「的確,李飛揚身處事發現場...而陳星就喺新西共外圍!」阿風指一指個實事地圖...

兩者確係有一段距離...

但...點解會係陳星?

唔係…我應該一早就估到係佢...

只有佢,先有最大可能擁有EVE同LILITH...





但點解佢會有...邊個俾佢架呢?

而點解...佢要喺呢個時候,襲擊新西共呢?

因為...唔通...

『陳星想殺死李飛揚?!』我望住喺新西共移動梗既紅點。

「有可能...好有可能...」阿風點一點頭...





弊喇...如果係咁...如果陳星既目標,真係李飛揚既話...

『有無辦法救到李飛揚?』我搖一搖阿風。

「唔...」阿風擰擰頭...

可惡呀!

呢個李飛揚真係多災多難!





前日先救完佢一次,而家又再一次身陷險境!

點好呢...呢次對手係陳星...點好呢?!

我望一望阿月,阿月仍然不發一語咁望住個實時地圖...

『阿月...』呢個時候,最擔心李飛揚嗰個,應該係阿月...

前日阿月為救李飛揚,差D連命都無...

但今次...

「應該無事...」阿月點一點頭...

『下?』我唔係好理解到,點解阿月可以咁冷靜...





正常黎講,一聽到話李飛揚身陷險境,阿月應該會發晒癲先係...

「應該無事...假如係爸爸發動既話...」阿月仲係眼定定望住眼前一個又一個顯示器...

爸爸?

妳竟然會稱嗰個罪人做爸爸?

嗰個罪人放棄妳...仲差D令你無命!

妳竟然仲叫嗰個人做爸爸?!

只見阿月對眼仲係相當堅定...





我真係唔明,我呢個細妹諗梗D乜...

一直都唔明...一直都唔明!

我一轉身,正要離開呢個實驗室...

「阿日,你要去邊丫?」阿風叫一叫停我。

『我而家要去小欖!你幫我留意住新西共嗰邊既情況!有乜重要事都立即通知我!』我向住升降機方向行過去。

陳星...

我一路喺黑黑綠綠既環境下一直行...

又係呢個陳星...





心裏一路喺道盤算著...

又係陳星呢個罪人喺道搞鬼...

點解你係都唔肯收手?

點解你係都要搞亂檔?

點解你唔破壞死海文書既計劃都唔肯心息?!

點解...點解呀...點解呀!

「我地要放棄審判程序。」老豆喺會議上,向各先行者宣布我地屯門領域既最新動向...





喺黑黑綠既會議廳裏面,各先行者都保持沈默...每個人都好似早有共識咁...

就連智海都係一樣...

『點解呀?點解要放棄呀?』我唔明白,由細到大,都係你堅持話要啟動審判程序!

但點解...而家話要放棄既人,偏偏又係你?!

眾人都係唔出聲,無任何反應,更無任何表示...

「而家既局勢已經唔同左。我地無辦法唔放棄審判程序。」老豆太態度強硬...

『而家既局勢有乜野唔同?』我指住老豆。

「我地而家...正正面對能源消耗既問題...越黎越嚴重...消耗得越黎越快...」老豆點一點頭...

能源正加速消耗…

『呢D...都係你既錯...』我怒視住老豆...

而家呢個局面,完全係由你一手一腳造成架陳星!

「而家唔係問責既時候。而家係要諗出解決方案既時候。我地無時間。」陳星嚴厲咁盯住我...

『你就緊係...』我都未將我要講既說話講完...

「我地必須終止審判程序。將所有人力、時間、資源全部都投放到無限能源演算方面!」陳星向眾先行者發出命令...

「了解。」眾先行者接受陳星既命令...除左我...

我係唔會認同你既做法...

唔會...一直都唔會...

我係一直都唔會認同你既所作所為架陳星!

穿過折疊之門...跑過沙灘...

“咯 咯 咯 咯 咯 咯 咯 咯 咯 咯”加快速度跑去車房...

“咔”坐上Aston Martin既駕駛座位...扣上五點式安全帶...準備以手動駕駛Aston Martin。

撳落刻有Aston Martin logo既Engine Starter後...

“吼...吼...”

陳星...

“依...”一下後輪咬地聲,Aston Martin沿住小路出到公路上...

究竟你係山上面,做左D乜野好事?!

“吼...吼...吼...!”Aston Martin高速喺破爛既公路上飛馳...

“颼”穿過一大片樹影...

我一定要...親自睇下你喺山上搞乜鬼!

“依...”我要睇下你可以搞到D乜鬼野出黎!

我已經流放左你上山架啦...

點解...點解你仲要死唔斷氣咁既樣?!

“依...”可惡!

當初我係唔係應該幫你洗腦...

將你個腦洗得乾乾淨淨...

咁就唔會有首尾跟!

“依...”而家...

而家俾你喺道阻鬼住晒!

