《香港革命戰》(上): [14-事前準備] PART 3
「又空手而回...都話左有時間努力實行計劃好過架啦~」同阿風返到地面之後，佢就不斷咁埋怨我。
『我而家咪開始努力實行計劃囉...』唔可以再拖喇...
「係?咁你打算點做?」阿風轉身望向我既時候，身上銀光閃閃既Sacred-Armor燦一燦到我...
『事前準備...』已經時間無多...
「下?」阿風摸一摸頭...
『你首先準備好電能版Sacred-Armor既所有資料...』我心裏已經盤算好所有計劃...
就好似頭先所講...
『仲有MINDER既原型設計...』唔可以缺少AI系統...
「就連MINDER既原型都要...」我無等阿風講落去...
『無錯，準備好呢兩樣野之後，一併賣俾藍志勇!』只有咁樣...
「咁樣會唔會太冒險?」睇阿風既神色，對我既計劃無乜信心...
『冒唔冒險我自有分數，你只要專心你既工作就足夠。』孤注一擲都要架喇...
「但係...」我無俾阿風繼續質疑我...
『仲有iPad既事，你盡快幫我整佢出黎。我而家就要去準備其他事，你整好左iPad既話立即通知我。」唔可以俾阿風再有咁多意見。
「了解。我立刻去做。」阿風講完之後，立即轉身離開。
而我就繼續喺呢個黑黑綠綠既大堂上面行...
喺黑黑綠綠既控制中心裏，每一個人都好努力工作。
每一個都為左SPIRIT得以延續而努力工作。
社會體制本來應該就係咁，每一個人都為左整體發展而努力。
但點解會有某一少部份既人為左自己既利益，破壞左呢個體制呢?
點解因為某少部份人既自私自利，而殘害其他無辜既人?
我真係唔明...我真係唔明!
一日最衰都係老豆!
唔係佢同埋嗰兩個無恥既統治者...
「喂~哥哥~返返上黎喇~」當我內心仲嬲怒梗嗰三個罪人之時，思緒出現阿月既聲音。
『妳又知我落左去?』對住阿月，都係快D平伏心情好D...
「你每逢星期二都會親自落去睇下架啦~而且今早就想搵你，但你都唔係結界範圍內，唔係落左去會去得邊?」阿月胸有成竹...
妳唔俾我出左去地獄既?
『岩喇，我正想搵妳...妳帶埋綽姿去折疊之門等我...仲有，叫佢帶埋數碼單鏡反光相機。』都係唔好同阿月糾纏落去...蝕底嗰個最終都係我...
「點解係我去叫丫?你去唔得既?」阿月又扮大小姐喇...
『佢係妳既隨行者黎架...點講都係應該由妳帶住佢啦...』仲好講，唔係妳成日都顧住觀察嗰個李飛揚，忽略左綽姿，綽姿就唔駛到左而家都仲係隨行者啦...
「去做乜先?唔講清楚我唔去架~」阿月繼續扮大小姐...
『妳一定會好感興趣...』
用最好既方法駛郁阿月後，我一路喺黑黑綠綠既環境，向住聚合反應堆(西部)行，一路諗...
要諗得更加仔細...
要諗得更加細微...
每一個細節...
每一個關口...
都唔可以有半點出錯...
一定要跟著全個計劃黎行...
機會就只有一次...
阿風嗰PART應該無問題，只要佢準備好電能版Sacred-Armor既所有資料、MINDER既原型設計同製造出iPad就得喇...
至於我地...
就要預備定D引起李飛揚視覺既材料...
喺之前，已經實行梗以阿月利用u.00.w既身份向李飛揚透露有關我地既資料...
照我估計，李飛揚應該會對u.00.w產生興趣...
甚至乎已經產生左興趣...
好有可能會喺短時間內向阿月要求更多有關我地既資料...
只要繼續慢慢放風俾李飛揚，等佢放下戒心，就可以引佢去黃金海岸...
當然單憑u.00.w既單方面行動係唔足夠...
雖然李飛揚只係一個無腦既上等人，但李軍就唔簡單...
所以就要多方面行動...
借用李軍...
借用藍志勇...
