從前有個校長，佢禁錮左全校學生【更新至第二十一章】: 第二十一章

《同學A視角》
兩個黑影喺窗外高速掠過，三兩拼步就跑到天台。其中一個黑影執起一小塊石頭，喺校園最高嘅地方擲下石塊。小石頭曲線下墮，當佢準備飛出圍欄，重獲自由時，圍欄上方出現一無形嘅屏障，石頭撞落屏障，屏障發出如閃電一樣嘅高壓電，將可憐嘅小石塊烤焦，焦黑嘅小石頭帶住點點火光跌落地上。嗰個掉石頭嘅黑影人笑左一笑，亮白嘅牙齒清晰可見，卻睇唔清楚佢個樣。

另一個黑影跑走，不久佢背上多咗一具疑似人類嘅屍體，佢舉手一掉，屍體同石頭一樣被拋向圍欄，撞上電網，高壓電將佢燃燒，形成一團火光。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
場境一轉，視角嚟到校園嘅一樓，一隻身型龐大嘅怪物正凝視身下嘅火場，一個由各種武器堆積而成嘅山被熊熊大火焚燒，濃濃嘅黑煙滿佈空氣中。眼前嘅怪物披著雪白嘅毛髮，但白毛竟然無被黑煙燻黑。呢個係一隻老鼠，一隻四肢異常發達嘅白老鼠。同青蛙一樣，佢腹部都有一大個鮮血淋漓嘅傷口，內裡嘅白骨外露，勉強抱住內臟。發達嘅四肢肌肉腫大而強壯，爪子嘅指甲長如劍利如刀。

通紅嘅雙眼，粉紅嘅手足，雪白嘅毛髮……

白老鼠後方企住一個人，佢唔係黑影，但輪廓模糊不清，只可以隱隱約約分辨到佢係一個年過半百嘅男人，佢高舉火把掉向火堆，火把同身後嘅火山融為一體，劈啪作響嘅火又熾熱又刺目，逼使老鼠後退幾步，但嗰個男人就仍舊企近火堆，唔怕火燒唔怕濃煙。





突然燃燒中嘅武器竟湧出源源不絕嘅血液，但血液流出無幾耐又被蒸發凝固。乾固嘅血塊變成燃料，令火焰越燒越旺，劈嚦啪嘞嘅聲響充斥走廊。