已經入左黎...

三個人...

就好似阿月之前所分析既一樣...

三個人走左入黎...

呢三個人想必係李飛揚、李軍、綽姿...





一切都好似盡在阿月掌握之中咁...

一切...一直...

望一望阿月,佢已經開左幾十個顯示器包圍住自己。

阿月拉出幾個顯示器,推一推...推向我地既前面,放大...放大...再放大...

顯示器裏面出現左幾個實時畫面...





係聚合反應堆(西部)裏面既監察畫面!

喺唔同既角度下,影住一個黑色為主既身影...

手中拎住把…刀…

High-frequency EVE blade?

唔係…佢唔係用EVE能量...





只可以話係一把High-frequency blade…

以刀黎展開戒備範圍...

睇起上黎,佢好緊張...

緊張到邊連把刀都揸唔穩...

突然間,佢將把刀收返入背後既刀鞘裏面,同時十隻手指頭發出紅光!

EVE Saber?

都唔係…

唔係用EVE能量...





只係一把Saber...

睇起上黎,佢地呢件Sacred-Armor同地嗰件真係差唔多完完全全複製出黎。

分別只係在於頭盔...顏色...刀鞘既位置...仲有使用既能源...

但講到能源...

『點解佢件Sacred-Armor仲可以啟動架呢?佢入左黎我地既結界範圍,電能應該會立即被瓦解架...』我仲打量梗畫面裏面既人...

「我開左終止電能瓦解器丫嘛~」阿月甜絲絲咁望住個顯示器...

『咩話?!妳開左終止電能瓦解器?!開左幾大既範圍丫?開左幾耐丫?點解我唔知既?』我眼都凸埋咁望住阿月!





「由佢地行到去沙灘嗰陣時開始囉~範圍都幾大架~」阿月仲係甜絲絲咁望住個顯示器...

完全無諗住要將我放入眼內...

『仲要幾大範圍添?妳知唔知妳咁樣要消耗大量LILITH架?!』我仲係碌大對眼望住阿月!

「怕咩姐~我地已經同元朗領域結合~LILITH既存量已經多左好多~而且...都去到最後階段啦~用多少少都唔怕啦~」阿月仲係甜絲絲咁望住個顯示器...

『都係姐...妳無開到終止電能瓦解器既話,佢地一入到黎,就可以捉住佢地啦~』佢地根本就無機會再使用身上既Sacred-Armor!

「咁樣又邊好玩架~」阿月對我莞爾一笑…

好玩...

「之後既你就食住花生睇好戲啦~」阿月再次甜絲絲咁望住個顯示器...





好玩...

呢個時候仲講玩...

呢D咁重要既時刻仲講玩?

究竟呢個阿月心裏面諗梗乜架?

只見畫面上出現多兩個Sacred-Armor既身影...

呢兩個人應該係李軍同綽姿...

「係時候喇~」阿月莞爾一笑後...





我見到畫面裏面其中一人跪左喺地上!

好似好辛苦咁...

而阿月就笑得有D陰險...

「做咩咁望住我丫?你想知我對飛揚做D乜呢?我只係將佢既名冊,連入EVE系統...佢而家已經成為左我地既人喇~」阿月甜絲絲咁點一點頭...

而其一個顯示器顯示出有新加入既人連上EVE系統...

同時亦顯示出李飛揚既詳細資料...

原來係咁...阿月想幫李飛揚加入EVE系統...

呢個傻妹~駛唔駛咁心急丫~

顯示器裏面既三個人,好似喺道商量梗D乜咁...

我諗...綽姿應該知點做既~

「而家就要Set條導引線俾飛揚~等佢乖乖地走黎呢邊~唔...仲有仲有~天欣~派兩部防禦者RU過去丫唔該~不過要解開E.R.F.D.S.架喎~」阿月仲係好專心喺個顯示器裏面...

正確黎話,佢只係專心喺李飛揚身上...

天欣好快手咁喺個顯示器上面畫幾畫:「我已經派出防禦者RU-E02784同防禦者RU-E02785。兩部都解開左E.R.F.D.S.。」

「好~跟住就係睇表演~」阿月一面期待...