借用解放軍...
借力打力...
藍志勇方面，應該無問題，始終藍志勇都係一個無腦既上等人。
至於解放軍方面...
我諗應該都會好順利...
始終藍志勇所研究出黎既野，大多數都係軍火...
而呢D軍火最終都係賣俾解放軍...
遲早李軍都會接觸到Sacred-Armor...當然唔好太遲喇...
當李軍同李飛揚都接觸到Sacred-Armor既時候，佢地應該都會諗到要點做...
一路行，又再一次行到墓園...
再望一望一支又一支墓碑...
我幾時先可以唔駛再親手製造墓碑呢?
戰爭已經太過久...已經經歷太多年...
幾時先可以完?
被惡魔吞噬既靈魂，你地再忍耐多一陣...
唔駛好耐...
再過唔駛幾耐...
只要按照原定計劃...
一步一步...一步一步實行...
好快審判就會降臨!
穿過幾個防禦者RU，走過幾條黑色既樓梯，好快就已經黎到折疊之門既機關面前。
『呢個陳月...仲未見人...』
正當我嘗試以思緒聯絡阿月既時候...
『思緒連入禁止?!妳個衰妹...』
係咁架喇~係咁架喇~
呢個妹處事作風係咁架喇~
神龍見首不見尾~
自把自為~
唔鍾意聽人意見~
自己認為岩既就去做~
人地永遠都係低佢幾皮~
係咁架喇~係咁架喇~
再係咁真係遲早出事!
諗下諗下當初點解會俾綽姿跟阿月架...
綽姿本來就唔應該做行者...
如果唔係老豆...唔係阿月...唔係李軍...
『綽瑩，而家情況有變，無辦法唔咁樣做...』我望住深愛既綽瑩，將要落一個唔忍心既命令。
喺黑漆漆既墓園上面，只有微弱既綠光...
被ADAM遮蔽下，天空永遠都係黑色...
永遠都唔會見到星空...
永遠都唔會見到月光...
就只有EVE...
「只要係你既決定，我都會照做。」綽瑩第一次對我言聽計從。
『審判程序雖然出現左偏差，但我地都唔可以就咁放棄。』我望住綽瑩既雙眼，好似深淵一樣黑。
綽瑩既呼吸好平靜...
眼神亦好堅定...
『原定計劃失敗後呢兩年，我地加派左更多既行者去地獄搜集情報。我地終於搵到一個喺第一目標身邊既下等人既DNA與妳相近...』我感覺得到自己好唔捨得，但無辦法...
「你想我同嗰個下等人換腦，混入地獄?」綽瑩既聲音好似快要打破我既信念...
『要有人喺第一目標身邊，先可以令程序繼續進行...而好難得我地搵到第一目標身邊既人與我地既人既DNA相近，而更難得既係...嗰一個人...係妳...』我要忍受內心既矛盾...
我真係唔想要綽瑩冒險...
我真係唔想綽瑩離開我...
但係一切就好似天意安排一樣，最合適既人竟然係我最信任既人...
「你會唔會...要綽姿做行者?」綽瑩突然問左一條難以回答既問題...
但就算問題有幾難答，我都唔會講大話...
『必要時...會...』從來，我都唔會對任何一個人，講過一句大話。
「但係...而家先開始修行...會唔會太遲?」綽瑩無乜信心...
『無問題，綽姿本身就係一個行者既材料...而且只係必要時...如果唔係無路揀既話，我都唔會要綽姿冒險...始終佢係妳唯一既親人...』唯一一個親人係唔可以上戰場...
「但如果...萬一...真係要綽姿成為行者...你會揀邊個做佢師父?」綽瑩猶疑咁望住我...
『嗯...』我諗左一諗...都答唔出...
講真，我又真係無諗過要綽姿做邊個既隨行者...
我就已經做左阿月既師父...
雖然阿月唔駛一年就已經由修行者去到而家既執行者...
但係一個行者一世就只可以有一個隨行者，唔可以再有下一個...
我唔可以俾綽姿跟我...
「阿月。」綽瑩好堅決咁望住我，「只有阿月我先會放心...」
阿月...
