從前有個校長，佢禁錮左全校學生【更新至第二十一章】: 第三章

11:05
音樂堂亦稱為訓覺堂
喺優美嘅音樂襯托住波濤起伏不斷嘅歌聲，極容易令人訓着。當一堆唱歌悅耳嘅人、因為走音走得太勁而唔唱嘅同訓着左嘅人撞埋一齊，就形成一個差強人意嘅畫面，令人咋舌。呢個情況都維持左好耐，教音樂嘅殷老師都吹我地唔漲，無論佢講笑話定傾八卦都無辦法招喚返嗰D瞓覺嘅同學嘅靈魂返黎。唯一嘅優點就係我地仲未進化到上堂做功課，但係呢件事唔會維持太耐，因為我肯定見到男班偷偷地咁做緊英文功課，我嘅意思係抄英文功課。

12:14
「滴答滴答滴答……」音樂室中出現左難得嘅寧靜，連秒針移動嘅聲音都聽到。殷老師當然分秒必爭，盡可能快速地將所有嘢教曬俾我地（無人聽ok？）。「滴答……鈴鈴鈴鈴……」當然分針落在3字上，鈴鈴嘅鐘聲完美地配合，我可以保證下堂嘅鐘聲喚醒熟睡中嘅同學嘅能力仲勁過鬧鐘。全班同時精神曬，仲好齊好大聲同殷老師講再見。Happy lunch time！

1:16（午休）
「颱風瑪姫正續漸靠近香港，預計於新界地區略過並帶來暴風雨，天文台考慮改發十號風球……颱風瑪姬正續……」身為一個多次hack入老師帳戶嘅邱淳，啱啱用英文老師嘅帳戶打開天文台嘅網站，播放出一段又一段十六分鐘前嘅新聞。最白痴嘅係佢以最大聲去播放呢段無限loop嘅新聞，如果有老師問，我地一定會誓死話唔知。





「喂！Jimmy」一把嚴厲嘅聲音令嘈吵嘅成班突然靜曬，望向門口，只見到我地嘅Geography兼訓導老師兇惡咁企喺門口，雙眼怒睥着邱淳，然後再望向我地：「呢度咁多個同學無人聽到同見到㗎咩？」有一D唔知發生咩事嘅同學一臉茫然，眼甘甘咁周圍望。「我地以為係老師叫佢開，所以無理到佢」經常試圖犯校規嘅咸魚即刻擘大眼講大話，但個老師又信，所以就攞走邱淳本手冊同佢個人出課室。其實我都幾好奇，到底佢仲有幾多操行分。

「轟！」突然一下強勁而震撼嘅雷聲在天上響起，呢下唔惹小，幾乎可以feel到個地下震。當然我地成班都差唔多，全部13歲，斷估都唔會好似3歲細路仔咁易喊。窗外早已變得一片漆黑，但久久都未落雨（說好的暴風雨呢？）。當咸魚佢地又唱大陸歌嗰陣，我無視佢地，筆直咁行去窗口。外面嘅樹好奇怪，受颱風影響本應搖擺不定，危危可岌，但而家佢地完全唔郁，筆直企喺泥土之上靜止。呢種感覺似曾相識，有一種身心都被佢吸引住嘅感覺，就好似黑洞咁，令人想跳落去陪伴佢……

OK，要諗D樂觀嘅嘢，例如我本漫畫賣出左70蚊la（賣左俾7個人），呃…一陣有中文堂la，可以食花生玩pen beat…………算la打鐘la上堂la……

13:30
中文堂唯一嘅好處就係我可以同Joey調位，然後坐後D玩pen beat（咸魚音樂教授好過miss殷嘅樂理👍👍）。中文老師梁老師，係一個平易近人嘅老師，亦係少數仍然能夠容忍我地嘅老師。但我感覺到老師嘅底線一次又一次咁向後移，但總有一日會“不小心”掂到條線，到時就GG啦！其實我覺得中文堂都幾好嘅（大概係因為我中文成績唔太差，亦會聽下書咁囉～），不過D男仔就硬係唯恐天下不亂咁喺度嘈，係我就一嘢扣佢地分啦！不出所料，邱淳又將一隻男仔唔應該有嘅白晢雞手高舉空中，唔好講話答問題，佢十成連書都無帶。「梁老師，我可唔可以去一去洗手間呀？」佢用一把懶係擦鞋嘅聲同梁老師講嘢，聽到都打冷顫！梁老師都習慣左邱淳呢個“週期性中文堂失禁症候群”，所以都批准佢去。但我地心知佢又唔知無帶D咩所以就去廁所匿埋40分鐘，永遠唔係去廁所就係去醫療室等運到。

【中文堂】




度秒如年，邱淳唔係爆石就係走堂，但班上太混亂所以老師都懶得理。一如既往，班上嘅男仔又喺度高談闊論，不停嗌一D無意義嘅花名同歌詞，甚至連老師喺黑板擇左佢地名都懵然不知，睇黎擇多幾次佢地就要扣分。

15分鐘後
「男班長，你去男廁睇下見唔見邱淳，如果唔見就落埋去醫療室揾佢la，唔該」梁老師望住坐第二行第一個位嘅男班講嘢，既然老師吩咐，咁偉大嘅男班又點可以托手踭，只見得142嘅男班對住我地反一反白眼就急急腳走左。呢個時候，一個穿著紅色制服嘅校工姨姨，敲一敲門，俾左字條梁老師，然後就離開，梁老師望住張字條慢慢皺眉頭，但好快又變返以往咁，好似咩事都無發生過咁。

5分鐘後
男班終於返黎la，佢話：「廁所同醫療室都唔見佢」

即係……





邱淳失蹤左…………