我地都好專注喺個顯示器裏面...

只見佢地三個停左喺道,好似提高左戒備...

另一個顯示器顯示出有兩部防禦者RU去梗佢地既下方...

一部係防禦者RU-E02784,另一部係防禦者RU-E02785...

喺上面既佢地,其中一個行前左幾步...

嗰個人一跳就跳到空中,由背後拔出High-frequency blade後隨即擲到空中!

當High-frequency blade在空中發出“嗡嗡”聲打梗圈之際,嗰個人亦喺空中打左個轉,以左腳腳掌夾著刀柄!

一個轉身,嗰個人以腳掌夾著既High-frequency blade由上而下直指向防禦者RU-E02784既胸口!

“吱”一聲響,High-frequency blade由上而下插進防禦者RU-E02784胸前閃著綠白光芒既圓圈,再由背後刺出!

唔駛半秒,嗰個人利用反作用力,喺防禦者RU-E02784身上用力向上一彈,彈到空中,同時亦將腳掌中既High-frequency blade一勾,勾到空中!

當High-frequency blade喺空中發出“嗡嗡”聲打梗圈之際,嗰個人亦喺空中打左個轉,以雙手緊握刀柄!

一個轉身,嗰個人以雙手握著既High-frequency blade由上而下直砍左邊既防禦者RU-E02785!

“吱”一聲長響,High-frequency blade將左邊既防禦者RU-E02785一分為二!

落地後之後,嗰個人仲要擺出有型姿勢,熟練咁揮動手中既High-frequency blade,收返入刀鞘裏!

厲害厲害!

完美完美!

一連串高速及連貫動作,簡直就係戰場上既華麗舞姿!

呢一個人...『一定就係李軍!』

「盲既都睇得出啦~顯示器已經顯示出李飛揚既名字,喺仲企喺上面既人頭上~另一個岩岩先跳落去既...好明顯就係女仔身材~真係唔駛睇樣都知嗰個係綽姿~得返最後一個,咪一定係李軍囉~」阿月冷眼望一望我...

下下頂住頂住咁...俾我型下得唔得架姐...

我都係唔理阿月咁多,望返去顯示器裏面...

連李飛揚都已經跳左落去,佢地三個人企埋一齊,好似研究梗D乜咁...

對李軍黎講,一定會格外小心!

但對李飛揚黎講...一定會粗心大意~

始終佢地仲係唔知,自己一直都喺陷阱裏面~

只要綽姿推一推佢地...

佢地亦會乖乖跟住條導引線走過黎...

我細心留意住佢地三個人既情況...

佢地好似已經有左共識,開始行...小心翼翼咁行去出口方向...

而出口亦已經將壓縮空氣閘門解除。

佢地三個人已經可以自由進出。

佢地三個行到出去,喺出面左望望,右望望咁...

好出奇呢?李飛揚~

估唔到我地既科技可以咁先進呢~

而更出奇既事,將會發生。

“颼”一聲響...

閃爍著既強光不斷高速飛過!

李軍同李飛揚都用手遮住雙眼!

至於綽姿...佢習慣左能量聚合既情況~

不過...竟然又會咁岩遇上能量聚合...

我偷偷望一望阿月...

阿月望住個顯示器偷偷咁笑...

睇黎又係阿月搞鬼...

能量聚合完左之後,李飛揚行到去管道前,用手摸一摸...摸一摸壓縮空氣幕牆。

係唔係好驚訝呢?

你以為壓縮空氣幕牆係你地自己研發既咩?

錯~其實都係我地賣俾你地架咋~

不過當然就無人會知啦~

因為所有既交易,都喺由我地出面換左腦既行者進行既~

所有野都好似平常事~

所有野好似都唔關我地事咁~

有好多野你地都係估唔到~

直至到發生之時~

多個唔同角度既顯示器都顯示出,佢地三個人都小心翼翼咁落樓梯。

好專業既潛行動作...李軍...