究竟當才選擇相信綽瑩既說話有無錯呢?
俾綽姿跟隨阿月我硬係覺得唔多妥...
綽姿本來係一個好材料，但係阿月就太過飄忽...
飄忽既性格本來就係行者既大忌...
好似綽瑩咁都係一樣...
都係我衰...
同綽瑩拍拖就寵壞左個女朋友...
帶住阿月就寵壞埋個妹...
而家仲要俾個妹帶壞埋姨仔...
報應呀...報應呀...
欲知前世因，今生受者是;欲知來世果，今生作者是...
現眼報喇...現眼報喇...
「哥哥，做咩咁辛苦既樣丫~」當我仲深思緊因果報應之時，我聽到阿月把聲...
唔係由思緒傳黎...確實係由耳邊傳黎...
當我回個神之後，原來阿月已經企喺我面前。
而喺阿月身後既正正就係綽姿。
眼前披住黑色長袍既綽姿...嬌小身材，短髮，中間分界，前陰中間分開到下巴尖，兩邊鬢髮卻長到落胸前...真係同綽瑩生得一模一樣...
只係...綽姿比綽瑩多一份冷艷...
『無無...諗梗一陣要點做...』我發現自從救左阿月返黎之後，我講多左好多大話...
「係咯~哥哥話好感興趣既事係乜事呢?」阿月一副好奇樣咁望住我...
『為左妳個李飛揚...』我回返個陰險既眼神俾阿月...
阿月先係呆左一呆，然後莞爾一笑…
我以手腕上既名冊，喺刻有五芒星刻紋既機關上面掃一掃...
折疊之門隨即打開。
我、阿月、綽姿一行三人穿過折疊之門，黎到黃金海岸...
「你好快D講啦喎!唔係既話我唔幫你架喇!」一出折疊之門，阿月就係沙灘上面彈兩步轉身威脅我...
『唔緊要唔緊要~我要既係綽姿~』我先唔會俾妳牽住鼻子走!
「哦~你衰喇~綽瑩一唔係身邊你就想歪歪!綽姿!我命令妳唔可以聽呢個衰人陳日既說話!」阿月指住綽姿，扮出一個認真樣...
綽姿望住阿月...木無表情咁點點頭...
天呀!!!我都話左綽姿遲早都會俾阿月帶壞架喇...都唔需要遲...而家已經夠晒壞!
『好喇好喇...怕左妳喇...我叫妳地黎係要幫我做一D餌...』我真係無阿月辦法...
「做餌?你竟然想我地兩個為你做餌?你忍心呀你忍心呀你!」阿月雙手打交叉咁攬住自己膊頭搖下搖下...
咪扮傻啦好唔好...
以妳咁聰明不可一世，我一講個“餌”字，妳就知我既全盤計劃喇...
『咪玩喇...妳無理由唔知我想點既...』我送阿月一個冷眼...
「唔知喎~」阿月又送返一個冷眼俾我...
頂...咁搞法真係遲早都會俾阿月激死...唔駛遲，而家我都俾佢激到半死...
『綽姿，幫我喺呢道影幾張相。』都係嗰句，唔好同阿月糾纏落去...蝕底嗰個既最終都係我...
綽姿望一望阿月...
唔係呀嘛...真係連我既說話都唔聽...
天呀!!!點解我會將綽姿呢塊寶玉交俾阿月架?!
暴殄天物呀!!!
「就照呢個衰人既意思做，影幾張相啦~」阿月隨便向綽姿發出命令...
綽姿點點頭，拎起手上既數碼單鏡反光相機...
“咔嚓”...“咔嚓”...“咔嚓”...“咔嚓”...“咔嚓”...“咔嚓”...
幾下快門聲後...
『呢D就係我頭先所講既...』我都未將個“餌”字吐出口...
「可唔可以擺D型D既姿勢呀?你成碌木咁企喺道，姜太公都嫌棄你喇!」阿月既連珠爆發將我好型既對白打散晒...
型既野妳識條鐵咩?!
