔理呢個係唔係我地SPIRIT既最後機會...』我起身，離開座位，『我都唔會浪費我地屯門領域既LILITH...』轉身向剛才入黎既方向行，『我地屯門領域會繼續實行死海文書。呢個就係我既會報。』
「咁則係話今次既會議都係無任何協議達成啦~我一早就話呢D咁既會議係晒時間架啦~有時間瞓下好過...」我無再理會劉天奇既既話。
“咯...咯...”你地呢D就叫商討一下有咩補救方法?
“咯...咯...”講笑!
“咯...咯...”明明就係探下口風，睇下其他領域發展成點，有咩可以利用。
“咯...咯...”想利用我地屯門領域幫你地研究出保救LILITH既方法?
“咯...咯...”休想!
“颼”面前傳黎自動門開啟既聲音...
步出呢個無恥既議會廳...
一步一步...一步一步...玻璃天橋已經與升降機連接...
研究...我先唔會話俾你地聽，我地屯門領域既LILITH存量仲有幾多...
你當我真係傻架咩。
如果俾你地知道，我地既LILITH存量只可以維持不足一個月正常運作既話，你估你地會點做?
一定會停止晒手上既所有工作，再計劃點樣接收我地屯門領域!
但係天真既人係你地...
你估當LILITH耗盡之後，真係只係EVE再無辦法產生能源咁簡單咩?
其實我地屯門領域一直都有向呢方面作研究。
阿風講過，以而家既研究發現，ADAM、EVE、LILITH三者之間既關連好複雜、好精密、好細微。
令三者平衡既演算方式亦都好精準。
竟然創造ADAM、EVE、LILITH出黎既創造者咁精心去設計出無限能源既演算，自不然背後有一個唔可以出錯既可怕後果...
上個世紀，人類研究出核子產生能源，開發出核反應堆，製造電力。
核能雖然好強大，可以產生大量電能，可惜其毀滅性都好驚人...
1986年既切爾諾貝爾核事故、2011年既福島第一核電廠爆炸都反映出得到既能源越大，危難亦越大...
所以，阿風以現今研究所得出既結果黎睇，當LILITH耗盡之時，亦同時會帶黎毀滅性既災難...
你可能會覺得係嚇鬼...當然，我都好希望呢D報告都係嚇鬼啦...
唔係既話，距離世界末日大概就只一個月既時間...
沿住升降機，俾剛才嗰兩個執行者夾返落阿月嗰層...
我見到阿月已經喺黑色Sofa上面瞓著左...仲要係呼呼大睡嗰隻...
呢個阿月竟然可以喺敵人既陣地大無私樣咁瞓覺?
究竟佢知唔知道咩叫做危險架?
我行到去阿月面前，溫柔咁叫佢起身:『阿月...起身啦。我地要返去啦。』
阿月抹一抹嘴角既口水...「唔...唔...走啦?我好似瞓左一陣...呵欠~」
係唔係身處懶惰既地方，人都會懶惰D?
我等阿月鬆一鬆頭髮，伸一伸懶腰...
「嗯~行得~」阿月又翹住我行...
救左阿月返黎之後呢三年，好多時我真係唔知呢個細妹諗乜...
可能真係細細個無一齊生活，導致而家既了解唔夠深...
細細個就知道我有一個細妹喺地獄裏面生活...
一切都係為左完成死海文書裏面既預言...
為左可以跟住死海文書裏面既預言發展，喺我地兩兄妹仲喺母親個肚入面既時候，老豆就派左一隊執行者去地獄捉左一個位於上等階層，羅姓孕婦返黎。
當時老豆要阿風既老豆為呢個羅姓孕婦做一個手術...換孕手術...
手術既目的就係要將母親肚裏面既阿月換到羅姓孕婦既肚裏面，等阿月成功混入地獄，接近目標人物－李飛揚。
喺李德宗既老婆懷有李飛揚既時候，老豆已經計算出與李飛揚最接近既DNA組。
計劃開始既時候，本來係以我同李飛揚既胚胎直接交換為目標。
但後來發現死海文書所指既被送往地獄既天使應該係女，而唔係男...
所以老豆就轉移目標，將目光放喺將會成為李飛揚身邊一齊成長既上等人。
當時，同李飛揚接近出生日子嗰幾萬個胚胎入面，就係羅姓孕婦胚胎既DNA最接近李飛揚既DNA。
執行者小隊好成功咁將羅姓孕婦安全送到SPIRIT裏面，同時，阿風既老豆亦準備好換孕手術...
手術並唔算得上順利...
因為要將一對只有三個月既龍鳳胎分開，再換入另一個孕婦個肚裏面，係一件極困難既事...
當我同阿月既胚胎分開後，我同母親既情況出現壞變化...
喺我同母親之間就只可以取其一...
當時，假如要救返母親就必須留我喺母親體內，不過我就會死...
如果要保住我條命，就要離開母體，改由LCL孕育我成型...
為左死海文書，老豆當然情願犧牲我母親都要保住我條命...
而阿月既胚胎被植入四個字“我是三合”...
所以由阿月一出世就知道自己係SPIRIT既人...
或者係長時間喺地獄生活既關係，坐喺身邊既阿月總係俾人有一種怪怪地既感覺...
喺豪華房車入面，而家既阿月同之前既佢唔同...
無再聊坐喺前面嗰兩個執行者講野。
而前面嗰兩個執行者點聊阿月都好，阿月都只係“嗯”、“哦”咁回答...
係阿月太攰?
定係阿月已經對呢個陌生既環境失去左新鮮感?
我真係唔明...
有時間真係要好好了解下我呢個好細妹...
「我地就送你地到呢道，再見。」兩個執行者好無癮咁講左兩句就上返車走。
或者係因為阿月突然變得冷淡既關係，另到佢地覺得好無癮掛。
點都好啦，要盡快過返去屯門領域。
阿月翹住我穿過十六部防禦者EU之後，又黎到分裂之牆面前...
“吱...吱...”聲由分裂之牆傳出...
分裂之牆為我地再次開出一條通道...
身邊既阿月心情睇黎相當輕鬆，仲面帶微笑咁翹住我行...
我一直望住阿月，一路穿過通道...
我硬係覺得阿月身上會發出光芒...
其實呢種感覺早喺第一次見到阿月嗰日就察覺得到...
當我望多佢兩眼既時候...
「今日收穫真係好豐富~嘻嘻~」阿月對我莞爾一笑...
豐富?
咩收穫?
咩豐富?
咩嘻嘻?
究竟妳又做過D咩黎丫?
我一面茫然咁望住阿月...