是咁的，我嘅職業係動物傳心師: 25.大B與阿麗

「如果只係懲罰你，你主人會喊咩？」

因為係逼不得已。因為唔用依個方法，大B就會繼續傷害自己。

阿麗好清楚幫大B套口罩，會令自己最愛嘅寵物承受幾大嘅痛苦。

當一個主人愛自己嘅寵物，就會為寵物嘅痛苦而心痛，為寵物嘅悲傷而流淚。

「去啦大B，做你當時已經想做嘅事。」





大B已經從口罩嘅枷鎖之中解放，當日被套上口罩而做唔到嘅動作，依家係時候彌補返喇。

終於能夠互相了解嘅阿麗同大B。

大B向我點頭，走近坐喺地上流淚嘅主人。

「麗麗⋯⋯唔好喊啦⋯⋯」大B重獲自由嘅口，伸出粉紅嘅脷尖，為主人舐去淚珠。阿麗破涕為笑，好用力、好用力咁摟住大B。

我見到佢哋咁開心咁摟到實一實，即刻擰轉面、昂高頭，費事啲眼水標出嚟。





好彩反應快，只係眼濕濕。

大B同阿麗互相理解，我嘅工作亦都完結。