「李飛揚上左去小欖...」阿霖繼續用思緒同我聯絡。

都話左你架喇...

你一定唔會甘心就咁空手而回。

睇黎李飛揚已經對我地展開調查...

不過都唔可以唔讚下你既膽量~





竟然夠膽死一個人走到黎呢道...

仲咁唔知死走上小欖…

小欖...

『繼續留意李飛揚既動向,有咩消息立即匯報!另外,有一隊行者應該已經出發,去梗小欖臨時基地。你地派人去叫佢地先唔好上山,等我指示。』小欖山上只有兩條路...

「了解。」





一條係去臨時基地...

另一條就係去陳星身處既山頂...

我預計,李飛揚首先會俾臨時基地吸引視線,從而探索一下...

臨時基地裏面有D乜呢?

我從來都無去過睇過一眼...





不過我就估裏面應該有一D生活必需品...

甚至有一D有關我地擄劫行動既資料...

假如李飛揚真係會走入去臨時基地既話,佢應該會察覺得到呢個臨時基地係同我地有關...

希望佢真係唔好太蠢啦...

「阿日,李飛揚去左臨時基地。」阿霖向我匯報。

果然~

如果係咁就好辦事~

假如真係照阿月所講“總之就有更好既方法可以將名冊交到飛揚手中”既話,我相信更好既方法就喺眼前。





『阿霖,幫我通知班上小欖既行者,見到有車由臨時基地走出黎既時候先好上山。仲有唔好俾對方察覺得到俾佢地發現對方既存在,要自然D,平常D。之後你帶多六個人一齊喺陳星嗰道等我...其他人繼續佈防。』就係呢個機會。

「了解。」

一個令李飛揚乖乖自動帶上名冊既機會...

『阿風,立即準備好李飛揚嗰隻名冊!』我立即跟住導引線,走去阿風既身處位置。

「下?做咩丫?」阿風仲要傻下傻下咁問我。

『我搵到個機會,將名冊交到李飛揚手中!』呢個真係確確實實一個好機會!

「哦~咁我而家就去準備~」阿風好似仲係賴賴閒咁...





係唔係近得阿月多,俾阿月傳染左?!

『我而家黎梗,三分鐘內到。』快手D喇...

「OK~放心啦~」

又係講放心...

你話丫~我有咩辦法唔擔心阿月...

而家唔單止係阿月唔可靠,就連阿風都變得越黎越唔可靠...

咩叫做“學好三年,學壞一朝”咪就係呢D囉!

我急急腳走到去控制中心。





阿風已經拎左隻暗啞黑色,應該話係炭色,無反光表面,無花紋,闊度大約1吋多D,半橢圓形既手鐲...

李飛揚既名冊...

「已經設定好晒~連防止偵測設備都搞掂埋~可以交俾李飛揚架喇~」阿風將名冊放到喺空氣中。

我接過好似無重量一樣,飄浮喺半空既名冊之後...

突然醒起好似少左D野...

『阿月呢?』係喎...阿月頭先先幫阿風整野,應該同阿風一齊先岩架...

「阿月?佢好似話有D時要做喎~」阿風攤開雙手。





阿月又想搞乜鬼?

算啦!

唔理阿月搞乜鬼都好,而家我有重要事要做!

同阿風揮過手後,我立刻向住聚合反應堆(西部)方向出發。

機會已經有,但...

要說服陳星係一個難題...

陳星已經唔再相信死海文書,有咩方法可以說服到佢幫我將名冊交到李飛揚手中呢?

以呢個死老頭既硬頸性格,用言語無可能說服到架喎...

用條件交換?

但而家仲有乜野條件交換?

食物?

物資?

物質上既野佢根本就唔會在意...

情報?

佢仲會對邊方面既情報有興趣?

仲有D乜呢?

無理由以自由作交換條件架...

陳星呢個人,唔可以唔監視住佢...

萬一俾左自由佢,佢一定會搞搞震...

而家我地既計劃都唔多穩陣,假如仲要防範埋陳星...

一定失敗…

咁樣既話,我仲可以用D乜黎交換呢...

「阿日,李飛揚正準備離開臨時基地。」當我仲煩惱梗用咩黎同陳星交換之時,阿霖以思緒同我連接。

『通知行者可以上山。我地喺陳星嗰道集合。』無時間俾我再諗...