「嗱~你聽我講~個樣要有自信D...自信呀唔係叫你乸埋口面呀!高低膊...高低膊唔係長短手呀!係喇係喇...側側地個頭...側側地呀唔係瞓捩頸呀!係喇...無錯...少少好啦唔好over左...左腳輕微曲一曲...曲一曲呀唔係叫你提起呀!哎呀你係唔係有亞氏保加症架?」阿月一路係咁指示我...
我好努力咁跟住阿月既指示做...
「係喇係喇...指指個地下。」
“咔嚓”
「係喇係喇...指指後面。」
“咔嚓”
「係喇係喇...咁咪靚仔晒囉~不過都係因為綽姿既攝影技術高超先影得你咁型咋~」阿月拍一拍綽姿膊頭...
綽姿有D唔係咁好意思咁搖搖頭...
『妳唔好再教壞綽姿喇...』妳叫我點同人地個家姐交代...
「你交得佢俾我，你理得我點教姐~綽姿~我教得妳好唔好丫?」阿月翹住綽姿隻手...
「嗯嗯...阿月教得我好好...」綽姿點點頭，冷冷吐出一句...
天呀!!!綽姿完完全全俾阿月洗腦喇...
我真係好後悔...我真係好鬼後悔!
點解當初我會交綽姿俾阿月架...
「哥哥你放心啦~有我既悉心教導，綽姿好快就會成為出色既預行者!」阿月左手攬住綽姿，右手拍拍心口，對我莞爾一笑...
妳叫我點放心得落...
『綽姿，妳喺呢道周圍影多D相，要有呢道既特色既。』都係快D完成準備功夫，唔好俾綽姿見到阿月成鬼日對我呼呼喝喝。
綽姿又望一望阿月...
「嗯，妳就照阿日既意思做啦。」阿月對綽姿點一點頭...
「了解。」綽姿向阿月點一點頭後，拎住相機開始周圍影...
綽姿真係一塊寶玉，可惜...
好跟唔跟跟著個癲既...
執行者以上既人材，我地有好多好多。
除左阿風之外，真係合埋眼求其指都指到一個好過阿月...
阿月唔係唔叻，係太叻...
叻到個性格都不可一世咁...
呢種性格係可以成大器，但唔會係一個好導師囉...
明明當時我就教得佢好地地...
唉...或者呢D就叫死性不改...
「而家可以話我知你個計劃未?」阿月突然一面認真咁望住個海...
『計劃就好似之前咁，為綽姿換腦，送佢去入地獄，與綽瑩會合，喚醒記憶，接近李飛揚，將名冊交到李飛揚手上，引李飛揚同李軍入黎。不過當中加多少少野。』我亦好認真咁望住個海。
海上面有幾隻海鷗飛下飛...
「加多左少少野?係乜野?」阿月都留意梗飛喺海上既海鷗。
一隻海鷗快速飛插到海裏...
『先唔好問呢樣野住，我想知綽姿既情況。以妳評估，綽姿可以完成任務嘛?』我仍然留意住海面，剛才插入海裏既海鷗飛返上黎，嘴裏仲咬住條魚...
獵食...
「你擔心梗呢樣?你應該俾我清楚，綽姿係一個人材。」阿月開始喺沙灘上踏步。
我緊係俾妳清楚。
但我真正擔心既係我怕綽姿已經俾妳教到唔知似乜...
「不過如果你係要佢接近飛揚既話，我諗無可能。以綽姿既性格係唔可能引到飛揚既注意。」阿月繼續向前行，向住海邊行。
又黎喇...又係D乜乜我太了解飛揚理論...
『我既目的唔係要綽姿接近李飛揚，我既目的只係想綽姿協助綽瑩。』我亦跟住阿月後面行。
「無用。綽瑩已經失敗左，飛揚唔會對佢有興趣。再做乜都係無用。」阿月語氣非常堅決。
『所以就要加多少少野，一D餌。我已經諗好方法令李飛揚對呢道產生興趣，就係綽姿影梗既相。而點樣交到李飛揚手中我亦都諗好，而且仲叫左阿風去準備...』海風一路吹埋黎，真係好舒服...
「咁李軍呢?李軍係一個竟小心，又危險既人。要引佢既話單憑幾張相係無用。」阿月行到去海邊之後停左落黎...
