《香港革命戰》(上): [13-陷阱] PART 5
“吱...吱...”當背後既分裂之牆再次關上...
“沙...沙...沙...沙...”踩過世界之草...
「係唔係好想知我又做左D咩呢~」阿月繼續對我莞爾一笑...
我係唔會以“天使”黎形容眼前既阿月...
“咔”坐返上我地架車之後...
阿月開始講佢既得意傑作...
「頭先我刻意令嗰兩個無腦既執行者放下介心，利用佢地既名冊同佢地既EVE系統產生共鳴~」阿月得意洋洋咁望住我...
『利用佢地既名冊?你偷左佢地既名冊黎用?』我有D唔係好信阿月既說話...
「No~No~要利用名冊係唔駛真係偷過黎用架~你識唔識野架~」阿月更加得意洋洋...
我承認喺EVE系統方面，我既認識係俾阿月少...
「我地之所以要借用名冊同EVE系統連動既原因，係因為我地有一度心之壁阻隔左我地與EVE系統既連接嘛~」
『嗯嗯...』呢點我明丫。
「而名冊就係一條通道，一條穿破心之壁接通我地心靈同EVE系統既通道丫嘛~」
『嗯嗯...』呢點我都明丫。
「所以只要我地將心靈打通，就可以利用人地既名冊與EVE系統連動啦~」
『嗯嗯...』呢點我開始唔明...
「頭先我就係將嗰兩個無腦既執行者既心靈打通，利用佢地既名冊與EVE系統連動，繼而同EVE系統產生共鳴~」
『嗯嗯...』完全唔明...
其實，我一直都唔明點解阿月可以同EVE系統產生共鳴...
要知道，就好似之前所講，我地只可以“懇求”EVE系統得到某D幫助...
得到某D好基本既幫助。
“懇求”既過程唔會得到回覆，亦唔可以爭取得到更多。
你只可以不斷嘗試唔同既“懇求”去確定有D乜野“懇求”係可以，有D乜野係唔可以。
呢種“懇求”過程正正就同你“懇求”上天俾D野你一樣...
你“懇求”上天俾生個女，但你可能只會生個仔...
你“懇求”上天俾你有美好既工作機會，但你可能會忙到死...
你“懇求”上天俾你中六合彩，但你可能只會中兩個半字...
我地既“懇求”就係咁，而且仲要係唔得既就一定唔得...
就打個比如，對防禦者EU作出全面控制既請求咁，EVE系統唔答應就唔答應，唔會因為你提出多幾次要求就會答應你...
你最多可以要求防禦者EU去邊道巡邏，去邊道駐守，但就連防禦者EU既數量都唔俾你設定...
但阿月所指既同EVE系統產生共鳴絕對唔係“懇求”EVE系統得到某D幫助咁簡單...
當阿月同EVE系統產生共鳴之時，佢可以感知到EVE系統想點樣...
更深入D既仲可以感知到EVE系統既情況...
而更厲害既係，阿月可以向EVE系統“修改”到某D決定。
就好似我地既防禦者RU...
我地既防禦者RU就係由阿月向EVE系統作出修改取得防禦者EU既控制權。
呢一點真係好匪而所思!
你又點會諗得到呢個世界上竟然有一個人可以影響到上帝既決定?
當然，亦唔係所有野都可以...
阿月曾經講過，雖然佢可以同EVE系統產生共鳴，但都仲有好多野做唔到...
原因就連阿月自己都講唔出...
阿月只係話呢種情況好講感覺，就好似愛情咁係無得解釋，只有靠感覺去感受...
講到呢到，我就更加唔明...
女人...再理性既女人都係憑感覺行事既生物...
我地男人係唔會明架啦...
我地架車一直係架空高速公路行駛，阿月一路講...
「你知唔知我發現D咩呢~我發現左天水圍領域既EVE系統比我地既弱好多~」
『嗯嗯...』弱好多?咩意思呢?
「佢地既EVE系統既阻力無我地既咁強架~我同佢既共鳴差唔多可以達到同步既級數~」
『嗯嗯...』同步又係乜野黎?