「了解。」

穿過折疊之門,黎到黃金海岸...

陽光...今日既天氣都叫得上唔錯...

一定可以順順利利...

我快步跑到去阿月部Aston Martin…

“吼...吼!”要爭取時間!

一邊駕駛住Aston Martin喺殘舊既公路上行,一邊諗...

三年黎都無見過陳星一面...

三年黎都無講過一句話...

再次見到面既時候,應該用咩開場白?

你好?

好耐無見?

死唔死得?

好似好無謂,好唔實際,好無必要...

定係單刀直入同佢講,要佢將名冊交俾李飛揚?

諗下諗下,好快就已經見到小欖...

越喺接近,我越係放慢腳步...

要面對陳星呢個人,仲難過要我去殺敵...

由細到大都係咁,我都唔敢面對老豆...

老豆俾我既感覺總係高高在上...高不可攀...

沿住兩旁樹蔭上山...

好快就要見面...

一次世紀性既會面...

三年前,我以為我地以後都唔會再見...

三年後,我迫於無奈都要黎見你一面...

轉一個彎...再轉一個彎...上到山頂...

“依...”我見到木屋隔離停泊左一架白色輕型貨車...

“沙沙...”踩落沙地上...

我見到不遠處已經企住十二個人,圍住一張木檯...

“沙沙...沙沙...沙沙...”我再行近D...

張木檯前坐左一個人...

一個背住我,著住白色衫,長有濃密既白髮,all back髮型,髮長到膊既...

陳星...

“沙沙...沙沙...沙沙...”我行近陳星...

行到接近佢身後唔夠兩個人位之時...

「黎左喇?我等左你好耐喇~我既乖仔,陳日。」陳星指一指佢身邊將凳,向我示意坐下。

『李飛揚呢?』我邊坐邊問...

認真望一望陳星...面上長有白鬍鬚,而且面上仲多左幾條縐紋...

老豆佢老左喇...

「你放心~佢喺一個好安全既地方,而且唔會見到我地...亦唔會聽到我地講乜~黎~飲淡咖啡先~」陳星推左杯咖啡去我面前...

有如黑洞一樣既咖啡...

係濃縮咖啡?

我拎起左杯濃縮咖啡,細味一口...

苦而不澀,甘而不酸...

你幾時學識沖呢D咁有品味既咖啡?

「好飲嘛?我學左好耐,試左好多次架喇~」陳星帶住微笑望一望我。

你喺山上呢三年,就係鑽研點樣沖咖啡?!

『我今次上黎唔係同你飲咖啡,我係有事要你做。』我放低手上既咖啡...

「難得兩仔爺有機會見下面,傾多陣先啦~」陳星以慈祥既面孔望住我。

我好似從來都無見過陳星呢個面孔...

每次佢都只會係傲視住我...

『我同你無乜好傾...』我唔想再望住呢個討厭既面孔。

大家都無出聲好一段時間...

秋風輕送,吹動山頭上既野草...

幾隻麻雀喺天上飛過...

吱吱喳喳...

天空上既雲朵飄下飄下...

將陽光折射到地面上...

時間好似過得特別慢長咁樣...

「你仲係怪責梗我?」陳星繼續以慈祥既面孔望住我。

『唔係我怪責你,係你違背規條!』我怒視陳星。

一講到呢樣,我火都黎埋!

「有好多野唔係你睇得咁簡單架...」陳星合埋對眼,擰擰頭...

『唔係咁簡單?可以有幾複雜呀?講到尾咪又係你地三個太過貪婪!貪婪呀!』你地三個腐敗既統治者!

「所有野都係喺既定方式進行...」陳星點一點頭...

『既定方式?貪婪係既定方式?呢D都喺你自私既行為!』我指住陳星。

「我只係為大局著想姐...」陳星擰擰頭。

『為大局著想?為大局著想就可以犧牲你自己既親生女?犧牲阿月?!』我一拍一拍張木檯!

你呢個泯滅人性既陳星!

我點都唔會忘記你三年前喪盡天良既決定!

就喺三年前,阿月既生日...

