不過,塞翁失馬,焉知非福,又有邊個知道係福係禍?但係,照而家嘅情況嚟睇,我似乎諗多左……
老闆叫我下星期一就可以返工
講返份工先啦,喺大公司做野,你就唔會預好高薪架啦,不過就勝在夠穩定,高級文員$16000一個月,我同老豆老母同兩個兄弟姊妹一齊住,租金加水電煤費都係我地夾份俾,應該仲有八九千蚊,加上我平時生活都算慳,所以每個月應該都儲到幾千蚊(我好似太過樂觀)加上老闆話有乜乜77嗰啲福利,如果做得勤力每個月可以加500蚊,年終又會有花紅,所以其實都好好
返工前一日,班friend約我去打邊爐聚下,順便當係慶祝我第一次interview就得咗,嚟到XX酒家,入到去一間房,啲friend坐哂喺嗰到:小齊,倚菲係我最好嘅朋友,我小學已經識佢哋,梗係同佢哋一齊坐啦
佢哋即刻同我講聲恭喜,我都畀個好得戚嘅樣佢哋,我夠膽講,在座六七位朋友,冇一個係第一次就in到
小齊即刻串我「 唔好咁招積呀,小心俾人即刻炒魷魚呀哈哈」
倚菲都講「同你咁friend俾啲薪酬我呢」
我笑住同佢地講「 你哋都痴L線㗎」
我哋大家笑埋一份,回想起中學嘅時候,同啲朋友嘻嘻哈哈,一齊玩,一齊笑,一齊喊,可惜中學畢業之後大家都要各奔前程,所以真正friend先會見,真正開心嘅日子已經好少有
突然間,我個腦閃起咗一啲嘢




令人痛苦嘅嘢,不過好快就冇,繼續同佢哋一齊笑
坐喺我對面嘅溰浚講笑咁講「喺大公司度做,肯定好多社交圈子啦,到時一定左擁右抱,帶住幾條女嚟見我呀」
佢呢句嘢係善意嘅, 但係真正勾起番我嘅回憶
係Hailey......
我同佢講過,我對佢係一心一意嘅,唔會去溝其他女,呢個承諾仲未完,佢就走咗
我一生一世都會守護住佢,絕對唔會三心兩意

我個腦好痛,好多回憶再次侵襲住我嘅神經,我皺起眉頭,合埋雙眼,唔想再去諗,小齊同倚菲都知道我嘅經歷,即刻向溰浚打咗眼色,唔畀佢再講落去,之後我乜都冇再講

返工嗰日




有咗上次嘅教訓,我今次更加早起身,六點半就起身,仲睇清楚埋路面情況,確定屯門公路冇塞車,先夠膽去搭巴士,八點三就落車
佢距離返工時間九點,仲有四十五分鐘,今次我可以慢慢行啦
我塞住耳筒,又係嗰首「明白了」
「月與影相好,離別哪個代價高……」 老實講,其實我心情真係好緊張,不過聽歌至少幫我紓下壓
過返嗰條同樣嘅馬路,同樣人來人往,紅燈公仔變左做綠燈公仔, 喺馬路邊積住嘅人一即刻湧出嚟
就係呢個時候,我前面有一個背影
款式簡單嘅米白嘅連身裙……
普普通通嘅波鞋……
係Hailey!!
我想衝上前抱住佢,但係馬路上太多人,我追唔到佢,而佢越行越遠……




我垂頭喪氣,估唔到自己居然喪失多一次機會,又再陷入沉思,其實我根本睇唔到佢個樣,或者佢根本就唔係Hailey,只係穿著嘅款式一樣

九點準時嚟到公司報到,見左老闆,老闆先介紹一下公司嘅運作, 之後分派我入宣傳部, 畀咗個座位我,就正式展開一日嘅工作
根據我目測,宣傳部大概有十幾人左右,佢哋都各有自己做嘅事
第一日返工,工作未算多,但係有好多嘢都唔識做,好彩嘅係,有好多人都同我握手示好,仲教我做嘢,第一日,我認識咗坐喺我前面嘅Michael,佢係一個好友善,好開朗好樂於助人嘅人,有乜嘢都會幫我,第二係喺我斜對角嘅Brian,佢好鍾意同人打牙骹,做嘢做到悶嗰陣時,好多人都會搵佢解悶
係喎講咗咁耐, 仲未知道坐我隔離嗰個人添
我擰轉頭望一望,先從下面打量佢,點知令我好驚訝……
款式簡單嘅米白嘅連身裙……
普普通通嘅波鞋……
小小雪白嘅面龐,烏黑嘅眼睛,面上帶住嘅甜蜜嘅笑容,仲有小小嘅酒窩,畀人一種好pure好true嘅感覺
呢塊熟悉嘅面同埋熟悉嘅衣著
佢係……

待續……
已有 0 人追稿