是咁的，我嘅職業係動物傳心師: 64.廉政公署

「如果有人翻查，見到我哋錢銀交易會點吖嗱？」

肥榮叔大安旨意咁挨後，拍一拍個文件夾，個樣變咗秦沛咁款：「你大我呀？」佢以為有個文件夾掩護就無事。

我拎多一張一千蚊出嚟：「你諗返你三十秒前做過乜嘢？」

肥榮叔眉頭一震。

「好似有人一嘢搶咗我張金牛。」我喺櫃台上托住個頭，對住肥榮陰陰嘴笑。





「咁⋯⋯咁又點呀？」

「即係會被人見到我哋有錢銀交收喎。」

「你差我錢要還唔得㗎咩？」

「得～睇下警察呀ICAC嗰啲信唔信咯。」

「報老廉？你都會瀨嘢㗎喎！」賄同賂兩方都會瀨嘢，所以正常嘅情況下畀錢出去同收錢嘅人係無可能互篤對方出嚟。





我伸出手，將挨後嘅肥榮拉返過嚟，雙眼盯喺佢對豆豉眼上：「係呀，攬炒咯，鬼叫你拎咗錢唔報料我知咩。」

「就因為嗰隻咁嘅畜牲？使唔使搞到自己一身蟻呀？」

「你理得我吖，我鍾意搞到自己一身蟻呀。」我向肥榮叔展示手機，一粒粒字打入ICAC電話。

冷汗珠喺佢太陽穴滑過：「打吖！夠薑你就打！」

拇指撳落綠色嘅通話掣，將手機放喺耳邊。





嘟嘟嘟，嘟嘟嘟。

肥榮叔呑口水。

「喂你好，廉政公署。」接通。