海風一路吹，吹起阿月既秀髮，吹起阿月既體香，吹到我鼻裏面...
『我亦都已經計劃好，計劃好令李軍安心又放心再一次走入SPIRIT範圍。不過今次唔係元朗領域，今次係我地屯門領域。』我企到阿月身邊，感受大自然既美。
「嗯...你認為我地既成功率有幾高?」阿月突然將視線放到我眼裏。
認真起黎既阿月有一種無法形容既攝人魅力...
『50...如果加埋妳以u.00.w既身份牽引李飛揚既話...80%。』我將視線繼續放喺海上...放喺水平線既天際上...
「係93.643%。唔好唔記得u.00.w同解放軍、國安局亦都有聯繫。而且解放軍已經相當信任我。只係...國安局比較麻煩...」阿月轉一轉身，繼續喺海灘邊慢慢行...
國安局...
如果就連阿月都覺得麻煩既話，就真係好難對付...
「國安局不斷嘗試搵出我既來源...當然佢地唔會搵得到。不過...透露俾國安局既資料就要更加小心...」阿月喺海邊慢慢行，小心行，唔俾海水沾到鞋。
究竟阿月係點樣做到唔俾國安局追蹤到架呢?
雖然阿月有講過，但講左我都係唔明...
科技既野真係好複雜...
人工智能就更加複雜...
但點都好，應該點都唔夠阿月個腦咁複雜...
『有無辦法可以偷取更多關於國安局既情報?』我一直跟喺阿月後面，望住阿月既背影。
「其實國安局無乜機密，都係一班強化左既蝗蟲，一見到目標就蜂擁而上咁鏟除佢。」阿月搖搖頭。
『我比較想知國安局手上擁有幾多關於MINDER既資料。』海水時高時低...
「放心，一定唔會俾我地多。」面前既阿月一上一落避開海水。
真係可以放心?
國安局不時都可以去研究MINDER...
日以計夜咁不停研究，終有一日都會研究出控制MINDER既方法...
「你唔好唔記得，MINDER係一個AI，係一個擁有自我思考既AI。」海風吹起阿月既黑色長裙，一對雪白既美腿展露喺空氣中。
『咁先令人擔心...我地已經俾左太多時間佢自我思考...好快...』我仲未將我要講既說話講完...
「所以我地時間無多。」阿月轉身望住我...
時間無多...
就連阿月都話我地時間無多...
呢句係我最怕喺阿月口中聽到既說話...
如果連阿月都咁講...
『打後既計劃我地唔可以有任何出錯...』我望住阿月既雙眼...
「應該話唔可以有任何偏差。」由阿月既眼中看到我自己...
唔出錯我都無信心...
仲話要唔可以有任何偏差...
情況真係好險峻...
不明確因素實在太多...
可以掌握既亦都太少...
「唔好唔記得我頭先所講，我地有93.643%成功率。只要我地一直向前行...向前行...向前行...」阿月轉一轉身，繼續向前行。
繼續向前行...繼續向前行...
繼續跟住阿月向前行...
無錯...阿月真係一隻好重要既棋子...
不論救阿月返黎之前，定係救左阿月返黎之後...
一直以來，阿月既評估，阿月既推測，阿月既計劃對我地黎講都好重要...
無左阿月既話，根本就無可能繼續行落去...
阿月可以話係整個死海文書既核心...
所以阿月唔可以有事...一定唔可以有事!
任何時候都要以阿月既安全為優先考慮...喺李飛揚同李軍黎到之前...
喺海風同浪聲包圍下，我地向住黃金海岸既廢墟行。
我已經見到喺遠處好努力咁影梗相既綽姿。
綽姿真係好盡責，俾得佢做既任務，佢都會全力以赴，力求完美。
我對綽姿好有信心!
雖然阿月話李飛揚唔會對綽姿有興趣，但我既目的唔係要令李飛揚對綽姿產生興趣!
只要能夠接近得到李飛揚就足夠...
以上等人既身份接近李飛揚...
我相信，只要接近到李飛揚，綽姿同綽瑩聯手既話，一定可以令李飛揚乖乖地帶上名冊...專為李飛揚製造既名冊...
