當其他人解決問題,得到幸福,我就要鞠躬退位。

企喺大B同阿麗面前嘅我,猶如企喺一對甜蜜夫妻旁邊嘅寡婦。

我從來都只會參與其他人嘅不幸,而其他人嘅幸福永遠容唔落我依個外人,所以每當去到解決事件嘅時候,我就特別懷念自己嘅幸福。

屬於我同餐肉,留喺過去嘅幸福。

見到乜,就會諗起乜。





當你嘗試過同好重要嘅人或者寵物一齊生活好幾年以上,就會連飲水都記起對方。同餐肉一齊咗十三年,仲有咩未做過?(人獸交除外)

阿麗摟實大B,我就會記起冬天餐肉捐入我被鬥,我摟實佢所感覺到嘅柔軟同溫暖。做任何嘢,餐肉都係我腦入面如影隨形。人生中嘅一舉手一投足,通通都連帶住一隻貓嘅幻影。

我嘅好朋友綠燈講過,不如let it go啦;我話,我未做到。

「你覺得咁樣好咩?」

「無話好唔好。」





餐肉離開嗰段時間,綠燈又啱啱失戀,我哋大家知道對方都失去咗生命之中好重要嘅嘢。

「但遲早都會fade out㗎喎。好似我咁,我嗰日同Dada無聊入玩具反斗城行啦,到我返到屋企先發現,喔,係喎,原來之前同佢去過。」幾重要嘅回憶,都會被時間淹沒,只係花費嘅時間長定短咁解。

回憶沉得深,人會以為自己忘記、以為自己放低咗,但實際係見返一個場景、聽返一句說話,回憶就會泛濫成災。
 
已有 0 人追稿