《香港革命戰》(上): [14-事前準備] PART 4

穿過折疊之門後...

「好好~好好~拍得真係非常好丫~」阿月已經拎起左部相機黎睇。

『有幾好丫?等我睇下...』我探頭到阿月同綽姿之間，望住相機個LCD...

唔係講笑，又真係幾好喎~

One shot到尾中間無停頓，無刪剪。





全條片都充滿住戰後既感覺...

滿目瘡痍、哀鴻遍野...

只係睇片都有一種絕望既感覺...

睇下睇下真係有D想喊出黎添...

究竟點樣可以拍到咁震懾既片既呢?





綽姿真係好有呢方面既天份。

『好!有左呢段片，我好有信心一定可以引起李飛揚既注意!綽姿做得好好!』我拍一拍綽姿既膊頭。

「誇獎喇。」綽姿冷冷咁搖搖頭...

都仲係咁冷淡...點搞...

「好喇好喇~唔好講咁多喇~快D去食lunch喇~好肚餓~」阿月已經拉住我地兩個隻手行。





『等等等等...未得住...我要趕住拎條片俾阿風，等佢將條片植入名冊架!』我拉返停阿月...

「食左先啦~你都唔想餓親綽姿架~綽姿都餓喇呵~」阿月繼續拉...

綽姿都點點頭...

『咁...妳地去食先喇，我拎張card俾阿風搞。』我一邊將張card由相機裏面拎出黎，一邊講。

「咁喇，我地去飯堂等你，你搞掂就過黎搵我地啦~」阿月終於肯放開我。

『嗯嗯。』

「快D呀~我地等埋你先食架~唔好要我地等你等到餓死埋呀~」阿月見我行得唔夠快，吹多我兩吹...

『得喇!』





我都係跑快兩步，唔係既話一陣又俾阿月話...

阿風既位置早就喺我既思緒中出現。

研究室...地底層第50層既研究室...

其實都係喺控制中心入面...同阿月佢地一齊行都得架姐...

算啦~都係唔好近阿月咁多...

好彩既係綽姿就快要去地獄執行任務，唔駛再俾阿月荼毒...

一路沿住去研究室方向跑，一路諗...





又走返黎黑黑綠綠既世界裏...

綽姿問得好，我地SPIRIT幾時先會見到陽光呢...

心理學家話，人長時間逗留喺黑黑暗暗既環境下太耐，喺比較容易產生抑鬱症。
諗野特別灰，比較絕望，容易向悲觀方向發展。

不過...我比較相信...就算係走入黑暗既隧道，都會走到光明既出口。

只不過係時間問題...

只要我地一直跑，一直向住目標跑，終有一日都會走出黑暗!

一路跑，無停過落黎咁一直跑，好快就跑返去控制中心。





我既身體機能其實係可以快過車，而且就連一D累既感覺都唔會有。只要喺精神液生效期間...

當然唔可以去得太盡...

化學既野都好似化妝品咁，用咁多化學野喺塊面道遲早只會變怪物...

怪物...我地都係怪物...

我都係一隻一直依賴化學物品既怪物...

之但係...我唔可以唔依賴精神液...

至少到而家都仲未可以...

擦過幾個巡邏緊既防禦者RU，跑到升降機面前，升降機門已經為我打開。





EVE系統真係好方便。

雖然話係封閉式系統，但一般既應用都應有盡有。

我深信除左神之外，真係無人可以設計出咁高智慧既AI系統...

可惜...可惜再完美既系統都係要俾人類破壞...

人類真係一種萬惡既生物...

點解可以有人類既地方就有破壞...毀滅...

人類真係好可怕...

升降機一路向下降，綠綠黑黑既樓層一路向上飛...

唔知阿風有乜進展呢?

會唔會搵得佢太急呢...

唔好理~將D相同條片交左俾佢先算~

喺地獄裏面D老細做野係咁架喇~

唔駛理D奴隸做唔做得切，一咪係咁起勢推俾D奴隸就得架喇~

嘿嘿...其實我都係一隻醜陋既惡魔...