「喂~綽姿~影完未呢~」阿月又變返一個嬉皮笑臉既死小孩...彈下彈下咁彈到去綽姿面前...
「嗯...阿月妳睇睇...」綽姿將手上既相機交到阿月手中。
「嗯~非常好~好有感覺~好有戰後帶黎滿目蒼夷既絕望感覺~」阿月一路睇，一路講。
『等我睇睇~』我一手就搶左阿月手上既相機。
睇下一張，睇下又一張...
『好!非常好!』我不禁大聲讚好!
每一張都好有感覺...
每一張都散發住戰爭帶黎既絕望感覺...
由其是呢架被遺棄既坦克車!
厲害...厲害!
綽姿真係好有呢方面既天份!
細細個，綽姿已經好鍾意影相。
雖然喺SPIRIT裏面真係無乜好影...唔係黑就綠...
但綽姿總可以影到充滿尋尋覓覓，冷冷清清，淒淒慘慘戚戚既感覺...
「過獎喇。」綽姿微微點點頭，冷冷送一句...
唔...我都覺得以綽姿黎種冷若冰霜既性格，無可能吸引到李飛揚...
「哥哥~你既讚賞好Hea囉~」阿月搭一搭綽姿膊頭，送我一個冷眼...
『多事!妳唔係好掛住妳架Aston Martin架咩?我幫佢加多左兩條痕喇~仲唔快D去睇下~』咁臭串呀喇?
「你...你...你...你...你...你...我深愛既Aston Martin!!!」阿月一路向住車房跑，一路發出慘叫。
真係唔可以俾妳成日喺綽姿面前落我面!
一陣搞到綽姿都無大無細就麻煩!
『坐下休息下先喇，綽姿。』我坐到喺被遺棄既坦克車上面，將相機放到車身上，向綽姿示意坐到我身邊。
綽姿望一望邊彈邊跳邊跑既阿月...
『坐喇。』我再拍一拍身邊既位置...
綽姿輕輕一彈，坐左喺我隔離。
綽姿雙手壓住坦克車車身，身體微微向前傾，望住遠方...
有人話過呢種坐姿反映出一個人既內心無安全感...
『綽姿，放鬆D，有我喺妳身邊。』我望一望身邊既綽姿...
綽姿望一望我:「無時無刻都要處於戒備狀態。」
真係估唔到...
估唔到綽姿會咁樣回應我...
不過我又覺得幾有趣~
『哈哈~邊個教妳架?阿月?一個有自信既人，係唔需要無時無刻都處於戒備狀態~因為一切都盡在掌握之內~妳睇下阿月佢~』我指一指仲係視線範圍內彈下跳下既阿月。
綽姿望一望，諗一諗...
『妳睇呢個阿月平時都無黎正經咁，係因為佢清楚知道，就算有突發事發生，佢都可以輕鬆解決~』我望實眼前既綽姿。
綽姿亦將視線由阿月身上，轉到我眼裏。
微風微微擺動綽姿兩邊既鬢髮...
綽姿真係好似佢家姐...
『所以成功既行者應該無時無刻都處之泰然。』我將視線放返喺遠處既廢墟當中...
「嗯。」左一聲後，綽姿仲係以雙手壓住坦克車車身，身體微微向前傾既姿態望住遠方...
唔怪得阿月會話綽姿吸引唔到李飛揚...
唔好話吸引...直頭係阻隔...
呢種冰冷既性格會阻隔人與人之間既接觸...
強大既心之壁...
究竟點解綽姿會有呢種性格呢?
三年前，佢地兩姐妹既爺爺同父母都俾我驅逐左出SPIRIT。
不過呢個唔係令綽姿性格冷漠既原因。
細細個我就已經同佢兩姐妹一齊成長。
由細到大綽姿都唔多講野，亦都唔活躍。
總愛一個人坐喺側邊望住我同綽瑩玩。
到左八歲，行者既合適年齡，由於梁家就只有綽瑩同綽姿兩姐妹，所以就只有綽瑩進行修行。
綽姿一直都喺我地身邊，陪伴我地。
由修行者...隨行者...執行者都喺我地身邊，陪住我地修行。
雖然綽姿一直都陪住我成長，但好多事我都唔係好明佢諗乜。
我只係知道，綽姿所做既每一件事，都係經過深思熟慮，確保萬無一失。
「阿日，究竟到幾時，我地SPIRIT先會見到陽光?」綽姿望住個藍天，平淡咁同我講。
呢個問題...
