理論上三色妹就算討厭煙味,都無理由喺煙味消失之後仍然會咁嘅樣。

我望向縮埋一嚿嘅三色妹,如果調轉角度諗呢?或者三色妹唔係討厭煙味,但煙味仍然係觸發點⋯⋯如果我諗得啱,咁成件事就會變得好荒唐。

我慢慢靠近三色妹,踎低,三色妹再次發出低吼警告我唔好行埋去。

「你係咪唔想發叔食煙?」本來猙獰凶狠嘅面孔,慢慢軟化。

發叔仲未知發生咩事,見三色妹無咁惡,笑逐顏開:「佢真係無咁惡喇喎!」





三色妹嘅姿勢改變,好似啱啱出世嘅貓仔好奇咁望住我。

「你點知?」

「我估㗎咋,如果連動物傳心依種超能力都可以存在,咁有輪迴轉世都唔出奇,係咪?」

唔怪得一開始我同佢講發叔叫佢做三色仔,佢又會咁火滾,喺佢嘅角度一定係覺得老公唔認得自己之餘連性別都認錯埋有無搞錯,但又有邊個估到,自己餵嘅流浪貓之中,隱藏住自己曾經嘅伴侶?

發叔皺眉頭,疑惑咁望下我又望下三色妹。





「佢⋯⋯應承過我唔食㗎⋯⋯」

「發叔,你應承過娥姐唔食煙,但係又走去食,娥姐梗係嬲啦。」

「你講緊乜呀,個話題轉得咁快⋯⋯⋯嘅?」發叔僵硬嘅頸慢慢扭動,望向三色妹。

「喵。」

佢又望下我,表情難以置信,用口形講:「吓?」我點頭。





「喵。」
已有 0 人追稿