『爸!解放軍嗰邊已經查出阿月既真正身份!我地要救佢返黎!』我喺控制室向我地既統治者,我父親陳星提出拯救阿月既要求。

在場眾多先行者都望住我,包括父親身邊既智海同阿賢。

父親擰轉左身,諗左一諗...

我行到父親面前:『爸!照情報所講,解放軍會喺今日之內行動,活捉甚至殺死阿月...我地無時間喇!』

父親合埋對眼,吸一吸淡氣:「唔需要...已經唔再需要阿月...」

『爸!你講咩丫?咩唔需要丫?阿月係我個細妹...你個女黎架!』我捉住父親既膊頭,搖左幾搖。

「死海文書裏面既劇情唔再需要阿月,我地唔可以再浪費時間,浪費人手,浪費LILITH!」父親冷眼望住我...

呢種眼神...好冰冷...好陌生...

『規條第三條...愛護兒女...你咁樣係違反規條...』我困惑咁望住陌生既眼神...擰擰頭...

「規條?我有違反到咩?我有被審判咩?SPIRIT已經被分裂!規條都失效...規條已經唔再重要喇!」父親繼續以陌生既眼神望住我。

『就算規條失效...我地都唔可以違背良心...我地唔可以腐敗架...』我越黎越困惑...

點解會咁?

點解父親會變成咁?

父親一直都教我做人要謙卑、寬容、耐心、勤勉、慷慨、節制、貞潔...

但點解...

點解父親會如此傲慢?!

「我地SPIRIT已經面臨重大危機...無咁得閒再理會出面發生梗咩事!我地唔容許再有任何出錯!」父親堅決說不…

『大危機…任何出錯...如果唔係你話要將SPIRIT一分為三…我地會面臨呢種毀滅既危機咩?』我仇視住陳星...

「你想講乜?」陳星傲視住我...

『我想講乜?我係話我地整個SPIRIT面臨毀滅既危機都係因為你!係你一手令我地步向自毀既邊緣!』我咬咬牙切齒咁仇視住陳星...

「我所做既一切,都係為左我地SPIRIT既人民著想,為左SPIRIT未來著想!只係...用錯法方...」陳星毫無悔意咁望住我...

『為SPIRIT既人民著想,為SPIRIT既未來著想...講得好好聽丫~不過事實真係咁咩?你所做既一切,都係為左你自己既一己之私!你既貪婪!你根本就係已經腐敗左!』我激動咁指住陳星。

「狂妄!無理!你既指控根本毫無根據!你究竟想點?陳日!」陳星雙眼充滿傲慢...

『我想點?我要拯救阿月!我而家就要出去地獄救阿月返黎!有邊個支持我既,就企過黎我呢邊!』我心生怒火。

當我講完之後,全個場都靜左落黎...

在場既先行者諗左一諗...

阿賢首先第一個行到我身邊...

其後一個又一個先行者都行到我身邊...

直至到所有先行者都企晒喺我身旁,除左智海...

智海...

由細到大,除左老豆之外,你就係教識我最多野既人...

我地亦都出生入死咁多年...

竟然...

竟然你就係唯一一個唔支持我既人?

『我地而家出發!救阿月返黎!到我返到黎,先再同你算帳...陳星!』我帶住一班為數十二人既先行者,步出控制室。

無論如何,我都唔會俾阿月有事...

我一定要安全咁帶阿月返黎...

證明陳星既決定係錯既!

一行十二人向住聚合反應堆(西部)方向跑去...

『所有人根據Plan A行動!假如Team 1失敗,轉行Plan B!』喺啟動折疊之門之前,我將所有既拯救行動計劃都以思緒傳晒俾十一個先行者。

「了解!」十一個先行者同時堅定回答。

『出發!』要爭取時間...

一定要救到阿月返黎!

透過折疊之間去到黃金海岸,我地都根據Plan A行動。

阿賢、阿霖同我一齊坐上同一架白色輕型貨車。

“吼...吼!”門都未閂好,阿賢就喺公路上加速飛馳!

我地三個就係Team 1。

Team 1亦都係整個Plan A既核心。

由於時間緊迫,我只可以簡單咁設計出拯救計劃...

計劃真係好簡單,就係Team 1去到目的地強行擄走阿月。

其他Team做Backup。

假如我地受到解放軍追捕,其他Team就要幫我地作掩護。

假如我地Team 1失敗...

