【周景言視覺】
頭好痛……

我……我喺邊呀?

冰冷嘅觸感由凹凸不平嘅階磚傳到無被衣服包裹嘅手臂及臉頰,更傳來陣陣刺痛嘅感覺。

睜開雙眼,只見到異常陰暗嘅走廊,呢度係頭先我同大哥佢地追嗰幾個中二生嘅地方。頭先打鬥嘅血跡唔知點解已經消失得無影無蹤,就連被燒毀嘅位置都原好無缺,就好似間學校有自動收復嘅能力咁。

由非封閉式後樓梯嘅缺口可以見到外面天色灰暗,睇嚟我都暈咗一段時間。





估唔到嗰幾個中二生竟然咁好人留我生路,但明明佢哋對住呂源同阿恒(敵人姓名)就可以狠下心腸……

如果唔係我無阻止呂源魯莽咁衝過去去或者佢哋就唔會死……
如果我哋有考慮到而家一個稱為“異能者”嘅無聊遊戲已經開始咗,結果就唔會咁……
如果我哋班係派肌肉控制類嘅人嚟,而唔係我地三個無用嘅人,就唔會咁……

可惜一切都無如果……

諗到呢度,我掏出口袋嗰張無被使用卡牌,深藍色嘅字體寫住[時間穿梭者],聽落去好似好好用咁。但其實係要揾到其餘四個有同樣技能嘅人先可以用,根本無實際用途。





苦笑咗一下,我就向距離較遠嘅前梯進發返去4D嘅班房,同大佬報告下,呢次嘅行動失敗咗,順便投訴下佢嘅安排不當。

我慢慢扶住牆壁咁企起身,稍微定神幾秒鐘就開始行去目的地。

先啱啱行到3D班房門口,後方突然傳來機器碰撞嘅聲音。大約係由圖書館傳嚟(3C班對面,周景言後方),可能只係電腦跌落地之類呱…

連自己都說服唔到自己,電腦又無腳點會跳落地呀~

諗到呢到,我馬上加快腳步,快走向前梯。





忽然,圖書館傳嚟陣陣鬼魅般嘅低吟,彷彿戰場上受重傷嘅將死之人嘅呻吟,令人不寒而慄。

與生俱來嘅同理心驅使我走過去查探有無人受傷,但該死嘅理智無法支配腦袋,明知嗰度可能有危險都被好奇心逼過去。

走到圖書館門外,我伸手緊握門把,正準備拉開大門。理智攞咗短暫嘅操控權,令我放開手,但下一秒同理心又向我打招呼。

推開門嘅一瞬間,一股混合血腥味同唔應該存在嘅氣油味入侵鼻子,令我下意識咁鬆開手,掩住鼻子同翻騰不已嘅胃部。

我緩緩退後幾步靠牆深呼吸。

就算入面有人都應該命不久矣,對唔住。我望住漆黑嘅圖書館喺心中道歉。

「咇………………」





不詳嘅鐘聲響起,由四面八方傳嚟

圖書館內好似有D嘢甦醒咗。

「砰!」

大門連同附近嘅牆壁爆開,碎片噴滿地,我連忙用手保護頭部。


一隻怪物從破洞爬出,佢看似係嚴重失誤嘅實驗品,半係野獸、半係機械。身軀宛如巨大蛞蝓,全身嘅黏液反射亮光,身上有一些機械胳臂,胳臂上插上各種武器,有嚇人嘅長針,有放射強光嘅光束,不安份地一開一闔嘅爪子同鋒利嘅大刀。
已有 0 人追稿