是咁的，我嘅職業係動物傳心師: 41.一支煙

「至於異樣呢，嗰個人類身上有啲奇怪嘅臭味，平時就無嘅，淨係嗰日有。」

得嗰日有嘅臭味？

發叔返到嚟，細貓就開餐。

「今日有無嗰陣味？」

「今日無呀喵，都話平時無，得嗰日有。」





「咦？你哋講咩味？」發叔好奇一問。

「無，細貓講起嗰日你身上有啲奇怪嘅臭味，你有無印象？」發叔高低眉咁諗咗一陣，又索下自己手臂同件衫。

「唔使聞喇，你今日無味。你諗下三色貓變到咁惡嗰日，你做過乜嚟？」

發叔好頭痕，來回踱步，又摸晒下巴咁：「奇怪臭味⋯⋯真係無喎⋯⋯」

「好味好味。」細貓就淨係喺我腳邊掛住食。





「發叔，動物嗅覺比人靈敏，所以未必係當日做過咩，有可能三色妹係聞到你前一晚沾染到嘅氣味。」

發叔恍然大悟，然後又表現出一種疑惑嘅神色。

「如果係前一晚，又講到奇怪臭味，咁我應該知係咩嚟。不過⋯⋯無理由淨係激嬲三色妹吖⋯⋯其他貓都會聞到㗎喎。」

無錯，細貓都聞到，但佢就無性情大變。

「你講咗咩嚟先，我哋再諗下一步。」





「哦，前一晚呢⋯⋯」

 發叔嚟公園餵貓前一晚，夜晚沖涼之後，食咗一支煙。