Plan B就係要其他Team放棄任務...立即撤退...

無錯,其實呢個計劃根本就係擄劫行動。

以擄劫方式去拯救阿月...

無辦法...

我真係無辦法喺緊迫既時間裏面,盤算出一個更好既拯救計劃...

「我地已經駛入MINDER既覆蓋範圍。」阿賢一邊駕駛輕型貨車,一邊講。

我望一望窗外既景色,好快...

阿賢開得好快...

原來不知不覺間已經黎到深井...

『連接阿月。』我對住阿霖發出指令。

阿霖喺個顯示器上面撳下撳下:「唔得,無辦法同阿月連接。」

『激氣!點解會咁?』點解硬係要喺D關鍵時刻搞更多驚險?

「唔清楚...或者係因為解放軍做既手腳...」阿霖繼續喺個顯示器上面撳下撳下...

解放軍…

『有無發現解放軍既蹤影?』一提到解放軍,我最擔心既就係會遇上解放軍...

阿霖望住手上既顯示器:「無。十公里內並無異樣。」

『十公里內範圍太細,展開更大既探測範圍!』我地要有更廣闊既視野...

「了解。」

唔可以喺未去到目的地之前,就俾解放軍攔截!

我地架輕型貨車衝上架空高速天橋。

我已經望到遠處...對岸...一座小島...

小島上有大大小小銀光閃閃既建築物...

仲有一支又一支大砲...

解放軍基地…

我地敵人既基地...

如果可以用EVE砲一砲摧毀呢個邪惡既基地,咩都唔駛煩!

只可惜EVE砲唔可能對外發射...

激氣!

阿賢繼續以穩定高速喺架空高速天橋上飛馳。

好快就飛到去九龍。

「阿月已經離開左屋企,去梗銅鑼灣。」阿霖望住個顯示器。

『嘗試再同阿月聯絡。』妳唔好去銅鑼灣得唔得呀?

阿撳多幾撳個顯示器:「唔得,仲係聯絡唔到。」

激死人!

只可以喺個地圖上見到阿月既位置,但就唔可以聯絡到佢!

『阿賢轉去紅隧!我地要喺銅鑼灣救走阿月!』呢個係最後機會...

「了解。」

“依...”一聲響,輕型貨車立即轉入交匯處。

九龍區...接近地獄既心臟地帶...

交通都比較繁忙,路面上既車輛明顯增多...

『阿霖,繼續留意有無異樣...有無解放軍既蹤影。』

「了解。」

“颼”一聲響,輕型貨車衝入紅隧。

如果真係俾解放軍盯上,一定要盡快避開佢地...

好多車喺紅隧入面,阿賢駕駛住輕型貨車,喺車群中左穿右插。

左邊一架三層式巴士...

右邊幾架超級跑車...

無異樣...

唔見有解放軍既出現!

“颼”一聲響,輕型貨車衝出紅隧。

頭上有一大片黑雲,就好似ADAM一樣,遮蔽全個天空...

一棧又一棧燈光照射街道,照射公路...

喺公路上,只可以靠公路上既燈光、汽車上既燈光照明...

「阿月而家到左銅鑼灣!」阿霖望住顯示器講。

「已經見到佢喇...就喺前面。阿日!」阿賢提示我作好準備。

我靠近車門...

「3…」

手放到把手上...

「2…」

用力緊握...

「1…」

用力一拉!

“依...”輕型貨車急停!

我見到一個著住黑色連身長裙,嬌小既身影背住我企喺我面前...

我立即一手攬住佢條腰,再喺佢耳邊講:『我係妳阿哥,而家救妳走。』

我未等阿月有乜反應之前,一手抱佢入車內!

“吼!”一聲響,輕型貨車再次加速飛馳!

阿月好似仲未回個神,無講過半句話,背脊捱喺我身上...

『有無嚇親妳丫...細妹...』我望住眼前既細妹...

第一次會面既細妹...

「無~哥哥~時間岩岩好呢~」阿月望住我擰擰頭,對我莞爾一笑…

眼前呢個經常喺顯示器裏見到既面孔,既熟悉,又陌生...

