是咁的，我嘅職業係動物傳心師: 16.口罩

「大B喺嗰場意外⋯⋯下顎骨骨折，所以佢咬任何嘢都無力。」

如果佢咬任何嘢都無力，即係無可能咬傷人；咁點解仲要戴狗口罩？

「所以個口罩嘅作用係固定下顎？」

阿麗嚇一嚇，揮手搖頭：「唔係唔係，無咁誇張。係防止佢咬嘢㗎。」

我好心咁勸下阿麗：「你都話佢咬嘢無力啦，仲戴嚟做咩？我諗你都知戴口罩對狗嚟講係一種強烈嘅身心懲罰嚟。」





如果無適當輔導，或者就咁套完口罩唔理佢，狗隻會承受巨大嘅心理壓力，而且係逐秒嚟計。

如果大B一直處於咁嘅狀態，都好難怪佢會又串又燥底，無痴線都算偷笑。

「我知⋯⋯但都係要戴，你有所不知喇⋯⋯」阿麗欲言又止，佢望向大B，大B就特登錯開視線唔同主人對望。

「咁你唔講我就真係唔知嘅。」想法必須透過語言同文字嚟表達，唔係就好易產生誤會。

「大B出院之後，就開始周圍追嘢咬，結果又整傷咗下顎幾次。獸醫話佢再係咁就有機會變成永久損傷，做手術都無用。」





阿麗要佢戴口罩，原來係保護緊大B。只有唔畀佢周圍亂咬野，佢嘅下顎島可以真正好得返。

我望住大B個口罩，佢已經失去咬嘢嘅能力，但仍然搵嘢咬。