「我直頭差D就可以控制到一部防禦者EU~真係好奇妙~」
『妳既意思係妳差D可以控制到天水圍既EVE系統?!』我無辦法再扮鎮定!
要知道可以控制EVE系統就等於控制一切!
到時莫講話可以令LILITH再次回復到無限，就連SPIRIT既秘密都可以完全破解!
「又唔可以咁講...點講好呢...總之就係離控制EVE系統仲差好遠好遠啦~」阿月遙遙頭...
車~仲以為有咩大發現...
控制唔到EVE系統就做鬼都唔靈啦...晒氣...
「哥哥...你既眼神好似話俾我聽你對我既大發現好不屑喎...」阿月怒啤住我...
『唔係唔係~梗係唔係啦~繼續繼續~』千萬唔好得罪阿月...
「雖然天水圍既EVE系統比較弱，但LILITH就好好多喇~如果佢地一直保持而家咁既用法，照我估計應該可以用多十年左右~」
『嗯嗯...』呢點岩岩劉天奇先講完黎。
「而且呢兩三年黎，佢地都好似無乜點做D大型研究~」
『嗯嗯...』好似話係要保留僅存既LILITH呀嘛...
「而更重要既係，我嘗試過走入唔同行者既心靈，發現佢地都好懶散~」
『嗯嗯...』等等先!『妳話妳走左入人地既心靈裏面?!』
「係呀~」
『妳竟然可以走入人地既心靈裏面?!』我面帶驚訝咁望住阿月...
「係呀~雖然我唔可以控制到EVE系統，但我可以借EVE系統走入人地既心靈~我無話過俾你聽咩?」阿月左手食指掂住嘴唇，雙兩向上碌，扮晒諗野咁...
『無喎!妳從來都無講過妳可以借EVE系統走入人地既心靈喎!點解可以唔駛控制EVE系統都可以走入人地既心靈架?』不能理解...
「點講好呢...應該話...情況就好似read only咁，我只有讀取既權限，就無修改或者儲存既權限~所以我只可以感應到人地既心靈~但就唔可以控制別人或植入記憶囉~」阿月用左手食指喺我額頭前面篤下篤下...篤下篤下...
『唔明...』植入記憶...等等先!『妳之前對換腦既人...』
我仲未將我要講既野講完...
「就係儲存權限喇~嘻嘻~」阿月對我莞爾一笑...
儲存權限...咁則係話平時做換腦手術前，阿月所謂既事前催眠就係利用EVE系統幫人植入記憶?!
突然覺得眼前既阿月好可怕...
『妳又話妳同EVE系統之間只有read only既關係既?妳會唔會已經入過我個腦架啦?!』越諗就越恐怖...
「你話呢?嘻嘻~梗係無啦~EVE系統唔係你諗得咁簡單架~」阿月再用左手食指一篤，篤落我額頭...
我已經諗得好複雜架啦喎...
「你要知道我黎左屯門都有三年啦~呢三年裏面我不斷嘗試同屯門裏面既EVE系統產生共鳴先可以取得咁多既同步率~」
好啦...阿月又開始講D我唔明既野啦...
「雖然喺我黎到之前，你地就已經可以懇求EVE系統幫你地進行記憶植入，但始終都有無法預測既情況出現~」阿月用左手食指篤一篤自己個頭。
『嗯嗯...』的確曾經試過植入太多記憶令執行者喺手術後失常...
三年前，仲未將阿月救返黎之前...
我地可以懇求EVE系統幫我地進行記憶植入，只要達成某D條件...
但係...我地唔可以好準確咁控制植入記憶既數量...
我地曾經試過好多次人體實驗，發覺植入十日既記憶係對植入者最有效既數量。
但我地無辦法向EVE系統設定只入十日既記憶...
我地只可以喺植入記憶程序既時候，計算出大約植入十日記憶既數量，強行終止植入程序。
呢種做法係當時唯一既方法，但係風險非常高...
好多時因為強行終止既時候發生無方預測既錯誤，令到植入者思想錯亂甚至腦細胞死亡...