「犧牲是必須的...」陳星飲一口咖啡。

『犧牲唔係必須...最後我都救左阿月返黎,而你亦都被人民否定,被流放!』我怒視住陳星。

「你係救左阿月返黎...你亦都發動左公投將我流放...但而家SPIRIT既情況有好轉咩?以我估計...比之前更差...」陳星擰擰頭...

無錯...

而家我地既情況的確係比之前更差...

甚至去到滅亡既邊緣...

『但係都唔可以埋沒人性,犧牲自己既親生女!』我點都唔會俾阿月有事,到而家呢一刻,我都係有同一樣信念。

「唔犧牲阿月,結果咪犧牲全個SPIRIT...你而家仲未明?死海文書已經玩完~一早就玩完~由SPIRIT開始腐敗一刻...」陳星傲視住我。

『未完…死海文書仲未完!SPIRIT仲未完全腐敗!至少我地屯門領域仲未腐敗!』我一直怒視住陳星。

「年輕既統治者...睇黎你仲未明...你實在太年輕喇~再過多唔駛幾耐,你就會明白我所做既一切都係岩~」陳星充滿自信...

唔駛過多幾耐就會明白你所做既一切都係岩?

你有乜野做得岩架?

我唔會認同囉!

「無事不登三寶殿...咁大陣象搵咁多人圍住我,又要你親自上黎搵我...有咩事丫?唔係想要我交李飛揚出黎丫嘛?」陳星望住我。

『你咁醒,好似成個先知咁,我仲以為你會估到添~我喺想你幫我交呢樣野俾李飛揚...』我由褸袋拎左隻名冊出黎。

「係名冊?死海文書其中一部份劇情...你知我反對死海文書架~咁我仲點會幫你丫?」陳星笑笑口,擰擰頭。

早知你會咁講架喇...

『想要D乜作交換條件?即管講!』就等我睇下你想要D乜!

陳星諗左一諗...

「一支沒藥喇~」陳星伸出一隻手。

『沒藥?你要黎做咩丫?』我疑惑咁望住陳星。

「用黎做研究工作~」陳星帶住微笑望住我。

研究工作?

咪玩啦...

睇你呢道乜都無,就係得間爛鬼木屋~都研究唔到D乜出黎架啦!

『好~我岩岩就有帶一支喺身~我交俾你,你就要幫我令嗰個李飛揚乖乖地帶上呢隻名冊!』我將沒藥同名冊交到陳星手中。

雖然我講得好輕鬆,但實際上我地已經無乜沒藥喺手...

要再問阿風拎...

實俾佢鬧死...

陳星接過兩件物品:「成交~」

『你唔好食言!我地撤離。』我一路起身,一路向眾行者發出命令。

「放心啦~得閒多D黎探下我丫~Bye~我既兒子~」

『永別。』

如非必要,我都唔會無啦啦走上黎!

『阿霖,幫我監視住陳星有無將名冊交俾李飛揚...有無都要同我匯報。』對住陳星呢D老奸巨猾,買個保險都要...

「了解。」阿霖立即走去一個隱蔽既地方...

「我地會再見面...我既乖仔...」

“吼...吼!”將要交低既野都交代好之後,盡快離開呢個唔屬於我既地方。

兩旁樹蔭下,我一直係道諗...

如果當初唔救阿月返黎,我地屯門領域喺老豆既管治之下,會唔會走得出陰霾呢?

好老實講句,唔一定。

我始終都係相信要自救,唔一定要犧牲阿月,唔一定要放棄死海文書...

方法總比問題多!

我地一定有方法去扭轉困局。

而且,我地而家行梗既方法都唔錯~

都算得上一步一步走向目標...

仲越黎越近…

令李飛揚帶上名冊...

放好架Aston Martin,穿過折疊之門返返入黑暗既世界...

『阿月~阿月...阿月~阿月~阿月~阿月阿月阿月阿月阿月阿月...阿月!!!』第一時間都係通知阿月,我借助老豆將名冊交到李飛揚手中先得...

唔係既話,一陣佢又會發我皮四…話我自把自為...

不過阿月一直都唔認機係咩意思?

點解阿月可以封閉思緒...

甚至禁止導引架呢?

