是咁的，我嘅職業係動物傳心師: 15.車禍

大B嘅性情係喺兩年前一場車禍之後大變。

嗰日阿麗原本要帶大B去獸醫診所做定期檢查，點知差唔多到嘅時候，大B突然鬆脫狗帶，一支箭咁衝咗出馬路，一架私家車收掣不及，將佢撞飛。好彩阿麗夠冷靜，即刻搵個路人合力抱佢去獸醫度急救，萬幸嘅係因為及時止血所以救得到，遲啲就好難講。

如果阿麗當日淨係識喊反應唔切，咁大B肯定無命企喺我面前串串貢。

「雖然救得返，不過⋯⋯」阿麗嘅目光移去大B嘴前嘅口罩度。

一般嚟講依種口罩係防止攻擊性較高嘅狗亂叫同亂咬人，而一啲無養狗嘅人見到隻狗戴口罩，亦自然會假設咗佢之前成日亂咬人，不過今次反而唔係驚大B咬傷人⋯⋯