《香港革命戰》(上): [24-審判之日] PART 2
所有既分析，都指向李飛揚佢地會喺今日之內進行對我地SPIRIT既潛入行動。
而我地而家要做既野就係...等...
等...風吹草動...
等解放軍基地嗰邊有乜野異樣...
究竟喺解放軍基地監視梗既行者，會為我地帶黎乜野既消息呢?
係好?定係壞呢?
任何既消息，都會直接影響到我地打後既部署。
我地幾個人，都好留心咁喺控制室裏面望住一個又一個顯示器...
而我內心其實係有D緊張...
「李飛揚既位置...喺地圖上消失左!」阿風指住個實時地圖。
『下?消失左?點解會咁架?』唔係咁快就無晒能源喇嘛?!
阿風拉出幾個顯示器，然後立即回答:「暫時仲未知係乜野情況...就連數據同步都終斷左...」
連同步都終斷埋...
咁搞法...我地會失去李飛揚既位置...
無得監視住李飛揚既動向，對我地好不利...
阿風左睇一睇D數據:「照數據黎睇...應該係受到阻隔...又或者係一D干擾...始終喺外面...連接都唔係咁穩定...」
阻隔或者係干擾...其實都係好正常...
始終都唔係喺結界範圍以內...
但好衰唔衰偏偏就喺呢個咁重要既時候...
『繼續留意住李飛揚既情況。始終掌唔掌握到李飛揚既動向，對我地黎講都係好重要既一著!』掌握到李飛揚既動向，就等於掌握到佢下一步會點行!
我地唔可以有任何錯失...
因為機會可能只係得一次!
“叮”就喺呢個時候，實時地圖靠近解放軍基地既位置，有一點紅點閃下閃下!
「有行者匯報!開啟廣播。」阿賢喺個顯示器上面拉拉畫畫左幾下...
好緊張!
究竟會有乜野消息匯報返黎呢?
「報告!岩岩喺我呢個位置，發現有一架大型既裝甲運兵車由隧道駛出!」喺空氣間傳黎一把女仔聲。
係實時地圖上，紅點所在位置既行者!
阿賢立即追問:「估唔估計到佢地駛向既方向?」
一把女仔聲立即再次出現:「以佢地使用既公路估計...應該係去梗荃灣方向!」
荃灣方向...
咁就應該係...應該係駛黎呢邊!
但係裝甲運兵車上面，會唔會係載住李飛揚佢地呢?
『有無李飛揚名冊既位置?』我立即問問阿風。
阿風喺幾個顯示器上面望一望下:「未有...仲未有...李飛揚手上既名冊仲未連接到...」
仲未連接到...仲未可以肯定得到，李飛揚佢地喺唔喺裝甲運兵車上面...
阿賢向行者發出指令:「你地繼續喺而家既位置監視!荃灣區既行者立即放低你地手上既工作，留心以下既指示...有一架裝甲運兵車有機會路過你地既區域。你地立即留意各條公路，如果有發現大型裝甲運兵車駛過既話，立即向我匯報。」
究竟車上面既，會唔會係李飛揚佢地呢?
如果架裝甲運兵車真係會駛過荃灣區既話...呢個可能性就大得多!
但又會唔會只係李軍排出一隊解放軍小隊黎探路呢?
我諗就唔會...
以李飛揚既性格黎睇，佢一定會親力親為...
就好似自己揸車黎到小欖...
就好似自己揸車去阻截我地既擄劫行動...
就算李軍點樣堅決，李飛揚都會諗好辦法去說服佢。
李飛揚一定會親自走黎救阿月，先會心息...
所以，無論係點都好，李飛揚一定會想盡辦法，都要親自黎我地呢道走一轉!
“叮”就喺呢個時候，實時地圖有一點紅點閃下閃下!
今次既位置係…荃灣!
