是咁的，我嘅職業係動物傳心師: 128.唔係咩大事

再推論落去⋯⋯「有咩會係巴膠一定啱而你一定唔會同佢拗？」Dada望一望巴膠：「應該係佢嘅專業知識。」

佢嘅專業知識，腦科醫生嘅專業知識。

綠燈捉住我膊頭嘅手稍為用力：「巴膠話過你身體唔係幾好。我本來都無為意⋯⋯」

巴膠吸咗口氣，擰轉身。

空氣之中瀰漫住令人討厭嘅味道，我幾乎可以感受到Dada同綠燈慢慢理解到巴膠轉身嘅意義，仲有佢哋淚腺滲出水氣。





「你係咪⋯⋯有咩事？」眼淺嘅綠燈已經幾乎忍唔住。

Dada見我無回應，就問巴膠：「佢係咪有咩事？你兩個要瞞住我哋，即係大事啦？」

綠燈撳住我膊頭嘅手指，因為太用力而變得蒼白。

事到如今，都無咩方法再兜。

「唔係咩大事，我有腦癌啫。」





喺膊頭上嘅手突然失去力量，好似斷電嘅機械吊臂咁。

嗰一刻，我唔知綠燈同Dada個心諗緊乜，佢哋呆呆咁望住我，大腦一片空白應該就係話緊依種樣。

無反應，唔識反應。

「無⋯⋯無嘢嘅，你咁後生，仲有得醫嘅！」隔咗一陣Dada先開始說服自己「情況唔係咁差」，佢好似向爸爸尋求安心嘅細路女咁拍拍巴膠背脊。

巴膠無轉身，無講任何嘢。