『陳月!妳死左去邊呀?』我不禁對住個黑色既天空大叫起黎。

「我未死丫~」阿月終於以思緒同我連接。

『頭先阿風話妳有D事做就走左去,仲要一直都聯唔上,妳去左邊丫?』我用上一種責怪既語氣。

「我上左去誡律之牆上面丫~上黎搵我啦~」阿月講完之後,眼前出現線色既導引線。

『妳等我。』我跟住導引線一直行。

呢個阿月做乜無啦啦上左去誡律之牆?

上去睇風景丫?

我沿住導引線一直行,向住誡律之牆方向行過去...

行下行下,已經踏到世界之草...

靠近誡律之牆附近,都係一大片草地。

唔知點解,每次行上草地,心情都會突然平靜落黎...

真係好奇怪呢...

望一望遠處,已經見到位於誡律之牆牆身既升降機。

呢D升降機係我地之前為研究誡律之牆、EVE同ADAM已設。

到左而家,我地每個星期都會派人過黎上下去誡律之牆,做下實地視察。

至於點解阿月而家會上左去...

呢個方向...

“吱...”升降機以音速向上升,但我就唔會覺得有乜唔舒服。

呢種設計真係唔錯,唔會好似折疊之門咁浪費大量LILITH,又可以安全到達目的地。

前人既建設…

無錯,前人有好多貢獻,但佢地帶黎既破壞亦都唔少。

研究到誡律之牆既結構,以自己既技術製造出分裂之牆…

為左自己既利益去分裂SPIRIT...令自己陷入自毀既困局...

真係諷刺...

有人類歷史以黎,人類就不斷重複同樣既錯...

呢種錯係唔係永遠都改唔好?

“咔”好快就上到黎誡律之牆頂部...

頭頂就係深淵一樣黑既ADAM...

仲有喺ADAM裏面遊走梗既EVE…

睇起上黎真係好危險...

呢個咫尺之間既距離,會唔會俾ADAM吸入去?

又或者俾EVE既巨大能量擊至灰飛煙滅?

好彩既係,喺呢個距離仲未進入危險範圍~

但如果再高多一百米…

咁就難講喇...

而另一個得意既現像係,身處咁高既位置,你係唔會覺得冷,又唔會抖唔到氣。

就連一D風都無~

點解會咁?

其實好簡單,因為有壓縮空氣幕牆~

整個誡律之牆頂部都有壓縮空氣幕牆包裹住~

不過並唔係我地建造~

正確呢講,喺我地未研究出壓縮空氣幕牆技術之前,呢道已經存在住壓縮空氣幕牆~

我地既壓縮空氣幕牆技術,就係喺呢道研究返黎~

我一路跟住導引線行,一路望出外面...

呢個向位...

果然~

『喂~阿月~』離遠我已經見到阿月企左喺道,手上拎住...望遠鏡?

「哥~」阿月放低手上既望遠鏡,對我莞爾一笑…

『係道偷望嗰個李飛揚丫?』我不禁要酸一酸呢個春心蕩漾既細妹。

「係監視!」阿月谷起埋面,隊左個望遠鏡俾我。

『咩都好啦~』呢個細妹又口不對心...

我拎起左個望遠鏡,望過去小欖方向...

我見到李飛揚同老豆...坐左喺道嘆梗咖啡...

『我交左隻名冊俾陳星,要佢幫我轉交俾李飛揚。』我隊返個望遠鏡俾阿月。

我呢個做阿哥既,都好識趣既~無謂阻住佢偷望佢既李飛揚丫嘛~

「嗯~」阿月拎過望遠鏡後,繼續甜絲絲咁望過去。

『妳覺得咁樣可唔可行?』我望住一整片大地,有陽光下既大地...

「最好既方法~」阿月仲係好專心喺佢既李飛揚身上。

最好既方法?

真係最好咩?

不過如果係阿月講得出既,都唔會有錯...

「阿日,陳星已經將名冊帶到李飛揚手上。」阿霖與我思緒連繫。

『了解。』成功左...

陳星無食言,我地亦都向成功踏前左一大步。

接住落黎就係要靠綽姿帶李飛揚去啟動名冊...

但點樣先可以令綽姿帶李飛揚去境外呢?

「我地好快就可以再見...」阿月放低手上既望遠鏡,眼帶淚光...

望住面前既阿月,總有一份悽美...

你地之間既再見,希望唔係最後一面啦...

TO BE CONTINUED