直到阿月開始運用“催眠”技術後，植入記憶成功率高達99%。
而且可以準確咁植入十日內既記憶。
「岩岩喺天水圍測試過先知，原來唔同領域既EVE系統都有唔同既自我層次~而我地既EVE系統既自我層次係高好多架~」阿月雙眼閃亮閃亮...
『嗯嗯...』我連自我層次係乜都唔知...
「我用左一個月既時間先可以同我地既EVE系統產生共嗚~而用左差唔多半年時間先取得10%既同步率，足以植入記憶~又用左差唔多兩年時間先取得30%同步率，令防禦者EU脫離EVE系統控制~」阿月雙手合上，放到嘴邊。
『嗯嗯...』30%就可以令防禦者EU脫離EVE系統控制...如果100%既話...會係點架呢?
「如果喺元朗領域既話，可能真係好快就可以達到100%同步~」睇住阿月對食指係嘴邊彈下彈下。
100%!
我真係好想知道如果乜乜同步率去到100%既時候，係唔係可以創造世界!
咁係唔係應該計劃下混阿月入元朗領域呢?
「不過諗返轉頭都幾危險...原來EVE系統有一種不穩定性，就好似人一樣會發脾氣~岩岩頭先嘗試再接近天水圍既EVE系統多一D，佢竟然突然拒絕我!仲想入侵我個腦!好彩我醒目~立即將意識脫離~不過就暈左囉~哈哈~」阿月係道傻笑...
『下?妳頭先暈左架?!』我好緊張咁捉住阿月膊頭，望清楚阿月。
「暈左一陣又攰得制瞓左一陣咁囉~無野喎~我而家仲好清醒丫~」阿月仲係笑笑口咁...
『妳丫...下次唔好再做埋D咁危險既野喇!有咩計劃有咩行動都要同我商量下。唔好再擅作主張自把自為喇知唔知道?』我好認真咁望住阿月。
「知啦知啦~我知道就算我有咩事都好，哥哥都會救我架嘛~嘻嘻~」阿月又對我莞爾一笑...
大姐...妳鑊鑊新鮮鑊鑊甘...我救得妳幾多次丫...
睇黎EVE系統真係好危險...我唔應該要阿月冒咁多險...
我地既車由架空高速公路，開始減速，向地面行落去。
但呢個方向...
『阿月...我之前好似向EVE系統提出返去控制中心架喎...點解而家好似...』我仲未將我要講既說話講完...
「係呀~我轉左目的地嘛~」阿月就打斷左我...
岩岩先講完唔好再擅作主張自把自為，頭都未轉就已經唔記得左我講過既野...
『咁而家係去梗邊呢?』我左望望，右望望，好似係去梗人民區域...
「去食野囉~好肚餓啦~」阿月雙手搓一搓個肚，扁晒嘴咁扮肚餓...
『而家幾點?』喺永遠都係黑色既天空下生活，永遠都係黑夜...
「7點喇~夜晚7點喇~」阿月突然喺空氣中拉出一塊顯示出“19:00”既EVE粒子實體顯示器出黎。
『食野可以返去控制中心食架姐...』我仲未將我要講既說話講完...
「唔好啦~難得可以出黎行下~食埋飯先返去啦~」阿月雙手拉住我手臂搖下搖下...
扮咩丫...妳成日都偷偷地祟出黎架啦...
『好啦...好啦...食埋先返去啦...』其實我都係一個口硬心軟既人...
「好野~都話哥哥最錫我架啦~嘻嘻~」阿月又對我莞爾一笑...
唉...點解我硬係覺得自己一直都俾隻小惡魔牽住走架呢...
我地架車停左係路邊之後，阿月已經急不及待，邊解開安全帶，邊打開車門...
「快D啦哥哥~」阿月已經喺街道上面跳下彈下。
望住眼前既阿月，明明就係一隻蝴蝶...
一隻自由自在係空氣中飛揚既蝴蝶，唔應該困喺黑暗之中...