佢地三個人當中,就只有李飛揚明顯表現出無經過潛行訓練。

你睇下綽姿既舉動~明顯就係老手~

不過又估唔到,李軍竟然察覺唔到呢一點~

李軍~你太大意喇~

一直有一個我地SPIRIT既人喺身邊都唔知...

睇黎李軍都唔係想像中咁厲害~

好快,佢地都已經黎到墓園前既公園。

而李飛揚好似被一大片世界之草嚇呆左。

李飛揚呆左一呆後,開始不自主咁行入草地兩旁中間既一條小徑上...

李飛揚一直沿住小徑行...一直行...

我都話架喇~李飛揚呢個傻仔,一D危機意識都無~

如果真係潛入黎既話,早就俾我地活捉啦~

係阿月唔知諗乜,話“咁樣又邊好玩架~”...

浪費時間!

李軍同綽姿立即跟上,展開戒備狀態!

但李飛揚仲係好似遊客咁,東望望,西望望,十足十參觀咁...

好好奇呢~

係唔係見到好多新奇既名字呢?

當然啦~你而家連接左EVE系統,就好似我地可以見到既野一樣~

對你黎講,一定係好新奇~

因為呢道有既野,好多都係你地無既野~

當李飛揚企係道,望多兩望,回頭一望之時...

李軍喺李飛揚背後以刀尖指住李飛揚!

李飛揚面前出現一道P.R.F.D.S.。

紅色...金色...金紅色既光芒就閃下閃下咁...

『搞乜鬼丫?內鬨丫?』我冷眼望住個顯示器。

「唔出奇丫~講到尾...李軍既任務係要監察飛揚,搵出佢會唔會同我地有關連~去到呢道先刀刃相向,算忍得架喇~」阿月笑笑口,點點頭...

點講好...我真係覺得而家既阿月,睇起上黎真係超陰森...

唔好話,望一望,我背脊都寒一寒...

阿賢突然插把口:「但佢地而家打起上黎...真係無問題?」

「放心啦~你地唔好唔記得仲有綽姿丫嘛~有綽姿喺道,一定搞得掂既~我包花生呢~」阿月莞爾一笑之後喺道搵包花生…

真係睇得咁通透?!

我望一望返個顯示器...

佢地兩個真係打起上黎!

不過如果話打起上黎,不如直接D話李飛揚俾李軍撳住黎打!

李軍一斬一砍,一踢一爪,下下都打中目標位置!

反而,李飛揚就連招架都黎唔切!

果然係經過訓練既軍人~

唔單止係出色既指揮官,就連埋身肉搏都相當優越!

唔知如果我真係要同李軍單對單打返場,究竟會鹿死誰手呢?

不過而家唔係諗無聊野既時候...

睇住李軍打到李飛揚真係飛起...

我都開始有D擔心...李飛揚會唔會就咁就俾李軍打死架?

『唔係喎…再咁打落去…李飛揚真係會俾李軍殺死架喎...我地駛唔駛派人去救佢丫?』我望住李飛揚俾李軍打到一仆一碌...

李飛揚真係好弱架!

「你唔係信唔過綽姿丫嘛~哥哥要唔要花生?」阿月一邊望住個顯示器,一邊隊包花生埋黎...

唔係話信唔過...

但係睇起上黎,李軍真係好狼死喎!

你睇下...你睇下...李軍D連續技,打到李飛揚連想企定定都無機會...

真係睇到我心都痛埋...

平時阿月又話點愛嗰個李飛揚...而家咁睇佢俾李軍打到成隻狗咁,唔心痛架咩?

當我打量左阿月一眼之後,再望返去個顯示器...

我見李飛揚已經跪左喺草地上,而李軍就已經跳到半空中,左手握住背後的High-frequency blade,準備向李飛揚使出全力一擊!

無喇無喇…李飛揚玩完喇...

就喺千鈞一髮之際,綽姿既刀鞘由背後移動到腰間,左手握住腰間既High-frequency blade,以忍步高速接近!

“砰”一聲響,綽姿使出拔刀術!斬到李軍既High-frequency blade上!

