一教瞓醒變妹妹<<少少甜，卜卜脆>>: 第五十五章 訂婚
第五十五章 訂婚
迎面走過黎依個男仔我一眼就認到，就係果日塞請柬比我果個人，雖然當日我冇仔細睇過佢個樣，但佢既眼神實在係太銳利喇，令我過目不忘！
隨住佢越黎越近，我既心跳亦越黎越快，好似係佢身上有一種氣場在震懾四周，令人好自然就對佢肅然起敬。
唔通佢就係葉恬？睇個樣差唔多二十歲以內既樣，銀色頭髮，面貌非常俊朗脫俗，並且皮膚白皙，不過用蒼白黎形容更合適，身高應該大約一米八零左右，比我女仔身狀態高左一個額頭。
就係佢行到我面前既時候，祖先係袋裡輕輕撞一撞我，應該係叫我多加注意同小心。
面前依位“冰冷”到死既葉生，突然向我伸出一隻手，我立刻警惕向後退左一步，以防佢有咩暗器之類。
咦，乜都冇發生，只係伸出一隻手！我地齋企係度有十幾秒，如果係平時，咁尷尬同搞笑既場面，兩邊堆滿人，係大庭廣眾之下，一個男仔向一個女仔伸手想握手，而女仔卻擺著拔刀斬殺既姿勢在啤佢，完全冇諗過伸手去握，一定會比人笑到面黃！
只係現場既人冇一個笑，甚至臉色都顯得非常驚恐，估計佢地係非常非常敬畏依位“葉家公子”。
“黎”依位銀髮靚仔淡淡向我講，就一個字，但係我好似聽到千言萬語一樣，似乎佢俯一個字裡包含情感非常多！
依個時候我注意到，佢眼神變得溫和，唔似岩岩開始果時咁有“寒意”，似乎而家顯得冇頭先咁危險。
我遲緩手伸過去，同時準備好凝結藍火出黎助戰！
我手伸得極慢，估計從我開始到我隻手接觸到佢隻手足足有二十秒，佢只係安靜地等著，樣子顯得溫，同岩岩出場時氣場完全唔同！
我隻手慢慢伸著，點知終於碰到佢指尖既，佢大力地一下握住我隻手，依一下嚇左我一跳，心諗個死老野之前都係扮哂野？ ！果然有埋伏！
之後更加奇怪，因為佢握住我隻手之後並冇我預期攻擊或偷襲，只係將我隻手向下放，將我隻手挽住佢手！依個係乜鬼情況？！我想掙開，佢又輕輕地係我耳邊講：
“跟我黎”
聲音顯得非常溫柔同寧靜，令我覺得佢暫時冇乜敵意，於是我都唔急，即管睇下佢搞乜花臣 ！
就係咁，依位高大靚仔就挽住我手向前面一個巨大平台上走上去，我一路行一路係度諗依個情景同動作令我覺得好搞笑！一諗到實情係兩個大男人（雖然我表面係女仔）手挽手行紅地毯，其中一個仲係六百幾歲既老男人！雞皮都竪起！
祖先係袋裡又撞一撞我，提醒我要時刻注意，好啦！而家的確唔係發白日夢既時間，條友究竟想搞乜呢？
順住我地走既方向，我見到後面有一個稍高一d既平台，設計好獨特，本身應該有係古典風格黑石平台，但四周越偏偏有好多現代化，甚至係睇落好先進小裝置，令依個平台顯得有種古今智慧結合既感覺，審美上係絕對一流。
我將注意力現在同時分配給兩個地方，一係我左邊銀髮男，另一個就係古怪平台，我心裡對依平台一直有一種提防，感覺佢好似伏味濃，但係依家又睇唔出有咩問題！最主要我係想黎搞清楚當年發生左咩事？！依個比較難完成既任務！
無奈，而家我只可以被佢拉上台，睇下佢想點，只能見一步行一步。
話咁快，我就已經到黑石平台面前，心裡好忐忑，面前平台居然好似變形金剛一樣變形！係我地面前出現左三級黑石台階！
我回頭想睇望一望小依，發現佢一直就跟係我後面，同我地一前一後都上左依個黑石平台，我本以為銀髮犀利哥會阻攔佢，估唔到人地乜野都冇講，仲係果副波瀾不驚淡定表情，同我地一齊走到平台中央，咁大個平台上得我地三個人，而下面卻人山人海有幾百對眼人正望住我地，感覺好唔自然。
我仲係度諗緊佢想做乜既時候，面前既地板居然又開始變形！我地三個面前既地板都開始變形了！又變乜鬼呢？唔通而家先露出陰謀！ ？
過左兩秒，終於睇清楚，搞到咁大陣象居然只係想變成一張三座位既黑石櫈！不過依張櫈雖然非常簡單但造型格外型格。
“坐”銀髮哥向我同小依淡淡講，然後自己首先坐落去，睇佢個樣，依張櫈應該唔會突然屁股底下出火箭送我上天掛，我亦小心地坐底。
我一坐定，從黑石平台另一邊就走來一個主持人樣男人，行到我地面前大概五米既地方，對我地好禮貌笑，點一點頭，然後轉身面向眾人，用一段客套同幽默既開場白講野，之後又邀請一d不知名既嘉賓上台，坐在係我地旁邊，當然，同我地坐埋同一張黑石座椅，睇個樣好似有d重要事要宣布？
但關我屁事咩？！我係搵葉恬傾家族歷史同順便解決解決家族遺留問題！結果我黎到之後發生既事好似同我目的都毫無關係！莫名其妙就成為貌似座上賓！
而家我唔敢輕舉妄動，只係不時地觀察一下旁邊銀髮哥同四周既人，以防佢地暗算。
時間過左五分鐘，除左個主持人仲係度滔滔不絕咁講野，其他乜都冇發生！
個主持人所講既野，我大部分都冇聽入耳，亦無心聽，只有最後介紹人名既時候，我稍稍注意一下，主持人逐一介紹台上既所有嘉賓，唯獨沒有我地三個人。
正以為我地可能無關緊要既時候，主持再一次開腔，並且帶著非常激動口吻講：
“下面有請我地今天訂婚主角，葉恬先生同今日就要成為佢未婚妻既星月小姐！”
“哦，原來今日係葉恬既訂婚派對，怪唔之得之前果d人對我提問會咁驚訝，哈哈哈哈，，”我岩岩開始係心裡咁諗之際，但當我聽到“星月”既時候，嚇到差d係櫈度跌落黎！發生咩事！ ！ ！我屌屌屌！我幾時成為幾百年老野既未婚妻？！
“下面有請葉恬先生為星月小姐獻上訂婚戒指！”