無辦法...時間無多...

“颼”壓縮空氣門打開，已經到左地下72層。

整層地下72層都被一塊又一塊壓縮空氣幕牆間出一間又一間房間。

間房入面掛滿一個又一個EVE粒子實體顯示器，五顏六色，七彩繽紛。

工作人員好認真咁研究...

呢層既研究工作大部份都係針對LILITH。

可以對LILITH作出研究既當然唔會係一般人...

所以喺道工作既人大部份都係執行者。

當然亦唔少得先行者...就好似阿風...

眼前已經出現左綠色光線，引導我走去阿風既導引線。

我沿住導引線一直行...

幾個披住黑袍既執行者喺我面前跑過...

又有幾個披住黑袍既先行者喺我身邊擦過...

大家都好忙呢...

為左SPIRIT大家都好忙...

好忙咁希望可以盡自己既努力救返呢個世界...

自私D講句係救返自己...

但點解有D人可以自私到為左自己，繼續破壞呢個世界?

我真係唔明...

「阿日?你黎搵我呀?」阿風把聲由前面傳黎。

原來唔經唔覺已經行到去阿風面前。

『係丫係丫...係呢...部iPad整好未?』我望一望四周，望一望阿風既研究室。

研究室裏面有好多好多塊EVE粒子實體顯示器浮喺空中...

顯示器裏面有好多數據...有好多圖形...

房裏面仲有好多機械...

「邊有咁快呀?你當我變出黎架?你地D人就係咁架喇，成日以為電子野呀科技乜乜都係變出黎既!唔駛時間整既!」阿風一輪嘴係咁嘈...

問下姐...駛唔駛呀...

『唔係唔係...我隨口問下姐...我黎係想俾D野你既...』都係正經野緊要。

「俾D乜野我呀又?」阿風仲係好唔順氣...

『呢張card入面有D相同片，D相就入落部iPad道，片就植入去名冊道...』我將張card交俾到阿風手上。

「相就無問題既，但條片...你真係覺得境外有足夠既能量，啟動名冊既影像程序咩?」阿風接過張card後望兩望。

『呢個問題阿月都有提及過...』我仲未將我要講既野講完...

「就連阿月都咁講...」阿風將我既說話打斷...

阿風行左幾步...諗左一諗...

「境外EVE既存量實在太低...縱使誡律之牆可以由地底墓穴，傳送微量既EVE能量到誘發器...無LILITH既穩定下，能量消耗得太快...」阿風搖搖頭...

『之前咪提及過，可唔可以連埋一D LILITH傳過去既?』我記得之前同阿月都提及過...

「諗都唔好諗...」阿風堅決咁否定左我既提議...

『點解呢?』我就真係唔明...

我記得當日阿月都只係話要研究下先...

「如果唔可以帶埋ADAM過去既話，有機會產生恐怖既後果...」阿風繼續搖搖頭...

『下?』唔明...

「無ADAM中和下，EVE同LILITH兩者共生只會有一個後果...大爆炸...」阿風攤開雙手成一個大字型。

『大爆炸?』我嘗試喺腦裏面幻想一下爆炸既情況...

「無錯...大爆炸...講係唔夠震撼...我好似整過個模擬程式...」阿風一路講就一路搞個顯示器...

顯示器裏面既視窗不停咁飛過...

「係呢個喇係呢個喇~」顯示器隨即喺我地中間散開，散出一個立體顯示，「嗱我就搵左境外黎做模擬地區~」

『嗯嗯...點解要搵境外黎做模擬地區呢?』我望住螺旋形既城鎮。

「容易D睇丫嘛...你唔好打亂我好唔好?」阿風整理一下個立體模型。

立體顯示器顯示出黎既立體模型好似真一樣...

