是咁的，我嘅職業係動物傳心師: 125.失效原因

我再一次行出café，閂埋佢哋道門。

能力依舊啟動緊，但店入面嘅聲音變返純粹嘅貓叫聲。

「先生，請問你想點呢？」

「無咩，你唔使理我。」講完我就行返入去坐埋位，之後到巴膠出去洗手。

原來傳心能力會被牆同門擋住，我用咗幾年都唔知。





諗返轉頭，我每次接客都一定係同動物面對面咁用，一係就喺街用，一係對籠入面嘅動物用，從未試過隔住道牆甚至房間，唔怪得我一直唔知能力會被阻隔。

綠燈同巴膠暫時休戰，我哋四個一齊食炸雞，但我全程都心不在焉，一路喺度諗啱啱嗰間房，無啦啦有貓叫，應該唔係普通工作人員休息室，咁係用嚟做乜呢？

依家咁多人，我亦唔可能出聲問貓咪間房有咩用。

我哋四個好快食完嘢，連蛋糕都解決埋，之後Dada同綠燈又走去同貓玩，而察覺到我心神恍惚嘅巴膠就問我咩事。