從前有個校長，佢禁錮左全校學生【更新至第二十一章】: 第二十章

【Chole視覺】
自從有咗技能卡後，所有人嘅能力都列為未知，可能佢以前係一個運動好差嘅人，但而家佢有機會係一個體能極佳嘅人。一切都變為未知之數，你永遠都唔知你眼前嘅敵人有咩能力，可能係深藏不露嘅高手，亦可能只係一個抽到平凡嘅動物卡或助攻卡。

呢一場打鬥只係開始，我哋能夠輕易咁反敗為勝都只係因為好好彩咁有歪兒嘅「狼」同啱啱整嘅化學炸彈。下一次就未必會再咁好彩，對方會派更多人更多高手，而唔係三個廢物。

10:07
好不容易K.O左敵人，鮮血沾滿磚地，烈火焚燒地面，遺下焦黑嘅痕跡。

好似有D唔對路…點解只係得兩個人㗎？





下一秒，我感覺到巨大嘅壓迫感由後方傳嚟。

「咚」一聲悶哼，後方嘅敵人攤倒喺地上面，右手握著嘅鎅刀跌下，雙眼緊閉，睇嚟係暈咗。

「咻」嘅一聲，原本企喺我哋身邊嘅小年憑空消失，但係無任何人經過。

我哋愕然咁望住佢消失嘅位置，蕭永忍唔住嗌咗句wtf出嚟。

正當moon打算大聲叫揾佢嗰陣，俾咸魚制止咗。





「你大叫只會吸引怪物同埋其他不懷好意嘅班別嚟㗎咋！」

我非常同意佢所講嘅野，其實值到而家，發出咗咁多嘈音同尖叫聲，都仲未有怪物嚟已經係萬幸啦！

我哋打算一半人上去上層揾小年，另一半就去2B暫時嘅基地。

嗰個暈低嘅敵人毫無預兆咁彈起身，張開無神嘅雙眼，左手撐地右手摸牆咁企起身。

Joey打算燃點化學炸彈揼過去，但我阻止咗佢，我知道事情必有奇怪。





敵人雙目無神，四處張望後以右手從褲袋掏出卡牌，但我哋睇唔清楚上面寫咩。

佢就好似睇唔到我哋咁，完完全全咁無視我地。

佢開始行去前梯嘅方向，一拐一拐，緩慢前進，我地目不轉睛咁睇實佢。

行到去3D班門口，佢突然停低，望向我地嘅方向，然後又慢慢行返過黎。我地提起簡略嘅武器，一邊慢慢咁向後退。

佢去到圖書館門前就停低咗，雙手放喺門把，猶豫咗幾秒就推開門，之後佢又放開手令到度門砰一聲咁閂埋。

之後佢退到後方嘅牆壁，跌坐地上，然後急速咁雙手抱頭並大叫。但明明四周一D動靜都無，要講嘅只有班房入面八卦好奇嘅人探頭食花生，睇住佢發瘋咁大叫。

佢停止大叫，仲將一隻皮鞋拋向後梯嘅方向，然後除咗另一隻鞋握喺手上再裸…腳跑向前梯。

佢嘅身影消失幾秒後，又再出現返，佢又跑返過嚟啦！





佢跑好快，快到跑到我地附近，歪兒避唔切令敵人kick到歪兒隻腳，然後佢跳樓……

佢尖叫住咁下墜，喺後梯嗰度跌落去。

holy sh…

又「咻」一聲

小年重新出現喺頭先嘅位置，手上握住一張卡，上面寫住【時間穿梭者】，同我嗰張一樣。同時Joey同歪兒手上都各自多咗一張牌。

《3.折開卡牌後，消失乃正常反應，死後會掉落，由兇手執起》