「嗱~呢道有兩條棒，一條綠色，一條藍色。」阿風喺個立體模型拎起兩支棒。

『嗯嗯...』

「綠色代表EVE...」阿風拎一拎高支綠棒。

『嗯嗯...』

「藍色代表LILITH...」阿風拎一拎高支藍棒。

『嗯嗯...』

「首先我地試下如果SET多D LILITH...70%...EVE少D...30%...」阿風將藍棒拉長D...綠棒拉短D...

阿風左手拎住支藍棒，右手拎住支綠棒，再將兩支枝溝埋一齊...

左右手搓下搓下...搓下搓下...慢慢變成一個青藍色既球體...

「睇野喇~」阿風一邊講，一邊向住境外擲出青藍色球體。

“轟隆”一聲...

『嘩!』一道耀眼既青藍光令我短暫失去視力...

『喂!你搞咩呀?』過左一陣我先可以睇得返野...

「你睇下先你睇下先~」阿風指一指個境外模型...

『有咩好睇呀?咪原原整整咩都無變囉...』我望住完好無缺既境外模型...

「你再睇清楚D~」阿風繼續指住個境外模型...

我留心D睇，睇清楚D...

我發現...個境外模型...

『變左青藍色?』我繼續留心觀察...

的確...境外模型被一層薄薄既...薄薄既青藍色空氣包圍住...

「個情景係唔係好熟口熟面呢~」阿風亦聚精會神望住個境外模型...

嗯...呢種情景...呢種空氣...

「地洞...LILITH既地洞...」阿風將視線放到我身上。

無錯!同地洞一樣!

只係地洞係藍色，呢個模型係青藍色!

『點解會咁?』我亦都將視線放到阿風身上。

「等我講講呢個情況會帶黎咩既影響先~」阿風一邊講，一邊拉出另一個EVE粒子實體顯示器。

顯示器上面有個折線圖...

圖裏面有好多條線...

又有好多數據...

「呢個折線圖就係顯示爆炸後得出既結果。仔細既你唔明架喇~我都係簡單咁講一講喇~」阿風喺個折線圖拉出幾條唔同顏色既線，有黃有綠有藍有紫有紅...

幾條唔同顏色既線係空氣中閃下閃下...

「呢幾條線就係顯示爆炸後既影響...我發現如果大量既LILITH同少量既EVE混合，就會產生一種爆炸...一種無殺傷力但會產生令電能瓦解既粒子...」阿風指住兩條線，一綠一藍...

『咁則係同LILITH既特性一樣喇?』我望住兩條線...

「有D唔同...我地呢道受LILITH影響下，電能一直被瓦解係唔係?」阿風望一望我。

『無錯丫。』無中止電能瓦解器之下，我地唔可以用電力，只可以用EVE能源。

「但你睇睇呢一條線...」阿風指住一條青藍色既線，「條線一直向下滑落...」

『則係?』我望住條正在滑落既青藍色線...

「呢條線代表空氣中混合左既LILITH同EVE粒子。粒子既數量正在減少，而且速度仲相當快...」阿風再指一指個境外模型。

我望一望個境外模型，模型裏面空氣既顏色明顯變淡。

「呢條黃色既折線一直向上升，而呢條折線就係代表模型裏面既電能。電能正正逐漸回復正常。」阿風指一指黃色既折線。

電能回復正常?無錯...

『LILITH一到結界範圍外就會立即消失!就算好似喺黃金海岸呢種邊界範圍，都只可以維持影響電波運動!』無錯!自然流向邊界既LILITH粒子都只係可以維持影響電波運動水平...

「唔單止咁。我地用黎呃MINDER，注入腦裏面既假晶片內既LILITH粒子，亦只可以維持三個鐘。」阿風指一指自己個頭。

『無錯...喺外面既話，LILITH粒子就會消耗得好快...』我又諗左一諗...

「你睇下個模型，空氣中既粒子已經完全消失，電力回復正常。而我同你傾左都唔夠三分鐘，所以你話消耗速度幾咁驚人...」阿風望住個模型...