妳應該喺七彩繽紛既花圃上輕舞...
妳應該呼吸自由既空氣...
妳應該擁有幸福美滿快樂既人生...
被妳所愛既人擁抱...
被愛妳既人親吻...
『阿月...妳有無後悔黎左呢道?』我將喺我面前飛梗既蝴蝶叫停左...
阿月回頭望一望我，諗左一諗，帶住微笑同我講:「唔係哥哥將我救返黎既話，我諗我已經死左啦。」
雖然我救左妳返黎，但又好似摧毀左妳既幸福...
呢種心情真係好矛盾...
「哥哥，唔需要諗咁多。就算走進黑暗既隧道，都會有光明既出口。真正既幸福好快就會降臨。」阿月既笑容充滿肯定，就好似一手掌握未來一樣。
阿月行到我身邊，翹住我手臂:「相信我，我從來都唔會呃你。」
同阿月一直係街上行，感覺真係好溫暖。
阿月認真起黎會散發出一種令人安心既感覺。(只限認真既時候...)
總係覺得就算世界末日要黎到，阿月都係一直喺你身邊。
但係當佢要離開你既時候，就講都唔講聲，頭也不會咁走左去...
你永遠都唔知佢要去邊，幾時會返...
只係知道當佢想返黎既時候，佢就會返黎...
呢種性格同貓有D相似...
亦可能因為阿月既性格有D似貓，所以D貓都好鍾意黐住佢。
喺有如黑夜既街道上無星空既光，無明月既光，就只有飄浮喺空氣中既EVE粒子同街上既EVE實體招牌作照明。
行人路上除左我同阿月，仲有唔少既人，屯門領域既人民。
每一個人都帶住愉快既微笑擦身而過。
生活喺SPIRIT裏面既人，本來每一個都好愉快好開心咁生活。
至於而家...我只係知屯門領域既人民都總算過得開心...
事實上，我並無將LILITH就快用盡既事對我地既人民作出隱瞞。
相反，我每日都會透過EVE系同我地屯門領域既所有人民公佈LILITH既使用情況。
因為我深信，我有責任向我地領域裏面每一個人民坦白。
我地唔可以蒙騙我地既人民。
因為整個社會唔只係屬於我地。
整個社會係屬於呢道所有既人民。
「哥哥~係呢道啦~」阿月拉停左我，指住面前一個大招牌。
招牌上寫住幾個字－“客似雲來”。
「行喇行喇~好肚餓啦~」阿月拉住我行入呢間食肆。
穿過壓縮空氣閘門之後，食肆裏面既客人都唔少。
一個又一個客人好開心、好愉快、好滿足咁食梗佢地既...
『雲吞麵?』十張檯有九張既客人都係食梗雲吞麵。
「係丫~呢道既雲吞麵好出名架~坐呢道坐呢道~平時我都坐呢張檯~」阿月拉住我行到一張兩人檯面前。
『妳成日都偷走出黎食雲吞麵...』我一個冷眼射向阿月。
「嘻嘻...講呢D~入黎既時候我已經幫你ORDER埋個雲吞麵架啦~我地等食就得啦~」阿月由檯邊既盒仔裏面拎定兩對筷子出黎，抹下抹下。
又擅作主張自把自為...
睇住每一個客人食完野之後，都會帶住幸福既心情離開。
相信呢間麵店一定好好食。(當然啦，阿月呢個咁高要求既人介紹得就一定好好食。)
但除左呢間麵店好食之外，我相信仲有另一個原因...
原因就係...等價交換。
當我地發現左“規條”之後，我地就再無用“錢”去衡量物品...甚至一個人既價值。
因為規條第四條列明:不可創造價值的代用品。
金錢本來係一件代表你付出過幾多努力既代用品。
可惜唔知由幾時開始，有人利用金錢既差額去賺取更多既金錢。
一買，一賣。
唔需要付出任何努力貢獻社會，就可以賺取豐厚既金錢。
人既終極目標係不勞而獲，貪婪同怠惰...
