是咁的，我嘅職業係動物傳心師: 127.推論

「你兩個講緊咩？」嗅覺靈敏嘅綠燈望住我嘅眼神充滿懷疑。

「無嘢。」

「無嘢？無嘢你唔會咁大聲同阿金講嘢，我咁鈍都feel到有嘢喎。」連Dada都露出極少見嘅表情，我淨係喺佢懷疑男朋友出軌嘅時候先見過佢咁嘅樣。

平時我同巴膠都係和睦相處，事關我同佢都係不鳴則已一鳴驚人，基本上可以忍得嘅嘢都寧願忍咗佢，唔會聲大夾惡開拖，兩個炸彈成日爆炸無咩好結果，所以我哋連喝對方都唔會，是但一方大聲咗，另一方就會即刻反擊︰「你咁叉大聲做乜嘢呀！」然後就有排嘈，而且一定成為任何公眾場合嘅焦點。

「阿金你仲要被佢凶完唔鬧返佢轉頭，我哋識咗咁耐你都未試過會唔出聲。咩俄羅斯輪盤咩開槍？你哋老實講發生咩事。」





綠燈同Dada面上除咗疑惑，更多嘅係擔憂。

「你哋咁望住我做咩？唔畀係巴膠有事㗎咩？」

Dada即刻好似小學生咁手指指：「哦！仲唔係你有事？」

綠燈坐喺我旁邊，搭著我膊頭：「就算係就咁睇樣，都似你有事多啲。」我諗起自己喺廁所照鏡個樣⋯⋯

「雖然我哋只係懷疑，亦無諗住求證，但你兩個啱啱咁樣就已經話咗我哋知有事。」





Dada接住綠燈嘅說話講落去：「巴膠咁大聲同你講嘢，但你唔還擊，即係佢講得啱而你又知自己一定錯，所以無得嘈。」

佢咬住下唇。