的確...模型中既青藍色粒子已經完全消失。空氣回復正常。

少量既EVE加上大量既LILITH...唔夠三分鐘...

『咁如果個比例改一改...大量既EVE...加上少量既LILITH?』我突然對科研產生左興趣...

「好~首先要Reset左個模型...OK...跟住就係要SET多D EVE...70%...LILITH少D...30%...」阿風將模型Reset左之後，再將綠棒拉長D...藍棒拉短D...

阿風左手拎住支藍棒，右手拎住支綠棒，再將兩支枝溝埋一齊...

左右手搓下搓下...搓下搓下...慢慢變成一個青綠色既球體...

「再睇野喇~」阿風一邊講，一邊向住境外擲出青綠色球體。

“轟隆”一聲...

『嘩!』一道耀眼既青綠光令我短暫失去視力...

過左一陣我開始睇得返野...

而眼前既景象比之前更震撼...

眼前既境外塵土飛揚...

中間被炸出一個大洞...

大部份建築物都被催毀...

有好多條綠綠地色，好似閃電咁既電流由大洞中心閃出黎...閃方四周...

被電流擊中既物體都會立即灰飛煙滅...

『發...發生咩事...』驚嚇既心情仲未減退...

「震撼呢~呢D就係EVE驚人既破壞力~」阿風睇起黎好雀躍...

『有D似...』我仲未將我要講既野講出口...

「荷電粒子砲?」阿風講出左我既答案...

『嗯嗯...』

「的確係有D似...不過...EVE所產生既能量裏面唔存在緲子塵...意思係被EVE爆炸摧毀既地方唔會受緲子塵影響變成焦土!」阿風指一指中心個大坑洞。

『不過就產生左無法控制既EVE電流...』我望住閃下閃下既綠色電流...

「無錯~EVE電流帶有高能量。呢D EVE電流相對荷電粒子砲有過之而無不及!被EVE電流觸碰到既話會直接分解!」阿風亦望住閃下閃下既綠色電流...

好強大...好強大既武器...

「不過...都係同頭先一樣~喺結界範圍外，EVE電流就會好快消失...」阿風呢頭講完，嗰頭D EVE電流就已經完全消失晒。

都已經足夠...

「相對黎講，EVE既消耗實質比LILITH更快...」阿風拉出一條青藍色同一條青綠色折線出黎比較。

頭先兩次實驗都係其中一樣多D...

『咁如果EVE同LILITH都係50%呢?』我真係對科研產生左興趣...

「Good question!」阿風將模型Reset左之後...建築物再次出現...

「EVE...50%...LILITH...50%...」再將綠棒同藍棒拉到同一高度...

阿風左手拎住支藍棒，右手拎住支綠棒，再將兩支枝溝埋一齊...

左右手搓下搓下...搓下搓下...慢慢變成一個青色既球體...

「再黎睇野喇~」阿風一邊講，一邊向住境外擲出青色球體。

試過兩次，今次我就真係無咁笨!

我以手臂擋住雙眼，避免受強光侵襲!

“轟隆”一聲...

藍色既強光由手臂間透入...

過左一陣...強光開始消失...

而眼前既景象同之前差唔多...

眼前既境外塵土飛揚...

中間被炸出一個大洞...

大部份建築物都被催毀...

空氣變成藍色...

整個境外都被藍色既空氣包圍...

而家既境外...十足十足LILITH既地洞一樣!

但係...

『咁同之前EVE多D既實驗有咩分別?』我冷眼望一望阿風。

「梗係有分別啦!你頭先都無睜大對眼睇清楚!」阿風又回返一個冷眼俾我。

我係會從歷史中吸取教訓囉!

「等我倒帶一次俾你睇!」

『下?喂!嘩!』我都仲未黎得切反應，眼前又出現一道刺眼既藍光...

刺眼既藍光又令我短暫失明...

過左好一陣...