『好快...只要妳同妳家姐合作，審判之日好快就會來臨。』我唔知應唔應該咁答，但我相信綽姿係想問我地SPIRIT幾時先會脫離陰霾。
「好快就可以見返家姐。」綽姿嘴角微微一笑...
好耐都無見過綽姿笑喇...
『妳好掛住家姐?』我繼續偷偷地望住綽姿。
「嗯。你呢?」綽姿好似無察覺到我偷望佢，佢仍然注視係藍天上。
『嗯...好掛住。』我相信呢種思念唔係一言一語可以解釋得到。
就好似李飛揚對阿月既思念...
無錯...
我相信李飛揚內心既感受都同我一樣...
與深愛既人相隔三年無見，而且仲係音訊全無...生死不明...
諗諗下李飛揚又真係幾可憐...
不過要怪就只好怪嗰個多事既李軍!
唔係李軍阻手阻腳，破壞我地原來既計劃，你都唔駛同阿月分開!
唔好怪我呀...我都係迫於無奈...
微風由海邊吹過黎，真係好舒服。
呢D日子可以有幾多?
假如繼續由惡魔掌權既話，我地根本就無咁既閒情逸致去享受大自然既美。
享受...奴隸講唔上享受...
為惡魔付出既奴隸，除左生存，仲可以點?
你地幾時先會醒覺?
幾時先會反抗?
唔可以完全旨意晒我地...
假如就連我地都失敗埋既話，你地就要靠你地自己架喇...
「算你啦哥哥~照顧得我架深愛既Aston Martin周周到到~唔係既話，下次你要去地獄就用腳行啦!」阿月雙手放後，彈下彈下咁彈過黎。
對住妳呢個俾EVE更加唔穩定既陳月點敢唔周到丫...
『好喇，阿月返黎就係時候錄製幻覺影像喇。』我由坦克車上面拎住部相機跳返到地面。
阿月同綽姿都眼定定咁望住我...
『我無同妳地提及過咩...?』我份人比較無記醒...
“沙沙沙沙沙”我帶住阿月同綽姿喺野草上面行。
『為左引起李飛揚既注意，我諗住為名冊植入影像...』“沙沙沙沙沙”穿過由荷電粒子砲洗禮過既焦土...一直行。
「哥哥，你係想錄呢一個地區?」阿月緊貼我身後。
『當然喇，唔係又點引到李飛揚既注意丫?』仲駛問既...
「以名冊將影像植入腦神經?」阿月繼續問。
『嗯，名冊可以做到。』理論上...
「有足夠能源咩?唔好唔記得就係啟動防衛組件都用左大量既EVE能源。而且喺地獄裏面，EVE能源唔維持得幾耐...」阿月講出左重點...
『所以就要帶李飛揚去境外...』我轉身望一望綽姿，『只要喚醒綽姿既記憶同時，借用台上面少量既EVE能量啟動埋名冊，將影像植入李飛揚既腦神經就搞掂...』
「你認為境外果少少既EVE能量能夠啟動名冊咩?」阿月又講出左重點...
『希望夠...唔係既話...都唔知喺地獄裏面仲可以喺邊道搵到EVE能量...』如果唔得既話...就真係麻煩...
「只係希望...」阿月對我既計劃唔多有信心...
難怪既...
阿月係一個無把握就唔會做既人...
只係得希望...對阿月黎講呢個計劃近乎失敗...
『好喇，點都好都要做好準備。我地就由呢道開始...』我停左喺一條長有茂密野草既小路中，轉身將相機交俾綽姿。
綽姿點點頭，好似已經準備好，進入狀態。
『阿月，就由妳做導演!』我送左個陰險既笑容俾阿月。
「嘿嘿...放心交俾我啦~」阿月回返一個莞爾一笑俾我...
