是咁的，我嘅職業係動物傳心師: 131.miki

 
無錯⋯⋯我可以依賴我嘅朋友，所以我拜託Dada幫依間鋪頭幫做個專訪。

「做咩無啦啦要做專訪？」

「我硬係覺得依間café唔係咁簡單。你嚟做專訪嗰陣可以名正言順睇下走廊嗰間房係做乜，順便幫我攞下料。」

Dada諗咗諗，點點頭：「我手頭上有訪問跟緊，但我識一個朋友，佢都係記者嚟，佢好鬼得閒而且做咩專題佢可以話事。我介紹你識，應該幫到你。」

「唔該晒。」





Dada喺我手機打入電話，加入聯絡資訊，姓名嗰一行打上「Miki」。

我將手機收好，同佢哋道別，之後就搭巴士返屋企。

一路喺車上，諗到屋企阿爸阿媽實好凝重咁等緊我返去，我就忍唔住不停嘆氣。

唔理咁多喇，到時先算，為咗分散自己注意力，我就搵咗Dada個朋友Miki。

佢嘅wtsapp頭像係同一個男仔嘅合照，我覺得自己個樣有少少似嗰個男仔。