是咁的，我嘅職業係動物傳心師: 3.餐肉

講返動物傳心係咩嚟先，簡單講就係可以同動物溝通，依種能力有行家歸咎於量子力學，利申，我就唔識啲咁深嘅嘢。有時會覺得神棍呃人同自圓其說嘅技術真係好高超，呃人嘅時候就話量子力學科學，被人篤穿咗就話信則有不信則無；如果係科學，就唔會信則有不信則無啦！我係唔信水會蒸發上天落雨，係咪水點就唔會蒸發上天？科學係你信唔信都會有，一開始宣傳動物傳心話係科學已經輸咗──輸在無腦。

但各位放心，小弟唔同，小弟的確擁有無辦法解釋嘅傳心能力，依種能力喺我隻貓餐肉就死嘅時候，突然出現。

嗰陣餐肉已經奄奄一息，我喊到口腫面腫。

獸醫話，差唔多喇，有咩要講記住講；嗰時我心諗，人話嚟喎，我講咗佢都唔識聽啦。