阿賢立即喺個顯示器上面拉拉畫畫左幾下:「有行者匯報!開啟廣播。」
「報告!呢道喺荃灣公路附近!就喺岩岩十秒之前，有一架解放軍既大型裝甲運兵車駛過!應該係你所講嗰一架!」喺空氣間傳黎一把男人聲。
阿賢立即追問:「知唔知道佢地去梗邊個方向?」
男人聲立即回答:「我見到佢駛左入...廢棄左既公路...」
「了解...喺荃灣既行者可以做返自己要做既事。」阿賢放大個實時地圖...
阿賢拉一下拉下，又拉下拉下...
「係呢條公路...」阿賢指一指地圖上條公路...
『係舊既屯門公路...』呢條古代通往我地呢道既主要通道...
阿賢點一點頭:「根據情報所講...解放軍正要重建呢條舊公路...目的係要方便行軍...為進擊我地既計劃舖路...」
『我都有聽過...聽智海講過...如果裝甲運兵車真係駛左入去既話...』我仲未將我要講既野講完...
阿月左手一掃，掃出多個顯示器。
顯示器包住左嬌小既阿月。
『阿月...』我又係未將我要講既野講完...
「係時候...係時候為陷阱作好準備。我會修改好聚合反應堆(西部)一帶既設施...我會清空嗰道既所有人...」阿月雙手不停咁喺顯示器上面掃下篤下...
係阿月既計劃...
係阿月既精心設計出黎既陷阱...
「天欣，幫我準備一隊...十隊防禦者RU...」阿月一邊掃顯示器，一邊指示天欣。
「了解。」天欣亦掃出幾個顯示器。
「阿賢，你可唔可以幫我準備一班穿著Sacred-Armor既行者隨時候命?」阿月雙手掃個不停。
「妳要幾多人手?」阿賢亦掃出幾個顯示器。
阿月諗左一諗:「越多越好。」
「了解。」阿賢快速喺幾個顯示器上掃幾下。
到喇...期待已久既一刻終於要黎到喇...
到在最後既時刻喇...
只要引到李飛揚同李軍入黎...
只要引同李飛揚換腦...
只要以李飛揚既身軀，帶住關鍵鑰匙...
就可以令MINDER啟動審判程序!
大家都各自做好迎接李飛揚同李軍既準備。
“叮”喺實時地圖上面...舊屯門公路上...出現左一點紅點...
紅點閃下閃下...閃下閃下...
「係李飛揚既訊號!李飛揚既訊號再之出現!」阿風指住個紅點...
我望住粒紅點...由靜止...開始移動...開始加速!
好快...好快...紅點移動得好快!
『阿霖!』我立即以思緒連接阿霖!
「阿日?」阿霖亦都好快咁作出回應!
『李飛揚佢地已經由舊有既屯門公路去梗你地嗰邊!你先派人去小欖同黃金海岸附近!留意佢地既行動!但唔好太接近佢地，佢地有Sacred-Armor...有可能會探測到你地既存在!千萬唔好俾佢地發現!』如果俾佢地發現到阿霖佢地，咁就麻煩...
「了解!我地會喺遠距離監視!」阿霖好快咁回答。
『嗯!要小心!』
阿霖佢地辦事，其實我可以好放心。
「聚合反應堆(西部)一帶已經清空。而家嗰道已經空無一人，非常安全。而家交通方面，亦都已經向EVE系統作出修改，所有車輛都會轉用其他路線。」阿月點一點頭。
咁快?
估唔到...阿月既效率真係可以咁高...
清空晒嗰道既所有人，就算真係打起上黎，都唔會造成人命傷亡。
天欣亦都點一點頭:「十隊防禦者RU已經準備好，隨時可以動用。」
天欣嗰邊都已經搞掂!
呢個時候，阿賢亦都點一點頭:「我手上既所有行者都已經著好Sacred-Armor，共有50人。進入候命狀態。」
連阿賢嗰邊都已經準備好!
阿風亦都拉出一個顯示器:「黃金海岸與聚合反應堆(西部)出入口既連接穩定。所有能量水平都處於正常水平。」
我地呢邊既所有野都準備好晒...