『只係見到刺眼既藍光，其他乜鬼都睇唔到囉好唔好?』視力開始回復正常，我望住變成廢墟既境外模型。

「真係弱呀~咁都睇唔到~好喇好喇~等我黎講解下喇~」阿風拉出幾條折線...

D藍光強到咁，可以睇到乜鬼先得架...

「嗱~呢條綠色線係代表EVE產生既能量。你可以睇得到，由爆炸開始一刻，線瞬間向上升，但又好快回到零...意味住EVE能量喺爆炸既一瞬間完全被消耗。」阿風隻手指跟住條綠色線移動。

『咁又點呢?』我既視跟住阿風隻手指移動...

「你聽埋先喇!而呢條藍色線就代表LILITH產行電能瓦解既粒子數量。你可以睇得到，由爆炸一刻開始，線瞬間向上升，而且以好慢好慢既速度向下回落...意味住整個被LILITH粒子包圍既地方都會受長時間既電能瓦解影響。」阿風隻手指跟住條藍色線移動。

『咁又點呢?』我既視線跟住阿風隻手指移動...

「你聽埋先喇!帶有毀滅性既EVE能量會瞬間被消耗，而帶有電能瓦解既LILITH粒子會喺空氣中慢速消失，咁則係話境外唔係直接被EVE能量摧毀，境外係被EVE能量未產生出熱能前既衝擊波所摧毀。而且，衝擊波將LILITH粒子散佈全個境外。」，阿風用手指圈一圈個境外模型。

『雖然唔明...但好似好厲害...』我既視線跟住阿風隻手放到模型道...

「點止係好似?直頭係好厲害!單以衝擊波就可以摧毀一個城鎮，仲要唔會產生失控既EVE電流，爆完仲可以散播帶有電能瓦解既LILITH粒子!真係勁到飛起!」阿風十足十傳銷員...

真係好勁...

要有既野有...

缺點又全部無晒...

真係一件好厲害既武器!

『阿風，立即將呢樣野量產成武器!』有左呢種武器，莫講話解放軍...國安局...整個世界都可以打落黎!

「量產成武器?哈...正如開頭所講...諗都唔好諗!」阿風對住我搖搖頭...

『點解呀?』我估唔到阿風會咁樣回答...

呢件明明就係一件完美既武器!

點解阿風會話諗都唔好諗呢?

「先唔好講仲未研究出EVE同LILITH既黃金比例，就算係用咩容器載住都仲未諗到...」阿風繼續搖搖頭...

容器?

唔係求其搵兩個玻璃瓶載住就得喇咩?

「你要知道，EVE同LILITH隔左成個天同地都可以產生化學作用，咁你話我地可以用咩載住呢兩樣野運出去?無ADAM既情況下立即爆炸喇...」阿風不斷搖搖頭。

ADAM...

係喇!ADAM!

『我地可以喺世界之樹提煉架!世界之樹都有ADAM既特性架嘛!』無錯喇!假如世界之樹係ADAM既殘餘物質，咁應該都有ADAM既特性!

「你估我無試過咩?就係缺少左D重要元素~」阿風仲係搖搖頭。

『重要元素?咩重要元素?』我仲係唔甘心，嘗試追問。

「我都唔知...只係知道天空上既ADAM始終都係原核，同由佢遺留落黎既世界之樹甚至誡律之牆係有分別既...」阿風向上指一指...

原來有咁既一回事...

原核...ADAM、EVE、LILITH既原核...

我地可以接觸到地底洞穴裏面既LILITH原核...

我地可以借助阿月既能力與處身於EVE裏面既EVE系統同步...亦可以引導EVE落黎地面，經過聚合反應堆轉換成能源...

但ADAM...我地可以話無乜頭緒...

對於ADAM既認識我地真係唔係太清楚...

就連阿月都唔係咁了解...(或者其實阿月好清楚，但佢唔講姐...)