刀刃與刀刃間擦出耀眼既電光!一瞬間,李軍整個被打開!

李軍凌空轉身落地,仲不忘擺出有型姿勢!

“啪啪啪啪啪啪啪啪啪啪啪”

「我都話架啦~綽姿真係有型~」阿月一邊食花生,一邊拍手掌...

厲害...厲害...

我係指綽姿...

綽姿呢一下攔截,真係青翠利落...

估唔到...我真係無諗過...綽姿既劍術...原來已經去到呢個地步...

我相信...呢道在場咁多位先行者...最多都係同綽姿打個和...

我繼續留意顯示器...

綽姿揮動手上既High-frequency blade,收返入腰間既刀鞘裏...

此時李軍指住綽姿...綽姿亦都指住李軍...

佢地喺道對話梗?

唔知...佢地並無聲音發出...

可能係用頭盔裏面內傳既通訊設備...

佢地講咩都無關係...只係知佢地喺道指黎指去...

李軍又拔下刀咁...

睇黎都係講梗數~

睇住佢地指手畫腳左好一段時間,佢地又開始起步。

好快佢地就行到去墓園...

睇住佢地企喺墓園上面...

做咩丫李飛揚?

你一定睇到呢D一支又一支既黑柱係乜黎架啦。

你又會有乜野感覺丫?黎自地獄既惡魔!

佢地繼續行,一直行到去管道前面...

呢條密封式架空天橋,就係由墓園通往我地呢道既主要路徑。

「天欣~派出六部防禦者RU由我地呢道過去墓園~唔好見到李飛揚佢地喔~要扮唔知~扮唔知~」阿月陰陰嘴笑...

「了解。」天欣跟住阿月既指示做...

又想玩乜把戲丫...

「呢個時候唔派D人去行下,佢地會覺得太安全...有一種請君入甕既感覺...所以呢~就要搵D野嚇下佢地喇~」阿月用食指篤下篤下自己個嘴仔...

變態架...

世上就只有變態既人先諗得出咁花心思既野...

「已經派出左。」天欣喺個顯示器上畫下畫下...

顯示器上顯示住六部防禦者RU跑梗。

同時,李飛揚佢地亦都行左入密封式架空天橋!

佢地跪左一跪喺地下,望左一望,再以忍跑急速移動!

睇黎佢地已經見到天欣所派出既防禦者RU...

好強大既偵測力~

Sacred-Armor果然厲害...

就同我地既Sacred-Armor真係無乜分別~

只可惜佢地既係用電能,出力會不足...

而我地用既EVE能量,又唔可以喺結界外使用…

如果唔係,Sacred-Armor真係天下無敵...

鏡頭一轉,佢地三個已經伏左喺儲存EVE聚合能源既壓縮空氣箱。

六部防禦者RU亦好快咁跑過。

當然唔係防禦者RU偵測唔到佢地既存在,只係扮唔知佢地喺道姐...

究竟阿月心裏面諗梗乜架...乜呢種貓捉老鼠既玩意,真係好好玩咩?

貓捉老鼠...

六部防禦者RU跑過左之後,李飛揚佢地亦好快咁跑到去監控中心(西部)附近...

「天欣~三樓派四個去巡邏~四樓派八個分散喺唔同位置站崗~二樓兩個駐守~一樓派出四隊隊伍去巡邏~」阿月收起幾個顯示器,再伸左個懶腰...

「了解。」天欣好快手咁喺幾個顯示器上面掃下掃下...

我再望一望佢地三個人...李飛揚同李軍眼定定咁望住個入口...

一個中門大開既入口...

老老實實,俾我見到呢個無遮無掩既格局,我都覺得有問題啦...

好明顯就係一大個陷阱!

阿月個心點諗架...唔係真係當李軍佢地傻架嘛?

只見阿月又係道陰陰嘴笑…

真係心都寒埋…

都係將視線放返落李飛揚佢地道...

我見到綽姿一個忍步就跑向入口去!

綽姿果然係叻女!

