「起身啦傻仔,起身啦傻…」我睡眼朦朧咁攞起床頭櫃正充緊電嘅電話,撳熄咗擾人清夢嘅鬧鐘。我戴翻起我深藍色嘅圓框眼鏡,睇咗睇時間。十二月二十號上午七點正。已經第三日喇,我女朋友已經第三日無搵過我喇。從前日開始,無論係snachat, Instagram, 定係facebook佢都全部封鎖咗我,而我whatsapp佢又係灰剔。呢三日我都好擔心佢,無時無刻都攞住部電話,盼望住佢會復翻我訊息,但係佢都係好似無咗影咁。平時我激嬲佢,只要我講翻幾句花言巧語,佢就會開心翻;但係今次我連自己衰乜都唔知,佢就失咗蹤。我掹開電話條插電線,行咗入廁所刷牙洗面。喺塊鏡入面嘅我好似成個人都瘦咗好多,無嚟精神。又喺嘅,條女無啦啦玩失蹤,唔愁至奇啦。刷完牙之後,我將尋晚做好嘅功課塞曬入書包入面,攞住個麵包就出咗門口。唔經唔覺,我行到嚟屋企樓下嘅紅綠燈。我停低咗。唔知點解喺呢個時候,不斷有好多往事湧入我記憶嘅相冊之中…
 
我係一個平平無奇嘅中學生,姓韓,名逸林,今年讀中五,傳統男校。上天總係公平嘅,賜予我179cm嘅身高,卻無賜予我帥氣嘅臉孔同富裕嘅家庭。我三百幾度近視,戴住一副木木獨獨嘅藍色圓框眼鏡。我嗰樣雖然唔係好靚仔,但出得街都見得下人咁。我住喺長沙灣,家底唔算喺好有錢,但我都有能力應付一日三餐。
 
我諗,一切都可能要從嗰日講起。
 
差唔多兩年前,我仲讀緊中三。平時每逢星期一三五都唔使去補習,因為嗰時我自問都仲可以應付到學業。十一月尾嘅時候,我屋企樓下有個新鄰居搬咗過嚟,但係我一直都無見過佢。好記得當日喺十二月一號星期三,我放學落咗巴士,喺樓下嘅紅綠燈,遇見咗佢。佢嗰日扎咗個馬尾,夕陽嘅斜光照喺佢啲頭髮上面,令佢嘅頭髮好似染咗金黃色咁,隱隱約約散發住一種女神嘅光芒。佢著住一件旗袍校服,上身仲著住一件深藍色嘅衛衣。過腳眼嘅一對白色短襪襯托著佢有小小肉地嘅雙腿。當其時,我好似一個癡漢咁凝望住佢。就係電光火石之間,佢擰轉咗個頭。喺佢額頭前嘅劉海喺微風之中揚起咗,露出佢白皙嘅面龐。佢同我一樣都係戴住一副圓框眼鏡,但喺佢係嗰種幼框金絲眼鏡。佢白裡透紅嘅瓜子臉,喺斜陽嘅映照之下都顯得特別鮮艷;喺嗰種出水芙蓉嘅感覺,而唔係驚艷嘅感覺。喺幾秒之間,我地雙目交投,宛如時間靜止咗咁。但係過咗零點幾秒之後,我收起愕然又色瞇瞇嘅面孔,因為嗰刻真係好鬼死尷尬。你要明白一個讀咗九年傳統男校嗰小男孩基本上都唔會同異性有過多接觸。突然而來嘅幾秒眼神接觸瞬間令我心跳加速。我雖然紅都面曬,啊,唔係,喺面都紅曬,但係我都要扮到自己好從容不迫嘅樣。呢一刻,我又好自然咁望向企喺我左邊嘅佢,好彩佢無再望過嚟。雖然佢嘅儀容唔係特別俾人帶嚟驚艷嘅感覺,但係佢可愛嘅模樣已經深深咁刻咗喺我心入面。話咁快,唔識做嘅紅綠燈又轉咗顏色。我一直尾隨住佢,因為唔知點解佢又係行我要行嘅路。真係唔講都唔知唔係睇緊TVB,又會真係咁啱都有,原來佢就係新搬嚟嘅鄰居,住喺14樓。我住16樓,所以我地入埋同一架𨋢。當時,我真係好想開口hi一hi佢,但係真係淆底到全程𨋢都無同佢有任何眼神接觸。我眼白白咁睇住佢喺14樓出咗𨋢,真係好想自己揼心口啊…
 
如是者,我維持咗一個癡漢嘅形態大概兩個禮拜,我終於鼓起呢世仔都無嘅勇氣。又係一個星期三,又係放學,又係紅綠燈,又係佢。我行埋咗佢身邊,輕輕拍咗拍佢博頭,開口講咗句:「hi…咳…hi」




 
屌,走音。
 
「呢…呢幾日放學都見到你喎,之前唔見你嘅,你…你新搬嚟架?」我結結巴巴咁問,頭先嘅走音搞到我面紅耳赤咁款,真係尷尬到pk。
 
「哦,係啊,前幾個禮拜先搬嚟咋。」佢一面純真咁望住我,之後又笑咗一笑。
 
癡線,真係成個魂魄俾佢一下勾走咗。我當時梗喺無放軟手腳啦,咁難得同佢可以傾到兩句,但係呢個時候個唔識做嘅紅綠燈又再次轉成綠燈。
 
「不如我地一路行一路傾啦?」我膽粗粗咁問。




 
「好啊。」
 
「係呢,講咁耐都未問你叫咩名添。」我靈機一觸,突然諗起呢個咁重要嘅問題。
 
「我叫黃雨桐,Carly。」佢露出一個燦爛嘅微笑,不經意咁凸顯咗佢右邊臉頰嘅酒窩。
 
我地行到樓下大堂,入咗𨋢,繼續傾計。
 
「喺呢,你有無snapchat啊?可唔可以add你。」我厚住面皮咁問佢。




 
「好啊,嗱…搞掂,我accept咗你個friend request喇,啊,我都要出𨋢喇,snapchat傾啦。」到咗14樓,佢就出咗𨋢,留低我一個回味住啱啱嘅一段時光。

「喂,醒啦後生仔,唔好發夢喇,行得喇。」一把沉實嘅聲音將我從回憶之中拉回現實。路過斑馬線,雨桐熟悉而模糊嘅面孔再次不禁喺我腦海中浮現。我托一托眼鏡,摸咗摸右邊褲袋嘅鎖匙扣,然後過咗斑馬線。
已有 0 人追稿