「所以喺未可以掌握ADAM之前，唔好諗要將LILITH同EVE帶去外面丫...」阿風將模型關閉...

真係好可惜...

本來係一件好厲害既武器...

始終都仲係未掌握得到...

未掌握得到神留俾我地既神器...

『係咁無辦法啦...你快D將iPad整出黎。我聽日就要將iPad交到智海手上。』我一邊向住門口方向行，一邊背住阿風講。

「喂喂喂...唔係呀化?你晒左我咁多時間同你解釋，而家就要我聽日俾到個iPad你?喂喂喂...」阿風一路喺我背後講。

我當然無理佢咁多，因為已經時間無多...

早前已經決定左，聽日我就要將魚餌交到智海手上...

一切都要依照原定計劃行動...

絕對唔可以有半點偏差!

喺搭升降機上去飯堂既同時，阿月已經狂用思緒試圖同我聯繫...

我當然就唔會理佢...但阿月呢個人就係咁好勝...

你越係唔順佢意，佢就越要用同你鬥...

你咪繼續聯囉，我就係都唔連~

反正都就黎到，睇下妳個嬲樣都好~

升降機停左喺飯堂後，壓縮空氣閘門隨即打開。

一張又一張長餐檯坐滿行者...

一個又一個，有男有女、有隨行者、有執行者、有先行者...

成個飯堂都好大，可以容立五百...甚至更多更多行者...

平時行者都會喺道食飯，但阿月就唔多鍾意...

阿月話日日都要困喺地底，仲要來來去去都係食同一種味道，好無癮...

其實呢道都有好多野食...

有中有西有法有意有日有韓你要乜就有乜...

都唔明阿月點解會話來來去去都係食同一種味道...

或者...阿月比較鍾意自由...鍾意無拘無束先真...

呢道雖然大，但要搵阿月佢地一D都唔難，因為眼前已經出現左綠色光線，引導我走去阿月既導引線。

我沿住導引線一直行...

轉過幾個彎，繞過幾張長檯...

終於見到阿月同綽姿既身影...

阿月已經食梗佢既煙三文魚拉麵...而且仲要怒啤住我...

『又話等埋我先食?』我邊坐喺阿月對面，邊用埋怨既口吻話阿月。

「你都傻既，等你咁耐餓死左啦~係綽姿咁好真係等埋你咋!」阿月一邊怒啤住我，一邊指一指身邊既綽姿...

『唔好意思丫綽姿...要妳等咁耐有無餓親?』對姨仔都係客氣D好...

「無。」綽姿搖搖頭，冷冷吐一句...

唔...一舊大冰山...

『好喇好喇...叫野食先...妳想食咩丫綽姿?我幫你叫埋啦。』點都要試下溶化呢座大冰山...

「我想食三文魚、吞拿魚刺身冷烏冬。」綽姿眼定定咁望住我。

『OKOK...』仲要食埋D冷冰冰既野...妳本身已經夠晒冰冷喇...

以思緒向EVE系統發出落單要求，落左一個三文魚、吞拿魚刺身冷烏冬同一個三成熟菲力牛扒(我都係比較鍾意食熱野多D)之後...

「哥哥，交俾阿風D野搞掂嘛?」阿月邊食邊講...

『妳同佢咁熟，自己問佢咪得囉。』仲好意思問，你地兩個既溝通仲多過我同你兩個加埋...

「呵呵~哥哥葡萄呀?」阿月得得戚戚咁既樣...

『實係喇!搞到我同阿風好似好陌生咁!咩都俾妳霸晒喇~』以後都唔知點問阿風攞料...

「係呀~我仲霸埋綽姿添喇~你咩都無架喇~」阿月翹一翹綽姿既手臂...

『好喇好喇...唔好玩喇...老老實實答我，究竟妳仲知道D乜野?』又搵綽姿黎講笑...

「你指邊方面先?」阿月繼續食佢碗拉麵...

仲要問我指邊方面?

睇黎阿月真係有好多野無同我交代!