而家就只係差李飛揚佢地行入黎...
但話說回來...
『阿月...你既計劃究竟係點架呢?』我疑惑咁望住阿月...
講開又講，我真係好似從未聽過阿月講個陷阱係點既樣...
點樣引李飛揚...引到邊道...點樣捉住佢地...要派幾多人...全部細節同唔係細節都無提過...
「嘿嘿~到時你咪知囉~」阿月對我莞爾一笑…
係囉...就係咁囉...
阿月就係咁架喇...
一問起佢正經野，佢總會好唔正經咁答架...
喂大姐~而家唔係講玩架喎...
分分鐘死人架喎...
唔好話死唔死人喇...萬一有乜差池，俾佢地走得甩，到時真係...
玩完架喇喎...
喺呢D咁關鍵既時候，妳係唔係應該認認真真咁老老實實講下妳既大計呢?
「放心啦哥哥~包保萬無一失架喎~」阿月又對我莞爾一笑…
妳咁既樣，叫我點放心得落呢...
就喺呢個時候，尚冬既聲音出現係我腦海入面:「阿日!我而家喺小欖附近，發現五個可疑人物正在高速接近...」
五個?!
『開啟廣播。尚冬，你見到五個可疑人物?』五個?
「無錯，我見到有五個人，好似機械人一樣既五個人...展開左五芒星陣，由青山公路行梗去黃金海岸向方...」尚冬既聲音響遍整個控制室。
天欣立即發問:「哥，你而家既位置喺邊丫?安唔安全丫?你唔好咁接近佢地丫!佢地有Sacred-Armor!你唔夠佢地打架!」
睇黎天欣好著緊佢哥哥~
「傻妹!我緊係知啦!我而家離佢地好遠好遠~佢地唔會察覺到我既存在既~」尚冬答得好輕鬆。
『但...五個人?你真係睇清楚係有五個人?』我再質疑一下...
「嗯!我可以好肯定係五個人!雖然著左甲...但我都睇得出...有三個人係標準身材...一個好似係女仔...仲有一個係好肥下...」尚冬繼續匯報...
女仔嗰個一定係綽姿...肥嗰個應該就係王家榮...三個標準身材既一個係李飛揚，另一個係李軍!
咁仲有一個呢?
「仲有一個應該係藍志勇!」阿風點一點頭。
『藍志勇?點解你會覺得喺嗰個上等人呢?』我疑惑咁望一望阿風。
「科學家既共嗚~」阿風笑一笑…
而阿風呢一笑，有D奸險...
「佢地已經離開左我既監視範圍...」尚冬繼續匯報...
「哥!你要小心D丫...」天欣明顯好緊張佢哥哥~
「傻妹黎既~都話左佢地已經離開左我既監視範圍咯~一定無事啦!妳要小心D先岩丫!要交手既話，提高警覺丫!知唔知丫?」尚冬都好語重心長~
「嗯...我...知道架喇...」天欣點一點頭...
「好喇...我...報告完畢。」尚冬既通話終斷。
我地幾個人，都將注意力放返喺個實時地圖上面...
紅點一路移動...一路移動...
一路向住黃金海岸方向移動...
『五個人...有四個係敵人...阿月...有無問題?』呢D時候一定要問清楚阿月...
「無問題~」阿月答得好輕鬆，「多多都無問題~而且...我相信入黎既...就只有三個人~一個係綽姿~一個係飛揚~最後一個係李軍~」
『嗯?點解咁肯定呢?』我真係好懷疑阿月既推測...
「原因?好簡單姐~佢地幾個唔計綽姿，就只有李軍知道我地SPIRIT有幾可怕~唔計飛揚，嗰兩個心底裏一定覺得SPIRIT比想像中更可怕~李軍唔會俾佢地冒險~佢地自己更加唔願冒呢個險~就係咁~」阿月對我莞爾一笑…
就係咁?