因為你既貪婪同怠惰令到其他人活喺苦難之中...唔可以忍受。
但好似我地黎種烏托邦係點樣建立出黎?
首先就係要潔淨每個人既心靈...
七宗罪係由傲慢開始...
人既傲慢生出嫉妒之心...
嫉妒之心令人憤怒...
過於憤怒會使人怠惰...
越怠惰就會越貪婪...
貪婪不知足，生成暴食...
暴食無節制就會勾起色慾...
如果要建立一個理想既烏托邦，就要將呢D罪行一一清除。
修得謙卑、寬容、耐心、勤勉、慷慨、節制、貞潔呢七美德。
所以，基本上SPIRIT裏面既人，個個都係行者。
天生我才必有用。
我地只要做好自己想做，自己會做既事，就可以享受、享有、享用別人既努力。
因為，人地都有權享受、享有、享用我地既努力。
當然，唔係每個人都可以咁完美...
唔係每個人都可以修成正果...
『阿月...照妳睇...妳估呢種社會體制仲可以運行幾耐?』我好認真望住阿月。
阿月望一望我:「你真係想聽真話?」
阿月好似睇穿晒我個心諗乜...你話佢無走過入我心靈都無人信...
「再係咁落去既話...半年內，SPIRIT就會崩壞。」阿月亦好認真咁回答我。
『半年...』連阿月都咁講...
「你應該好清楚，天水圍甚至元朗既情況係點...」阿月將兩對筷子放好。
『佢地既心靈已經腐敗...』無錯，唔單只天水圍，元朗都係。
「人類，始終都係人類，人類係無完美。就算係幾咁堅定既預行者都會有一日腐敗。」阿月指一指我。
『我唔會。』我好肯定咁否定阿月既指控。
「你會，只係仲未係時候。」阿月展露出俾我更肯定既眼神。
仲未係時候?
人去到某個位置就會有某個位置既心境...
我唔認同...
我相信呢個世上有純淨既人類...
就好似死海文書所提到既一樣...
「不過都唔緊要啦，反正唔駛過多一個月，呢道既一切都會毀滅...可能會係整個香港...甚至乎係整個世界...」阿月攤開雙手，唔多在乎既樣...
仲有唔夠一個月...
如果...當LILITH耗盡之後...破壞情況真係咁嚴重既話，而家做乜都係白費...
到時就唔係審判...係殲滅...
「兩碗雲吞麵~」一個胖胖地既中年男人將兩碗雲吞麵放到我地面前。
「唔該晒丫老闆~」阿月好開心咁對住老闆笑。
原來係呢間雲吞麵店既老闆...
睇黎阿月仲同老闆幾熟落...
「小妹妹~今晚帶埋個男朋友仔黎撐檯腳?」老闆同我地開個玩笑...
『我係佢阿哥。』我好平淡咁解釋我地既關係。
因為都唔係第一次有咁既誤會...
「嗯嗯~佢係我孿生哥哥~」阿月一路食麵一路講。
「哦?我睇佢好似大妳幾年咁既樣，原來你地係龍鳳胎架?哈哈~」老闆有D尷尬。
『係囉...都咁大個人仲生到好似個細路女咁...』我又試一試個雲吞麵...果然好味!
「係你生得老姐。」阿月送左個冷眼俾我...
係妳唔得老姐...成廿歲人都仲成個細路女咁既樣...
睇黎阿月呢種人，到左八十歲都係變成不老妖怪...
我真係好懷疑喺地獄生活既人係唔係襟老D...
「話時話，你好似有D面善...你係...統治者?」老闆認真打量左我幾眼。
『嗯嗯，我就係統治者陳日。你好。』估唔到有人會認得我。
都話左，其實我同一個普通人無分別，所以基本上屯門裏面無乜人會在意我。
「噢~估唔到呢位小妹妹既阿哥就係統治者~你好呀~你好呀~」老闆同我握手。
你更估唔到呢位小妹妹一D都唔小...
「我個仔一直都好想可以快D成為隨行者~佢一直都好努力修行~」老闆拍一拍我膊頭。
隨行者...