「阿日,收到嘛?」突然之間,我既思緒中出現阿風既聲音。

『嗯!而家新西共嗰邊乜野情況?』我總係覺得唔會有好野...

「嗰邊既情況有D複雜...簡單黎講,李飛揚中左毒...我諗係解放軍做既好事...不過應該無乜大礙!因為毒性好似就唔係咁強...」阿風好似唔係好肯定咁...

『好似唔係?可唔可以肯定D?』而家既所有資料都唔可以估估下!

「數據就係咁顯示,李飛揚中既毒性唔係太強,而家送院中,唔會有生命危險。只係我覺得有D奇怪...解放軍既手段唔應該會手軟。」阿風今次黎個詳盡D既報告。

『只要知道李飛揚唔死得就OK喇!其他野就遲D先再分析。』最緊要都係李飛揚唔好有事。

「嗯...仲有一點...陳星正移動梗...照路線黎睇,應該返梗去小欖...」

『嗯...我明...再有乜野消息就立即通知我啦。』

「了解。」

陳星...你究竟想做乜野好事呀?!

“颼”Aston Martin穿過一大片綠色既樹海之後,好快就轉到去小欖入口...

我都開始減慢車速...

呢條路實在太過窄!

一個唔小心,真係會飛落街...

“依...”當我轉一轉彎,正要沿路上山之際...

等等...

“依...”我剎停左Aston Martin…

唔對路...

好唔對路...

我望一望岩岩我駛過左既地方...

無…無理由架…

我望一望翠綠既植物...

無理由會咁架...而家正值深秋...

我再望一望被翠綠既旋花科類植物吞噬既建築物...

已經連牆身係乜野色都見唔到...

無理由…而家係深秋時份...

無理由…無理由D植物會咁翠綠...咁有生命力...

無理由…無理由…

係由幾時開始,四周既植物都係咁翠綠?

係幾時...喺邊道?

好不可思議...的確...但最不可思議既,都唔係深秋時份,植物竟然會咁翠綠...

更不可思議既係,我隱約見到...被翠綠既旋花科類植物吞噬既建築物...有一點點...一點點...

藍色既...藍色既粒子...

『LILITH粒子?!』我望住少量帶有微弱藍光既粒子,驚訝咁嗌左出黎!

無可能...呢道點會有LILITH粒子既存在...

邊會有咁既可能...

LILITH…

“咔”我落一落車...

“咯 咯 咯 咯 咯 咯”一步一步,小心翼翼咁...向住座已被翠綠既旋花科類植物吞噬既建築物行過去...

無可能會咁...無可能...喺結界範圍外,唔可能有LILITH既存在...

我一步一步咁行過去...

走入茁壯成長既野草...野草都長到去腰間...

仲要係翠綠色既野草...

充滿生命力...

無可能...完全唔合邏輯...

呢道所有既一切...翠綠既世界...

“沙沙沙沙”穿過野草堆後,我左望望,右望望,留意一下四周既環境...

“吱吱”除左雀仔同昆蟲外,應該無人...

應該唔會有危險...

我再走近面前既建築物...

地下布滿翠綠既旋花科類植物...

呢種植物...

我一路踩過翠綠既旋花科類植物,一路行到黎建築物面前...

我記得以前呢道...係一座大約有兩、三層高,白色外牆既建築物...

而且呢座建築物已經荒廢左...

因為太過殘舊,又處於山腳既關係,一直都無打算過要重建或維修...

嗰陣時,都無咁多植物生長架...

點解而家會...

我再走近D,望清楚D...

翠綠既旋花科類植物之間,散發出一點點...淡淡既...LILITH粒子...

淡淡既LILITH粒子浮到喺氣空中慢慢消失...

係因為LILITH粒子,令植物急速生長...

一定係咁…呢D一定係LILITH粒子...

因為LILITH粒子有助植物生長既特性...

呢D真係LILITH粒子...

我再四周望一望,望望有無進入建築物既方法...

我記得...喺左邊...行前少少好似有門...

我貼住建築物一直行,行前多少少...再多少少...

我摸一摸牆上既旋花科類植物...好似喺呢道...我記得好似喺呢道...有道門...

我拔出匕首,一刀一刀砍落旋花科類植物上...

“嗡 嗡 嗡 嗡 嗡 嗡 嗡 嗡”一刀又一刀,斬斬砍砍左好多刀...

會唔會生得太多太密喇?

“嗡 嗡 嗡 嗡 嗡 嗡 嗡 嗡 嗡 嗡”又斬又砍左好多好多刀,旋花科類植物都飛晒落地,我亦終於睇到白白地色既木門...

木門睇黎都幾新淨,難道係翻新過?!

我諗多一陣,就再無理咁多!

推一推,再推一推,用力一推!

“依...依...依...依...”白色木門一打開,面前有大量微細既LILITH粒子湧出!

LILITH粒子一掂到我身體,就立即分解...

我再探頭望一望裏面...房間裏面...

成間房都係淡淡既藍色...

竟然...竟然可以有咁大量既LILITH...

