從前有個校長，佢禁錮左全校學生【更新至第二十一章】: 第十九章

【周景言視覺】
黏稠嘅口水從扭曲嘅臉龐流出，血紅嘅光束鎖定我嘅位置，四周嘅牆壁彷如被塗上鮮血，十分詭異。

怪物歪頭望住我，好似喺度打量我咁。

[要走la，周景言……夠啦，唔好望呀！]

理智制止我呆呆嘅行為，縱使已經被嚇壞，但意識仲可以捉住一絲理智已經係好了不起嘅事。

我瞄向前梯嘅方向，路途唔算太遠盡力跑過去都可以搏一搏。





唔知點解明明後梯只係喺我側邊，但係我唔想行嗰邊，行嗰邊會好危險，會有事發生……

怪物仍然歪頭望住嚇呆嘅我，噁心嘅唾液淌下扭曲嘅臉龐，金屬胳臂喺四面八方咁伸我。

我將鞋子鬆咗一半，吊喺腳上，然後發力拋向前梯嘅方向，發出咚一聲。

怪物被聲響吸引過去，整個醜陋嘅身體大幅度咁拎過去。

係好機會





我拔足就跑，但得一隻腳有著鞋非常唔方便，令到我跑到一拐一拐，拖慢速度。

花咗半秒嚟除鞋再執返以防不時之需，好彩嘅係怪仲未發現我而家逃跑咗。

【距離前梯五米】
樓上有我嗰班嘅同學，我嘅朋友，全部都喺上面㗎，佢哋會幫我，會救到我㗎！

【距離前梯三米】
怪物已經發現咗我啦…





金屬胳臂同磚地摩擦產生嘈耳嘅喀嚓聲。

【距離前梯兩米】
喀喀喀喀喀喀喀喀喀喀喀喀
嚓嚓嚓嚓嚓嚓嚓嚓嚓嚓嚓嚓

摩擦聲愈嚟愈大，愈嚟愈近。

但係希望就近在咫尺，只差幾步就到㗎啦！


【距離前梯0米】

點…點解會咁㗎？






一道堅固牆壁牢牢地封住樓梯口，接駁口完美無暇地接上地面同天花板。


怪物因剎唔切制而一股腦兒撞向locker，發出砰砰嘅嘈音。


時間唔容許我震驚。


唔使多想，我嘅目標：後梯


我出盡飲奶力衝過怪物身旁，佢發出低沉嘅笑聲，然後佢迅速企返起身。趁著呢個機會，我將另一隻鞋準確咁揼向佢塊臉，令佢失咗一下平衡。






呢一下救唔到我幾多，只用咗半秒，熟悉嘅喀嚓聲又從後方傳嚟。


比頭先、更密集、更大聲、更可怕。


【距離後梯一米】

就到啦！就到啦！


短短幾分鐘內我再次感到難得嘅喜悅同希望。






喺呢個時候，我出力一跳意圖跳上樓梯。


喺起跳嘅一剎那，怪物嘅爪子抓住我起跳嘅右腳。


阻力改變咗航導，身軀飛向樓層之間嘅缺口，襪子被找住順勢被甩出。


雙手喺空中亂抓，前一秒嘅希望同喜悅一掃而空。


我成功了，我成功跳出校園






但換嚟粉身碎骨嘅結果……