『隨行者...成為隨行者之後，就會有機會接受危險既任務...跟隨執行者出去地獄執行任務...你唔怕你個仔會犧牲咩?』今日既事令我不禁有D保留...
呢幾年...為左實行死海文書...我地已經犧牲左好多好多行者...
由其係由我統治屯門之後...
死海文書所記載既任務就更加凶險...
老闆呆一呆咁望住我...之後笑笑口講:「哈哈~我地SPIRIT既人係唔可以有自私既心。如果因為怕死，就唔去拯救呢個世界，唔好話行者，留係道既資格都無。兩位慢用啦~」
老闆再拍一拍我膊頭後行返去做佢自己既野。
無錯...我地唔可以有自私既心...
就算明知要犧牲，都要付出一切，拯救呢個世界。
真係失禮...竟然就連咁基本既信念都唔記得左...
「哥哥~快D食啦~再唔食D麵淋架啦~」阿月一面滿足既樣...
其實幸福可以好簡單...
一段自由既時間...
一碗好味既雲吞麵...
一份分享既喜悅...
簡單得黎已經好幸福...
「係唔係無介紹錯呢~」食完麵之後，阿月翹住我步出客似雲來。
『嗯，真好好食。』我好耐都無試過好好品嘗一下食物既味道。
由我接管屯門領域開始，我經常要面對生離死別，根本就無心情去品嘗美食...
究竟老豆係點樣練到咁狠心...咁冷血...
「革命必須有人犧牲。」老豆經常掛住呢句說話喺嘴邊。
究竟仲要犧牲幾多?
距離死海文書越近，犧牲既人就越多...
血，化成墨...
肉，化成紙...
我地用生命去實現死海文書...
去到呢一步，已經唔可以返轉頭...
或者有一日，我都會習慣...
習慣革命必須有人犧牲...
『阿月，妳返去先，我仲有野要做。』我地架車返到去控制中心後，我叫阿月返去先。
阿月望一望我，諗左一諗:「嗯，咁哥哥都唔好咁夜返喇。」
望住阿月既背影，有時佢都幾善解人意既，係好勝唔服輸姐...
咁多年黎，究竟嗰個李飛揚喺點樣同阿月相處架呢?
佢點忍得到我呢個細妹架...
我相信如果唔係都係黎自火星，係無可能相處到...
唔係俾佢激死左，就係忍唔住殺左佢...
講開又講...李飛揚...我應該要點處置你?
我一路穿過幾條黑暗既通道，沿樓梯上左幾層，又轉左幾個彎，一路喺道諗...
其實我早有主意...
不過就係唔肯定呢個做法係唔係最好...
始終都有風險...
但係...要做到平衡...要做到保險...要做到制衡...呢個又係最好既方法...
至少阿月唔會反對先...
不過...我又唔可以咩都順從阿月...
唔可以俾佢覺得咩都喺佢掌握之中...
如果唔係，就好難叫得郁阿月...
始終要有D揸拿喺手先得...
上上落落轉左幾個圈，終於黎到一個特別既大閘門前...
“吱...依...”設置喺閘門中間既鎖隨即打開。
呢個特別既大閘門後面...係我既房間...
呢間房係統治者既房。
唔好以為有道咁浮誇既閘門，裏面一定收埋左好多不可告人既秘密!
其實，裏面比民居更普通。
我要再講一次，統治者與平民既待遇係一模一樣...
黑色既牆身，黑色既Sofa，黑色既檯凳，黑色既擺設，幾個飄浮喺空中既EVE粒子...
基本上同阿月嗰間係完全無分別。(大小小咁啦...)
我都唔明點解要搞道咁浮誇既閘門...
如果要話比較特別既，我會話最特別既係懸浮喺整間房間中央既高振動EVE粒子刀。
呢把放大版綁帶戰術刀刀片長度25英寸，以世界之木既分子製造出黎，並用左塑鋼刀鞘。
為左加上合適既重量，我地仲用上碳纖維加上高碳鋼混合製成。
至於點解加左重量都會懸浮喺空中...為左型所以加左磁浮效果...
