「挑,你嚇呀叔咩家陣?唔記得呀!乜都唔記得!」佢發難推開我,一手拎返個文件夾,談判亦破裂。

今次幫細貓,無錢收不特止,仲要倒貼出嚟向仆街肥榮買料,真係谷鬼氣,但我應承過細貓幫佢。

「肥榮叔,係細佬錯。」我出手示意佢拎個文件夾過嚟。

「咪喇咪喇,阿叔被你嚇一嚇個心跳得好快,過主啦。」

我拎張一千蚊出嚟,一千蚊喺我手上停留咗零點零三秒,就被肥榮叔一招擒拿手指搶咗。





「隻貓之後——」我都未講完,肥榮叔伸出手閘停我:「叫你過主呀。」

「你收咗成千銀!」

「湯藥費咯!唔使定驚呀被人嚇完?」我聽完依句之後直頭好似靈魂離開咗身體咁,啲火直頭可以煲滾一煲水,但當我嬲到極點嘅時候,反而會好冷靜,因為冷靜先可以諗得出最快最有效嘅方法對付眼前依個賤人。

我環視四圍環境,之後指向一角嘅閉路電視。

「阿叔,你知有閉路影到我哋㗎可?」





「知呀,咁點吖?」
已有 0 人追稿