係適當既時候做適當既野!

綽姿咁樣做,李飛揚同李軍都無辦法唔立即跟喺綽姿身後!

佢地三個終於入左去監控中心(西部)!

「已經照妳既意思,喺各個地方部署好。」天欣留意住幾個顯示器...

「嗯~咁妳就因應我俾你既設計路線,命令防禦者RU點樣行喇喎~呢道交俾妳架喇~我地要去準備一下架啦~」阿月向天欣打左個眼色...

「了解。放心交俾我。」天欣點一點頭...

下下下?

準備?

準備D乜丫?

「阿賢~阿風~哥哥~我地行啦~」阿月翹一翹住我隻手...

行?行去邊丫?

俾阿月翹住一直行...

「阿賢~阿風~你地著好Sacred-Armor去我Send俾你地既位置守候~」阿月陰陰嘴笑…

令人心寒既笑容...

「了解。」阿賢同阿風回答過之後,立即行去第二邊。

『咁我地又要去邊丫?』我冷眼望一望阿月...

「換返件靚衫先~」阿月對我莞爾一笑…

換返件靚衫?呢個時候仲換乜鬼野衫丫?

入到阿月間房,阿月好快手咁喺個衣櫃裏面拎出一件...黑色連身裙?

呢件黑色連身裙...咪就係我當日救阿月返黎既時候,佢著住嗰件連身裙?!

「我要令飛揚有個難忘既再遇~所以就一定要著返呢條黑色連身裙~」阿月除左身上既衣服。

『妳就係最鍾意搞埋呢D花巧野架喇...』望住阿月只除剩黑色既內衣褲...

阿月真係白到識發光...

「咩花巧野~你知道嘛哥哥~當日,其實係飛揚要向我表白既日子黎架~我靚唔靚丫~」阿月著好件黑色連身裙之後,喺我面前轉左一圈...

『靚喇靚喇...妳最靚喇...我地行得喇嘛?』我轉一轉身,行出阿月間房。

「放心喎~我計得好準架喎~當我地去到要去既地方,佢地就岩岩好落網~嘻嘻~」阿月上前翹一翹住我...又露出陰險既笑容...

俾阿月一路翹住行,一路望住阿月呢個陰森樣,有時都覺得嗰個李飛揚都幾可憐...

俾阿月當係老鼠咁玩...

仲要玩左十幾廿年...

自己仲要唔知先死架嘛…

如果我係李飛揚,知道自己呢三年來一直為救阿月所做既一切,都只係俾阿月當玩具咁玩既話...我真係癲都似...

唔知李飛揚知道呢個事實之後,頂唔頂得住呢?

好快就會知...只要一陣見到佢...佢見到阿月...

「好快就可以再同飛揚相見喇~」阿好似好開心咁...

岩既…佢都期待左三年喇…呢個傻妹...

但係...

『如果我話...我會掉李飛揚個腦落大海餵鯊魚呢?』我認真咁望一望阿月...

「你唔會既~因為你唔捨得要我難過既~哥哥~」阿月對我莞爾一笑…

望住一大片白光既門口...

阿月行到我前面...

好快...好快...

好快就可以親眼見到李飛揚呢個惡魔既面貌...

面對面...

呢個係一個歷史既時刻...

一個重要既時刻...

“咯...咯...咯...咯...咯...咯...”幾下腳步聲...

“咯...咯...咯...咯...咯...咯...”穿過刺眼既白光...

“咯...咯...咯...咯...咯...”已經見到...有兩個黑色既身影趴左喺地上...

“咯...咯...咯...咯...”越來越接近...越來越清晰...

被我地著住Sacred-Armor既行者重重包圍既兩個黑色身影...

李飛揚...李軍…

佢地兩個都抬起個頭,望住我地呢邊...

李軍表現得比較冷靜,但李飛揚呢?

李飛揚面上充滿驚訝...

當然啦~

因為...李飛揚已經可以...清清楚楚咁見到...

「阿...

「我就說,我們早晚也會遇見,我不會騙你的...飛揚。」

...月?!」