灰灰黑黑既刀背處設有破壞力增加的背齒，盡展戰略訴求。
咁究竟呢把刀又有咩咁特別?
特別就特別在佢係行者喺結界範圍內既常規武器。
我地一般既行者，都會配備兩樣裝備－特製既匕首同高振動EVE粒子刀。
匕首並唔係常用武器，一般情況都唔用把匕首戰鬥，匕首只係代表你係一個行者。
已更具意義既係人在，匕首在;人亡，匕首亡。
當行者化為輕煙，匕首都會一齊化為輕煙...
而高振動EVE粒子刀只會喺結界範圍使用...應該話只可以喺結界範圍內使用...
一般情況，行者都會配帶高振動EVE粒子刀喺腰間。
有需要時，就會喺腰間拔出高振動EVE粒子刀作出防禦或防禦性攻擊。
而我之所以返黎我間房，就係為左拎呢把高振動EVE粒子刀。
喺空中拎過高振動EVE粒子刀後...
『喺時候要完成我今日最後一件工作...』
就算係幾咁難受...
幾咁傷感...
幾咁放唔低...
我都要親手做好呢件事...呢件重要既事...
呢件重要既事就係...為今日犧牲既每一個行者製作墓碑...
我一路行，一路沿住墓園方向行...
沿途上，我都一直有留意旁邊既世界之樹...
一棵又一棵，一棵又一棵，究竟邊一棵比較適合做墓碑呢?
每次挑選都唔會求求其其，每次挑選都認認真真。
呢個係對犧牲左既行者既一份尊重。
戰爭已經經歷多時...
犧牲已經太多...
但人唔作出犧牲，就唔會得到任何回報，想得到一樣野，就必須付出同等既代價。
呢樣就係等價交換。
但當然，有好多野係唔可以用等價黎交換，就好似生命。
一條已經失去既生命，你係點都換唔返返黎。
但我地而家就正正不斷付出生命，黎換取自由。
咁...自由既代價係唔係就係要付出大量既生命呢?
喺墓園附近穿過一棵又一棵世界之樹。
世界之樹上既樹葉所發出既綠光有強有弱，我就係要搵一棵發出比較暗啞既世界之樹。
呢種發出暗啞綠光既世界之樹相對比較老，比較老既樹幹先可以造出沉實既墓碑。
我一直行，一直喺閃爍閃爍既綠光下行...
『嗯?我終於搵到你啦...』行左半個樹林，終於俾我搵到棵發出暗啞綠光既世界之樹。
喺發出淡淡綠光既世界之草草地上，我將手中既高振動EVE粒子刀放到腰間，左手握住刀柄，對住面前棵世界之樹，擺出拔刀術既姿勢...
『喝!』
“嗡...”刀刃高速將樹幹打橫切開。
“隆...”整棵世界之樹就咁瞓左喺草地上。
樹幹流出藍色既液體、飄出藍色既粒子...
LILITH...
LILITH續少續少咁流出，續少續少咁飄散...
好!襯樹幹仲未硬到砍都砍唔開之前快快手手整墓碑!
今日有50個兄弟犧牲...
“嗡...嗡...嗡...嗡...嗡...嗡...嗡...嗡...嗡...嗡...嗡...嗡...”我純熟咁揮舞手中既高振動EVE粒子刀，喺樹幹上分出同等大小長短既墓碑。
50支...無多無少岩岩好。
再繼一喺上面刻上代表SPIRIT既五芒星標誌...
好...跟住就係要整齊平均分好位置...
我將一支又一將墓碑插到草地上，一支一支向EVE系統定名...
“隨行者 馮楚誠 2093-2113”...
一個又一個...
“隨行者 葉嘉華 2094-2113”...
一個又一個...
“隨行者 徐如玉 2093-2113”...
一個又一個...
“執行者 張啟明 2092-2113”...
一個又一個...
“執行者 吳敬業 2092-2113”...
一個又一個...
“執行者 陸凱敏 2093-2113”...
一個又一個...
TO BE CONTINUED