點解阿月好似乜都早有準備咁?
好似乜都知道晒咁?
而事實上，又會唔好真係好似阿月所講咁...跟住阿月既故事發展落去呢?
就喺呢個時候，阿晴既聲音出現係我腦海入面:「阿日!我而家喺黃金海岸附近，發現五個可疑人物...」
已經去到黃金海岸附近?
我再望一望返實時地圖...
果然...紅點已經差唔多去到黃金海岸附近!
『開啟廣播。阿晴，你仲見到D乜?』差唔多喇...呢個位置...
差唔多就係製作片段既地方!
「我見到...等我睇清楚D...我見到...佢地既五芒星陣好似...有個人離開左隊伍...隊形好似...破壞左...嗰個身影...行左入草堆...一直向住...好似一直向住...向住焦土向方...行過去...」阿晴停左一停…
係喇…係喇…
「係飛揚。」阿月講出我心裏既說話...
無錯喇...呢個身影...一定係李飛揚!
佢諗返起...因為佢而家眼見既...就係我地為佢精心製作既...影像...
完全一模一樣...
係唔係覺得好驚訝呢~李飛揚~
「嗰個人單膝半跪摸一摸地上既焦土...其餘四人跟住佢身後...」阿晴繼續匯報...
無錯...就同影像裏面既一摸一樣...
李飛揚已經俾之前名冊投射落佢腦裏面既影像所吸引!
「嗰個人放低手上既焦土後，開始沿住焦土一直行...一步一步行...行去破爛既建築物群嗰邊...突然跑起上黎!跑左去架坦克殘骸道...摸左一摸...」阿晴繼續匯報...
喺嗰架喇~我同綽姿坐過嗰架坦克殘骸...
「其餘四人都行到去嗰個人身邊...佢地好似...好似傾梗D野...」阿晴繼續匯報...
係唔係覺得好神奇呢?
係唔係好困惑，點解會同iPad...仲有腦裏面出現過既影像，會喺而家確確實實咁出現喺眼前呢~
「另一個人開始行...沿住焦土一直行...一步一步行...行去破爛既建築物群嗰邊...佢地開始保持隊形...跟住前面嗰個一直行...」阿晴繼續匯報...
繼續啦~繼續行過去啦~
岩架喇~只要你一直行...就好似先前既影像咁一直行...
「佢地慢慢行入遺址...喺遺址裏面周圍望下...望下地下...又望下牆身...佢地穿過左遺址...行最前嗰個人，望住誡律之牆…另一個人行到去嗰個人身邊...好似又喺道傾梗D乜咁...」阿晴繼續匯報...
仲有乜好傾丫?
快D過黎喇...
我已經等得好心急...
唔只我...
在場既所有人，都靜晒落黎...
好緊張咁等梗你走入黎...
「佢地企左喺原位傾左好一陣...有一個人開始起步...開始喺沙灘上...行...行過去...行梗過去...折疊之門既機關位置!」阿晴繼續匯報...
無錯喇!走過去啦!
你要搵既阿月，就喺嗰道...就喺嗰道...
「嗰個人以忍步跑過去折疊之門既機關位置!佢跪喺機關前...用手掃一掃...折疊之門開啟左!嗰個人行入折疊之門裏面!佢行左入去折疊之門裏面!」阿晴有D緊張!
好!成功左喇!
「仲有兩個人跑到去折疊之門面前...好似有D猶豫...佢地兩個好似傾梗D野...另外兩人企喺遠D既位置...近住折疊之門嗰兩個人好似有左共識...同後面嗰兩個人點一點頭...轉身走左入去折疊之門!而家有三個人入左折衝之門!另外嗰兩個...兩個人轉身走左去...佢地好似要離開黃金海岸!佢地一直跑...向住回頭路一直跑!跑得好快...以忍步跑得好快好快!已經離開左我既監察範圍!」阿晴十分緊張!
『了解...你地而家可以休息下...』打後既...
「了解。」
就到我地呢邊!