先唔好理佢既純度…就係量都驚人...

雖然間房好暗,但我就見到成個空間都係藍色...

就好似喺LILITH既地洞裏面一樣...

“咯 咯 咯 咯”我一步一步行入間房…

有無燈架呢?又好似摸唔到牆上有燈掣...

我再行入D,行多入少少...

我見到有D光喺道閃下閃下...

一個又一個四四方方既係...

『顯示器?』我行近發光既顯示器...

係實體顯示器...好幾個顯示器放左喺張...長木檯上...

一個又一個顯示器閃下閃下,裏面顯示梗...

我再細心睇睇顯示器裏面顯示梗乜野...

一個又一個圖形...一堆又一堆數據...

又係呢D野...呢D我睇極都唔明既野...

究竟呢D圖形同數據,又係代表D乜呢?

可惡!以前我就應該多D跟阿風學習!

等我唔駛成個科學白痴咁...

“吱”突然之間,左邊眼角好似有道綠光一閃...

我立即擰過去睇一睇...

乜都無...

係唔係我眼花?

但頭先嗰一下綠光...好似係...

我向左邊方向行過去...

翹一翹過張木檯...

呢道真係有D暗...

就只可以靠四周圍既實體顯示器發出既光黎照明...

呢道究竟係乜野地方黎?

會唔會有人喺道呢?

我左手緊握匕首...一步一步行入去...行入陰暗既空間...越行越入...越行越入...

究竟有無人喺道...

我再行入D...再行得深入D...

我好似見到...前面有幾個...幾個顯示器...

顯示器一字排開...掛左喺大約一個人再高D既位置...

佢地既間距…大約有...半個...至一個人既身位...

光源仲係唔係好足夠...

我睇唔到前面仲有D乜野...

我嘗試繼續向前行...向住幾個顯示器既光源行過去...

當我再行前多兩步,開始見到有D野既時候...

『呢D係...唔...唔係丫嘛?』我再行近D...用手摸一摸...

玻璃質感既...圓柱體...

一個又一個,人咁高既玻璃管...

『係培植管...係培植人既培植管...點會...點會喺呢道...』我摸住個培植管...

呢道係培植人培植場!

我望一望整個陰暗既空間...

一個又一個被顯示器閃亮既培植管...

雖然裏面已經空空如也,但我可以肯定,呢D就係老豆以前所講既培植管!

估唔到...估唔到老豆為左研究培植人,竟然係道...係道建立培植場!

唔係…唔係為左研究培植人...係LILITH...

我記得喺SPIRIT分裂一年後,老豆同老鬼話對LILITH既產生有一個新方向。

佢地話喺不停對LILITH進行研究中發現,LILITH同人體有好大既關連。

佢地想借用人體黎做更多既實驗,但又唔可以用活生生既人做人體實驗...

因為喺實驗中,一定會出現對人體造成傷害既不良影響...

所以就諗到培植出培植人...

只要唔將思想植入培植人腦裏,佢地只係一種無靈魂既軀殼。

但呢種諗法只係自欺欺人!

無思想既人就唔係有血有肉既人?

佢地一樣係人!

我地唔可以話佢地無思想,就可以當係實驗品咁拎去做研究!

我地更加唔可以製造人!

咁做係違背道德!

所以呢個計劃喺未正式實行之前,就已經被一致否決!

但點都估唔到,老豆佢竟然...會喺呢道...

我繼續向前行,摸住一個又一個培植管向前行...

呢道有好多個...好多好多個...起碼都有二十幾個玻璃製既培植管...

點會咁既呢?

咁大型既培植場,阿霖佢地竟然察覺唔到?!

我繼續行,行到去見到個管內有液體既培植管...有人體喺裏面既培植管!

一個又一個,仲未完全成形既培植人...

有D好白,仲未有血色...

有D仲未有手腳,浮喺培植管入面...

有D睜開左雙眼...

有D血液都喺液體中浮動...

好殘忍...好恐怖...

望住一個又一個仲未培植完成既培植人喺培植管入面...真係好無人性!

點解可以...可以做出呢種咁無人性既行為!

再望多兩望一個睜大對眼...得一隻左手...一隻右腳…仲見到個心喺道跳下跳下既女性培植人...

我...我眼水開始湧出...

胃...好似有野要湧到上喉嚨...

我轉身立即狂奔!

“砰砰啪啪”我沿住入黎既路一路跑...

“砰砰砰啪啪啪”沿路整跌唔少野...

但我無理會...我唔想再理會咁多!

“啪”我一手拉開道門,跑到出室外!

『嘔...嘔...』我不斷嘔...嘔出黃膽水...

好殘忍...實在太殘忍!

點可能做出呢D事...

培植人…

佢地都有心跳架...

佢地都有感覺架...

點可能為左一己之私...做出D...做出D泯滅人性既事?!

陳星...你真係無人性...

一直以黎,你都係咁無人性...

『你完全無人性架!』