沿住小路一直行...
綽姿拎住部相機...一邊行...一邊拍...
「慢慢黎...慢慢黎...左望望...右望望...」阿月一直指引綽姿。
沿住長有茂密野草既小路回頭行...
「喺道停一停，望一望四周，望一望地下...係喇係喇...望一望地上面既焦土...係喇係喇...」阿月同綽姿行到去焦土上。
我亦跟住佢地行面...
「跪一跪喺地下上面...無錯無錯...喺焦土上面摸一摸...拎起一少部份...放返低...拍一拍隻手...係喇係喇...」綽姿一手拎住相機，另一隻手跟住阿月既指示做。
兩個嬌小既身軀非常合拍...
「好~望住前面...望住前面架坦克車...好!跑過去!」阿月帶住綽姿喺焦土上面跑。
“沙沙沙沙沙”我跟住佢地兩個身後，喺焦土上面跑...
「摸一摸架坦克車...岩喇...再打量下架坦克車...岩岩...再望一望遠處既誡律之牆!就係咁喇!」阿月指住誡律之牆。
黑黑、灰灰、巨大既誡律之牆...
將世界分隔既誡律之牆...
「好好~我地而家就要向住廢墟行...係喇...慢慢行...慢慢行...步步為營咁向前行...」阿月帶住綽姿一步一步咁慢慢行...
我跟住兩個嬌小既身軀，一路向住一遍頹門敗瓦廢墟行...
「影住個牆身...係喇...影多一陣...影一影地上既子彈殼...岩喇...再影一影嗰邊俾炸左一半既建築物...嗯嗯...」阿月同綽姿行到入廢墟入面...
充滿火藥味既廢墟...
充滿戰火痕跡既廢墟...
「再行前兩步...影一影地上既骸骨...嗯嗯...再耐小小...好!跟住就係慢慢行...慢慢由廢墟行向沙灘...期間四圍望下...望下左...望下右...就係咁喇...」阿月繼續帶住綽姿向住沙灘方向行...
“咔...咔...咔...”踩過散喺地上既瓦礫...
“沙...沙...沙...”踩過野草...踩過沙地...
「行去海邊...妳慢慢行去海邊...係喇...望住個海...係喇...我行去機關嗰邊唔好影到我...」阿月一路指示綽姿，一路跑去折疊之門既機關嗰邊。
“沙...沙...沙...”輕盈既阿月喺沙灘上面彈下彈下...
好快阿月就跑到去折疊之門既機關上面...
「沿住海邊向我呢個方向行過黎!慢慢...慢慢...」企係瓦礫上面既阿月向仲喺海邊既綽姿發出指示。
綽姿一步一步...慢慢行向阿月方向...
我一直跟住綽姿後面...
“唰...唰...”海浪聲一直捲入耳內...
“唰...唰...”非常悠閒既感覺...
「係喇!影住我!影住我!慢慢跑過黎...慢慢越黎越快咁跑過黎!」白得發亮既肌膚與黑色連身長裙反襯下，有如夜空中既明月照人...
綽姿一邊拎住相機，一邊喺沙灘上面跑，向住阿月既方向跑...
我亦跟住綽姿身後跑...
同阿月既距離越黎越近...阿月既樣貌越黎越清楚...
阿月對住綽姿手上既相機莞爾一笑，好似一切都喺阿月掌握之中...
阿月跪到瓦礫上面，用手上既名冊喺機關上面輕輕一掃，折疊之門隨即打開...
阿月企起黎，再次向相機莞爾一笑，轉身走入黑洞之中...
有如深淵一樣既黑洞慢慢地將阿月吞噬，整個吞噬...
綽姿一路跑...一跑向住折疊之門方向跑...
綽姿一個飛身，連人帶機飛入折疊之門裏面...
有如深淵一樣既黑洞慢慢地將綽姿吞噬，整個吞噬...
我一個人...企左喺沙灘上...
“颼...颼...”吹住海風...
“唰...唰...”聽住海浪聲...
呆呆滯滯咁望住深淵一樣黑既折疊之門...
『嗯...我幾時叫佢地兩個返去SPIRIT入面呀...』