『邊方面都好，有咩我唔知妳知既都講我知。』我需要掌握一切!

「無啦~我知既都講晒你知啦~」阿月夾起塊煙三文魚望兩望再放入口...

懶懶閒既阿月，完全無視我既要求...

『無?阿風講過妳同佢交換過唔少資料。妳唔好唔記得規條裏面第八條列明不可作假見證，快D講。』仲想隱瞞?

「有咩有咩?哎喲~哥哥唔係唔信你個好妹妹嘛?嗚嗚...哥哥唔信人家喇...哥哥唔信人家喇...」阿月放低手上既筷子，趴到綽姿膊頭扮喊...

ER…又駛唔駛咁七情上面丫...

『好喇好喇好喇...算喇算喇算喇...妳唔想講我唔迫妳喇...』好喇...我認我係一個好易心軟既人...

「我都話哥哥最錫我架喇~嘻嘻...」阿月一邊食住麵，一邊對我莞爾一笑...

『綽姿，妳準備好去地獄未?』都係將個話題轉去其他方面好D...

「嗯...」綽姿無乜信心咁回應...

綽姿好少會咁無信心...

睇黎呢個都係一個大難題...

「綽姿~放鬆D啦~其實地獄好自由~當妳係上等人既時候~」阿月拍一拍綽姿膊頭。

「下?」綽姿唔係好理解...

阿月飲一啖湯再講:「喺地獄處身喺上等既層次，就好似大地在我腳下，任我行~所有人都怕左妳，賣妳賬。妳鍾意做乜就做乜，點都得。就算係殺人都無問題，只要目標係下等人。而下等人想殺妳就等同自殺。真係諗諗都興奮~」

『阿月...』我唔係好想俾阿月繼續荼毒綽姿落去。

「哥哥~我只係對綽姿講出事實，並唔係荼毒佢~」阿月對我點點頭...

你話丫...話阿月無入侵我心靈都無人信...

阿月認真咁望住綽姿:「地獄比呢道更自由，自由到妳可以為所慾為...不過妳要記住...妳唔可以用妳既自由去影響他人既自由，妳必須遵守...唔係既話妳就墮落架喇...」

綽姿雙眼定住喺阿月雙眼裏面...

四目交投好一陣子...

綽姿好似被催眠一樣...

唔知過左幾耐...好似過左好耐...

「嗯嗯...我明白...但...我擔心既係李飛揚...我怕我會露出馬腳...」綽姿平鋪直序對住阿月講。

「嗰個笨蛋妳就唔駛擔心咁多喇~」阿月講完又飲啖湯。

「但我...」綽姿仲未將話講完...

「只要妳放鬆D~開朗D~自然D...咁就無問題架喇~」阿月繼續專心食佢碗拉麵...

就係咁先擔心...

距離出發既日子仲有兩日...

兩日就想改變綽姿既性格?

第二個可能得，但綽姿既話...

座冰山咁大...要溶都有排溶啦...

點算好呢...

已經唔可以再慢慢train佢...

點算好呢...

無人可以取替綽姿...

點算好呢...點算好呢...

「一份三文魚、吞拿魚刺身冷烏冬，一份三成熟菲力牛扒。兩位請慢用。」當我仲喺道煩腦梗點算既時候，服務員將我地兩份午餐送到。

「咦~血淋淋咁點食丫?」阿月望住我面前塊菲力牛扒，擺出一副難受既表情。

『妳扮咩丫?一個生活喺地獄足足十九年既人，會覺得我呢塊牛扒比屍橫遍野既地獄更血淋淋咩?』我一口咬落切開一小塊既牛肉...

血既味道...

「講呢D~」阿月對我莞爾一笑...

地獄就係充斥住呢種血腥味...

上等人每日都會食鮮肉，飲鮮血...

分別在於佢地食既唔係牛肉，飲既唔係牛血...

佢地係食人肉，飲人血...

TO BE CONTINUED